Kanë kaluar gati dy vjet që kur është larguar orari i kujdestarive gjatë natës për barnatoret në Prishtinë. Kjo do të ndryshojë, pasi planifikohet që shërbimi i “rojes së natës” të rikthehet sërish në funksion, me orë të përcaktuara qartë për ofrimin e shërbimeve për pacientët.
Aktualisht, barnatoret që ofrojnë shërbime pacientëve e kanë të vendosur orarin në derë. Pas përfundimit të kësaj ore, barnatorja në kryeqytet mbyllet, ndërsa disa të tjera punojnë 24 orë. Megjithatë, ato veprojnë pa një rregullore të përcaktuar për orarin e kujdestarisë, duke krijuar një praktikë jo të njëjtë për qytetarët.
Rikthimi i modelit të orarit të kujdestarisë në 24 orë është bërë pjesë e planifikimeve. Drejtori i Shëndetësisë në Prishtinë, Bujar Gashi, ka deklaruar se shërbimet do të kthehen në orar të plotë. Ai ka theksuar se në të ardhmen do të mbahen takime të grupeve punuese me grupet e interesit dhe edhe me qytetarët, por edhe me farmacistët e kryeqytetit, që formula e ardhshme të jetë e përshtatshme në radhë të parë për qytetarët dhe më pas edhe për barnatoret.
Po përgatitet rikthimi i orarit të kujdestarisë për barnatoret
Në pyetjen nëse kërkesat nga farmacistët janë pranuar deri më tani, Bujar Gashi ka thënë se deri në atë moment nuk kishin marrë ndonjë kërkesë, duke e lidhur këtë edhe me faktin se ishte fillimi i mandatit të tij. Megjithatë, ai ka paralajmëruar se në të ardhmen do të përpiqen të gjejnë një formulë të arsyeshme, e cila do të jetë e zbatueshme dhe e kuptueshme për të gjitha palët.
Planifikimi i një orari të kujdestarisë nuk kufizohet vetëm në Prishtinë. Sipas informacioneve të dhëna nga Oda e Farmacistëve të Kosovës, një orar kujdestarie po synohet të planifikohet edhe në nivel nacional. Nënkryetarja e Odës së Farmacistëve, Jehona Hakaj, ka dhënë detaje mbi procesin, duke thënë se bëhet fjalë për plotësim-ndryshim të ligjit 11/2015 për qarkulluesit me pakicë, që përfshin barnatoret.
Hakaj ka sqaruar se Ministri ka formuar një komision, ku ajo është e deleguar nga Oda e Farmacistëve. Në kuadër të këtij komisioni, është duke u përpiluar një orar që synon të jetë për të mirën e qytetarëve, por njëkohësisht edhe për farmacistët. Ajo ka theksuar se po shqyrtohen mënyrat konkrete të rregullimit, me qëllim që orari i kujdestarisë të mos jetë vetëm në letër, por të reflektojë nevojat reale të shërbimit.
Numri dy i përfaqësuesëve të farmacistëve ka bërë të ditur se janë në fazën e shqyrtimit të ankesave dhe kërkesave. Jehona Hakaj ka thënë se beson që deri në mes të gushtit të finalizohet plotësim-ndryshimi i ligjit dhe të kuptohet më qartë se cilat kanë qenë kërkesat e palëve të pakënaqura në këtë rast. Pas plotësim-ndryshimit të ligjit, do të nevojitet një muaj kohë për implementimin fillestar të orarit të kujdestarive.
Ndërkohë, Oda e Farmacistëve ka përcjellë edhe një shifër që lidhet me qëndrimin e profesionistëve ndaj rregullimit. Sipas Odës, 97% e farmacistëve janë pro rregullimit të orarit të kujdestarive. Kësisoj, procesi i hartimit të rregullave, si në nivel të kryeqytetit ashtu edhe në planin nacional, synon të vendosë një sistem më të qëndrueshëm për shërbimin gjatë natës dhe orët kur qytetarët kanë nevojë për barnat.
Botuar fillimisht në Telegrafi
