Afërim Kasolli, ish-deputet i Kuvendit të Kosovës, ka paralajmëruar se Kosova rrezikon më shumë se sa një krizë politike, nëse nuk gjendet një zgjidhje e shpejtë për formimin e institucioneve. Sipas tij, zvarritja e proceseve mund ta çojë vendin në një krizë kushtetuese dhe juridike, me pasoja që shkojnë përtej ngërçit të momentit në skenën politike.
Kasolli ka folur të premten në emisionin “Interaktiv” të KTV-së, teksa komentoi zhvillimet në Kuvend lidhur me përplasjet mes partive rreth çështjes së konstituimit, si dhe rolin e Albulena Haxhiut në ushtrimin e detyrës së presidentes. Ai ka theksuar se tashmë edhe çështja e konstituimit të Kuvendit është kontestues, po ashtu edhe mandati i Haxhiut, çka sipas tij rrit nivelin e paqartësisë ligjore në këtë fazë.
“Kosova vazhdon të ketë krizë më të thellë – atë të dimensionit kushtetues/juridik”, ka thënë Kasolli, duke e lidhur këtë vlerësim me mënyrën se si po zhvillohen negociatat dhe përplasjet politike për çështje institucionale. Ai ka sugjeruar se nëse proceset shtyhen për vitin e ardhshëm, mund të krijohen rreziqe edhe për funksionimin e Gjykatës Kushtetuese, për shkak të kalimit të mandateve të disa gjyqtarëve.
Zvarritja e institucioneve rrezikon krizë kushtetuese
Duke komentuar tërheqjen e Lidhjes Demokratike nga kërkesa për president partiak, Kasolli ka vlerësuar se ky ndryshim ka qenë i befasishëm. Ai ka thënë se LDK-ja “me lehtësi e sakrifikoi pozicionin që deri tash ishte mollë sherri në negociatat me VV-në”, duke e interpretuar si një lëvizje që ndryshon balancën e pritjeve në procesin e marrëveshjes dhe krijon hapësirë për një zgjidhje të re politike.
Sipas Kasollit, LDK-ja dhe Lumir Abdixhiku kanë qenë që nga fillimi mes dy anktheve politike: nga njëra anë rreziku i krizës së brendshme brenda skenës politike dhe, nga ana tjetër, perspektiva e zgjedhjeve të reja parlamentare. Ai ka shtuar edhe një element tjetër, mosbesimin se Vetëvendosje mund të ketë taktika për ta prishur marrëveshjen më vonë, çka e ka bërë të komplikuar pozicionin e LDK-së përgjatë negociatave.
Kasolli ka vlerësuar se, me pozicionin aktual të LDK-së, ku synohet të zgjidhet një president konsensual, kjo parti është afruar me VV-në në një pikë të rëndësishme. Megjithatë, ai ka thënë se LDK-ja mbetet larg në atë që paraprakisht kërkon seancën konstituive, duke e parë këtë si një nga elementet që ende i mban proceset në ngërç. Në këtë kontekst, ish-deputeti ka folur edhe për mundësinë e pjesëmarrjes së partive tjera, duke thënë se nuk pret që PDK-ja dhe Aleanca të marrin pjesë në takimin e ftuar nga ushtruesja e detyrës së presidentes, Albulena Haxhiu, për të martën.
Kasolli ka përmendur edhe kërkesat që po vijnë nga opozita për ta konstituuar Kuvendin sa më shpejt, një qasje që lidhet sipas tij me shmangien e “zgjedhjeve në kohën e diasporës”, sipas skenarit të Kurtit. Ai ka shtuar se, megjithatë, edhe në rast se do të ketë zgjedhje të reja, pragu prej “60 për qind” i kërkuar nga Vetëvendosje mbetet i paarritshëm për këtë subjekt. Në këtë linjë, ai ka rikujtuar edhe një afat të përcaktuar nga Gjykata Kushtetuese: të premten e shkuar ka qenë afati i fundit i definuar nga kjo gjykatë, brenda të cilit duhej të konstituohej legjislatura e njëmbëdhjetë.
Botuar fillimisht në Koha.net
