Kylian Mbappé nuk i fshehu zhgënjimin pas eliminimit të Francës në gjysmëfinalen e Kupës së Botës 2026. Kapiteni i “Les Bleus” reagoi menjëherë pas humbjes 2-0 ndaj Spanjës dhe pranoi se skuadra e tij nuk ishte në nivelin e duhur për të siguruar një vend në finale.
Pas ndeshjes, ylli i Real Madridit e vuri theksin te mënyra se si ekipi i tij e menaxhoi performancën si në aspektin taktik, ashtu edhe në atë teknik. Ai tha se Franca nuk luajti atë që kishte planifikuar dhe se, në një gjysmëfinale të Kupës së Botës, kur nuk arrin të përmbushësh detyrat, rezultati nuk mund të vijë ndryshe. “Nuk mendoj se luajtëm ndeshjen që donim të luanim – qoftë taktikisht, teknikisht apo për sa i përket nivelit të përgjithshëm të performancës sonë. Dhe kur nuk bën atë që duhet në një gjysmëfinale të Kupës së Botës, nuk fiton”, u shpreh Mbappé për M6.
Sipas kapitenit francez, ideja kryesore ishte që skuadra të ushtronte presion të lartë ndaj Spanjës. Qëllimi ishte që kundërshtari të mos arrinte të vendoste ritmin e lojës dhe të mbahej nën kontroll mënyra se si do të zhvillonte aksionet. Megjithatë, Mbappé pranoi se plani nuk u zbatua siç duhet në fushë dhe kjo u reflektua në rrjedhën e ndeshjes.
Ai shpjegoi se presioni duhej ta shtynte Spanjën më lart në fushë, në mënyrë që ajo të mos kishte komoditet në qarkullimin e topit dhe në organizimin e lojës në mënyrë të ngadaltë e të kontrolluar. “Qëllimi ynë ishte t’i shtynim lart në fushë për t’i penguar të vendoseshin në atë ritëm të ngadaltë dhe të kontrolluar, sepse kur bëhet fjalë për kontrollin e lojës, ata janë më të mirë se ne. Ne dështuam ta bënim këtë”, tha Mbappé.
Mbappé: Spanja dominoi mesfushën, Franca nuk e zbaton presionin
Një pjesë e rëndësishme e analizës së tij u përqendrua te beteja në mesfushë. Kapiteni vuri në dukje se Spanja arriti të krijojë avantazh në zona kyçe dhe se kjo solli probleme për Francën gjatë gjithë ndeshjes. Ai përmendi emra konkretë nga radhët e ekipit spanjoll, duke theksuar se Rodri, Dani Olmo dhe Fabian Ruiz krijuan epërsi kundër Adrien Rabiot dhe Aurelien Tchouaméni.
Mbappé theksoi se Franca përfundonte shpesh në situata ku ndaj kundërshtarit kishte më pak lojtarë në raport me numrin në mesfushë. “Vazhdimisht gjendeshim në situata tre kundër dy në mesfushë. Dhe kundër Spanjës, ky është një problem i madh. Kur i bashkon të gjitha këto, rezultati është humbja. Është një zhgënjim i madh”, shtoi ai.
Në përfundim, sulmuesi francez kërkoi që skuadra ta përballojë eliminimin me dinjitet dhe të nxjerrë mësimet e duhura nga ky dështim. Ai foli për zhgënjimin, por edhe për nevojën që ekipit t’i duhet të vijojë përpara, duke u ringritur pas një momenti të vështirë. “Ishte ëndrra jonë të arrinim në finale dhe t’i jepnim vendit tonë mundësinë të bënte histori. Tani duhet ta përballojmë këtë me kokën lart. Kur fiton, fiton me kokën lart, por edhe kur humbet, duhet të humbasësh me kokën lart”, deklaroi Mbappé.
Ai vazhdoi më tej me një mesazh për reagimin e menjëhershëm pas eliminimit: “Tani ka një zhgënjim të madh, por duhet ta marrim veten, të shkojmë me pushime dhe të fillojmë një kapitull të ri. Futbolli nuk pret askënd”, përfundoi kapiteni i Francës.
Botuar fillimisht në Telegrafi
