Komisioni Qendror i Zgjedhjeve ka certifikuar listën e votuesve që do të përdoret për zgjedhjet e parakohshme për Kuvendin e Kosovës, të caktuara më 7 qershor. Zëdhënësi i KQZ-së, Valmir Elezi, ka bërë të ditur shifrat kryesore lidhur me numrin e shtetasve me të drejtë vote, si dhe mënyrat se si do të votojnë qytetarët brenda dhe jashtë vendit.
Elezi ka theksuar se numri i shtetasve të Kosovës me të drejtë vote në këto zgjedhje është 2 milionë e 92 mijë e 174 votues. Sipas tij, kjo listë përmban 15 mijë e 884 votues më shumë se lista e votuesve e zgjedhjeve të parakohshme për Kuvendin e Kosovës, të mbajtura më 28 dhjetor të vitit të kaluar.
Ndërsa bëhet ndarja e votuesve sipas mënyrës së votimit, Elezi ka njoftuar se nga numri i përgjithshëm, 1 milion e 959 mijë e 962 qytetarë do të votojnë në vendvotime në Kosovë. Përtej kufijve, 132 mijë e 212 shtetas janë regjistruar për të votuar jashtë vendit, duke përdorur mekanizmat e parashikuar për votim nga jashtë.
“Nga ky numër i votuesve jashtë Kosovës, 100 mijë e 970 janë regjistruar për të votuar duke dërguar pakon me fletëvotim në adresë të kutisë postare të KQZ-së jashtë Kosovës, pastaj pjesa tjetër 3 mijë e 518 për të dërguar pakon me fletëvotim në adresë të kutisë postare të KQZ-së në Kosovë dhe 27 mijë e 724 votues apo shtetas janë regjistruar për të votuar fizikisht në përfaqësi të diplomatike”, ka shpjeguar Elezi.
Një tjetër shifër e dhënë nga KQZ lidhet me votuesit që do të votojnë për herë të parë. Elezi ka njoftuar se 22 mijë e 685 qytetarë do të votojnë për herë të parë në zgjedhjet e 7 qershorit. Nga ky total, 16 mijë e 934 janë votues që pas zgjedhjeve të 28 dhjetorit kanë arritur moshën 18-vjeçare dhe për rrjedhojë do të votojnë për herë të parë në zgjedhjet e radhës.
Ndërkaq, sipas Elezit, pjesa tjetër prej 5 mijë e 751 votues janë regjistruar për herë të parë në regjistrin qendror civil mes dy palë zgjedhjesh ose bëjnë pjesë në kategorinë e votuesve që kanë rikthyer shtetësinë e Kosovës. Ai gjithashtu ka sqaruar organizimin e procesit zgjedhor brenda vendit, duke thënë se votimi do të zhvillohet në 949 qendra votimi me gjithsej 2 mijë e 550 vendvotime.
Rrugëtimi drejt 7 qershorit: 949 qendra votimi dhe 2.550 vendvotime
Elezi ka specifikuar se nga 949 qendrat e votimit, 911 prej tyre janë qendra me 2 mijë e 498 vendvotime për votimin e rregullt. Sipas tij, në çdo komunë do të ketë nga një qendër votimi të posaçme, për të mundësuar votimin me kusht, duke bërë gjithsej 38 me 52 vendvotime për këtë kategori. Në të njëjtën kohë, procesi zgjedhor jashtë vendit, përveç votimit me postë, do të organizohet në 30 përfaqësi diplomatike.
Elezi ka shtuar se këto përfaqësi diplomatike përfshijnë 17 ambasada dhe 13 konsullata, me gjithsej 47 vendvotime. Për afatet, ai ka bërë të ditur se votimi me postë nga jashtë vendit, i cili ka filluar më 21 maj, do të zgjasë deri më 6 qershor. Ndërsa, votimi nga jashtë vendit në ambasada dhe konsullata do të zhvillohet më 6 qershor. Zgjedhjet e parakohshme në Kosovë do të mbahen më 7 qershor.
Botuar fillimisht në Bota Sot
