Gjendja me mbeturinat inerte të shpërndara në të gjithë Prishtinën ka shqetësuar qytetarët për disa javë radhazi. Banorët kanë kërkuar që komuna të ndërmarrë masa konkrete për largimin e tyre, pasi situata është mbajtur e njëjtë edhe me kalimin e kohës.
Ndërkohë, drejtoria e Shërbimeve Publike ka nisur një aksion për pastrimin e lagjeve, ku janë identifikuar lokacione me mbeturina të tilla. Deri tani janë identifikuar 72 lokacione në kryeqytet, të cilat janë shënjestruar për ndërhyrje.
Për mbi tri javë, qytetarët kanë raportuar se gjendja me këto mbeturina nuk ka ndryshuar. Në disa pjesë të qytetit, mbeturinat janë grumbulluar në vëllime të mëdha dhe kanë zënë edhe hapësira të dedikuara për lëvizje të banorëve. Një nga rastet më të dukshme ishte prapa teatrit “Dodona” në qendër të Prishtinës, ku mbeturinat inerte vëllimore kishin zënë tërë trotuarin.
Situata e krijuar ka acaruar banorët e lagjes ku grumbullimet ishin më të theksuara. Ata kanë shprehur shqetësim për kushtet në terren dhe ndikimin e tyre në përditshmëri. Në këto reagime u theksua se qentë po mblidheshin pranë grumbullimeve dhe se fëmijët, gjatë rrugës për në shkollë, detyroheshin të kalonin në kushte të papërshtatshme për shkak të mbeturinave dhe mungesës së një reagimi efektiv institucional.
Një banor tha se problemi përsëritet vazhdimisht. Sipas tij, “çdo një muaj” ndodh që grumbullimet të krijohen sërish dhe të zgjasin për javë të tëra, duke mbetur më pas pa largim të plotë për rreth tri javë. Një banor tjetër e cilësoi situatën si shumë të rëndë, duke e përshkruar si të papranueshme, ndërsa theksoi se nuk duhej të lejohej të krijohej një pamje e tillë në hapësirat publike.
Aksioni i komunës nis pas identifikimit të 72 lokacioneve
Gjendja nisi të ndryshojë tre ditë pas reagimeve publike, të shtunën. Në atë moment, drejtori i ri i Shërbimeve Publike në Prishtinë, Leutrim Retkoceri, njoftoi se pastrimi i hapësirave publike në lagje të ndryshme do të fillonte. Ai bëri të ditur se “Sot zyrtarisht po fillojmë grumbullimin e mbeturinave vëllimore në Prishtinë”, duke sqaruar se paralelisht po finalizohen edhe procedurat ligjore për marrjen e lejes mjedisore komunale për vendosjen e qendrës transitore të mbeturinave vëllimore.
Retkoceri theksoi se, përveç grumbullimit, puna po zhvillohet edhe me partnerë dhe operatorë të përfshirë në shërbimet për qytetarët. Ai bëri të ditur se ka “mbi 72 lokacione” në Prishtinë ku janë grumbulluar mbeturina inerte. Sipas njoftimit, aksioni po realizohet përmes një bashkëpunimi të gjerë me kompanitë publike në Komunën e Prishtinës dhe gjithashtu me operatorë që shërbejnë për grumbullimin e mbeturinave të amvisërisë.
Ndërkaq, në lidhje me përgjegjësitë për gjendjen e krijuar, kryeshefi i ndërmarrjes “Pastrimi”, Petrit Reçica, u shpreh se faji për situatën lidhet me periudhën kur është marrë vendimi që ka pezulluar deponinë për bartjen e këtyre mbeturinave. Ai tha se deri në kohën kur është nxjerr ai vendim, “e kemi pas situatën në pikën zero”, duke shtuar se kompania e kishte planin, por nuk kishte mundësi ta zbatonte.
Ndërkohë, nga Ministria e Mjedisit dhe Planfikimit Hapësinor nuk u kthye përgjigje nëse është caktuar lokacioni i ri për hedhjen e mbeturinave inerte. Në mungesë të një informacioni të tillë, aksioni i komunës pritet të vazhdojë me fokus në largimin e grumbullimeve në lokacionet e identifikuara, ndërsa procedurat për leje dhe qendrën transitore po trajtohen në paralel.
Botuar fillimisht në Telegrafi
