Motivimi pas fitores ndaj Irlandës është shumë i lartë te Kosova. “Dardanët” po e mbajnë fokusin te ndeshja e radhës, që të dielën zhvillohet ndaj Austrisë, me fillim nga ora 18:00 në stadiumin “Ernst Happel” të Vjenës.
Ballafaqimi Austria – Kosovë është pjesë e edicionit të pestë të Ligës së Kombeve. Pas dy javëve në këtë garë, pritshmëritë janë të qarta: Austria cilësohet favorite absolute e grupit. Megjithatë, në kampin kosovar është bërë e qartë se synimi nuk është vetëm të “mbahen” në lojë, por të luftohet deri në fund për të marrë të paktën një rezultat që e mban skuadrën të pamposhtur nga stadiumi.
Kosova kërkon agresivitet dhe qasje të guximshme në Vjenë
Këto mesazhe janë përcjellë të shtunën në konferencën për shtyp nga përzgjedhësi Franco Foda dhe mbrojtësi Mërgim Vojvoda. Foda ka thënë se pas fitores ndaj irlandezëve, nuk pati kohë për festë, pasi ekipi e ka zhvendosur menjëherë vëmendjen te detyrat e ndeshjes së radhës.
Tekniku gjerman u shpreh se e kanë analizuar Austrinë, me të cilën kishin qenë të përballur edhe në “Euro 2020”. Në këtë kuptim, Foda theksoi se është i nevojshëm kujdes i veçantë ndaj mënyrës së lojës së austriakëve, duke vënë theksin te loja agresive dhe presingu i lartë që, sipas tij, mund të vështirësojë ritmin e kundërshtarit.
Ai theksoi se atmosfera e përgjithshme brenda skuadrës mbetet pozitive dhe se ekipi do të tentojë ta ruajë intensitetin. “Kam thënë edhe më para. Austria është favorite në këtë grup. Është e mundur gjithçka që të ndodhë nesër. Ne fituam ndaj Irlandës. Ne duhet të paraqitemi sa më mirë që është e mundur. Të vazhdojmë të luajmë me agresivitet si në herën e kaluar. I gëzohemi kësaj loje. Kemi shumë tifozë kosovarë në stadium. Kemi vetëbesim, kemi luajtur me përfaqësuese të forta. Dhe nesër shpresoj në lojë të mirë”, ka deklaruar Foda.
Sa i përket situatës në skuadër dhe mungesave, Foda u shpreh se Austria do të ketë disa mungesa të rëndësishme. Megjithatë, ai theksoi se te austriakët ka mjaft opsione të tjera që mund të sjellin rrezik të vazhdueshëm në çdo moment të ndeshjes. Në të njëjtën konferencë, 60-vjeçari ka folur edhe për qëllimin e tij me ekipin kosovar.
“Jam i kënaqur nëse loja nesër të shkojë mirë. Në fund të ditës do të shohim se çfarë do të ndodh. E rëndësishme është të luajmë me vetëbesim. E njohim kualitetin e Austrisë. Por, pse është favorite nuk duhet ta ulim veten. Duhet ta japim maksimumin. E rëndësishme është të provojmë të shkojmë më lartë. Qëllimi është ‘Euro 2028’. Pjesëmarrja në Evropianin 2028 ka qenë nga fillimi synimi im. Kur dikush luan futboll, luhet për të fituar. Si lojtarët, ashtu edhe trajneri”, është shprehur ai.
Edhe mbrojtësi Mërgim Vojvoda ka përcjellë të njëjtin mesazh për gatishmërinë e grupit. Ai ka thënë se të gjithë janë të përgatitur për një tjetër paraqitje të madhe dhe se e gjithë skuadra synon të japë maksimumin në një ndeshje ku përballen dy objektiva: cilësia e një ekipi të vlerësuar si favorit dhe dëshira e Kosovës për të dalë me rezultat pozitiv. Vojvoda ka vlerësuar po ashtu se Liga e Kombeve është një mundësi shtesë për t’iu afruar sërish ndonjë ngjarjeje madhore.
Ai ka përmendur edhe se Kosova në mars e ka humbur finalen e plejofit për kualifikim në një kompeticion të rëndësishëm, duke e bërë kështu ndeshjen ndaj Austrisë edhe më domethënëse për ecurinë aktuale. Në prag të kësaj sfide, mesazhi i përzgjedhësit dhe i lojtarit kryesor ka qenë i njëjtë: të mbeten agresivë, të mos ulet vetëbesimi përballë etiketës “favorite” të Austrisë dhe të kërkohet një performancë që lë gjurmë në Vjenë.
Botuar fillimisht në Koha.net