Këngëtarja Mariah Carey pritet të rikthejë turneun e saj të famshëm të Krishtlindjeve në Evropë, pas tetë vjetësh mungesë në këtë pjesë të botës. Lajmi është bërë i ditur për publikun përmes raportimeve të mediave britanike, ku theksohet se planifikimet janë në fazën finale dhe se një njoftim zyrtar pritet së shpejti.
Sipas informacioneve që qarkullojnë pranë këngëtares, turneu do të përfshijë ndalesa të rëndësishme në Mbretërinë e Bashkuar. Një nga datat e pritshme lidhet me “The O2” në Londër, ndërsa një tjetër me “Co-op Live” në Manchester. Kjo do të ishte hera e parë që Carey do të rikthehej me një turne të plotë evropian për sezonin e festave pas një periudhe kur fokusin e saj e ka pasur kryesisht në SHBA.
Për fansat në Britani, kjo është një lajm i shumëpritur. Për herë të fundit, Carey ka performuar në vend në verën e vitit 2025, në një koncert të organizuar në Royal Sandringham Estate. Me rikthimin e paralajmëruar, publiku pritet të ketë mundësinë të shohë sërish yllin amerikan në skenë me repertorin e saj të festave, i cili ka mbetur ndër më të dashurit për publikun gjatë muajve të dimrit.
Turneu i Krishtlindjeve rikthehet pas tetë vjetësh në Evropë
Ndërsa pritet shpallja zyrtare e datave të plota, në komunikimet rreth planit për turne përmenden edhe elementë që e bëjnë atë të veçantë për fansat. Përveç hitet e njohura festive, është përmendur se në program mund të ketë vend edhe për materiale të reja. Kjo e bën pritshmërinë më të madhe, pasi Carey ka paralajmëruar se po punon aktualisht për muzikë të re.
Gjatë muajit mars, këngëtarja 56-vjeçare ka treguar se është kthyer në studio dhe se po incizon muzikë të re. Ajo është shprehur se ndihet e emocionuar për punën dhe se shpreson që publikut t’i pëlqejë. Paralelisht me këtë rikthim krijues, Carey ka folur edhe për planet muzikore që lidhen me materiale të papublikuara më parë. Ajo ka konfirmuar dëshirën për të publikuar versionin e plotë të albumit të saj “Someone’s Ugly Daughter”, edhe pse ende nuk është bërë e ditur një datë konkrete.
Në vazhdim të këtyre projekteve, Carey po përgatit gjithashtu një ribotim special në kuadër të 25-vjetorit të filmit dhe albumit “Glitter”. Edhe pse filmi u përball me vështirësi në arkëtime në vitin 2001, kolona zanore e “Glitter” ka fituar status kult ndër vite, kryesisht falë mbështetjes së fansave që e kanë mbajtur të gjallë interesin për këtë krijim. Për këtë pjesë të rrugëtimit të saj artistik, Carey ka rrëfyer se dikur e ka urrejtur “Glitter”, duke u ndalur te fakti se ka dyshuar për arsyet pse e bëri projektin. Me kalimin e kohës, ajo ka thënë se ka mësuar ta dojë dhe se “mori jetën e vet”.
Ndërkohë, në prag të sezonit të festave, vëmendja e publikut pritet të zhvendoset te shpallja e eventeve të turneut në Evropë. Me dy ndalesat e përmendura — “The O2” në Londër dhe “Co-op Live” në Manchester — Carey sinjalizon një rikthim të qartë në skenën evropiane. Tashmë mbetet të shihet kur do të bëhen të ditura datat dhe detajet përfundimtare, si edhe si do të formohet setlisti mes repertorit klasik të Krishtlindjeve dhe materialeve që pritet të shoqërojnë këtë rikthim.
Botuar fillimisht në Koha.net