Ministri i Infrastrukturës dhe Energjisë, Enea Karakaçi, prezantoi në Kuvend projektligjin për ratifikimin e marrëveshjes së huasë me Bankën Evropiane për Rindërtim dhe Zhvillim (BERZH). Marrëveshja synon të financojë elektrifikimin e linjës hekurudhore Tiranë–Durrës dhe lidhjen me Aeroportin Ndërkombëtar të Tiranës, me qëllim që shërbimi hekurudhor të bëhet modern, i sigurt dhe tërësisht elektrik.
Gjatë fjalës së tij, Karakaçi tha se ky financim do të përmbyllë paketën financiare të projektit më të madh hekurudhor të realizuar në Shqipëri në dekadat e fundit. Ai theksoi se me këtë marrëveshje parashikohet elektrifikimi i plotë i linjës, ndërtimi i infrastrukturës energjetike dhe certifikimi sipas standardeve të Bashkimit Evropian. Sipas ministrit, elementët kryesorë të shtrirjes së projektit po shkojnë drejt finalizimit, ndërsa me miratimin e marrëveshjes do të nisë faza e elektrifikimit.
Ministri informoi se punimet civile tashmë kanë përfunduar. Po ashtu, sistemet e sinjalizimit janë në proces drejt finalizimit, ndërkohë që stacionet e reja janë duke u ndërtuar. Në këtë kuadër, ratifikimi i marrëveshjes me BERZH do të hapë rrugën për kalimin në fazën konkrete të elektrifikimit të linjës, çka pritet të sjellë për herë të parë një shërbim modern hekurudhor me trena elektrikë.
Elektrifikimi i Tiranë–Durrës drejt fundit në 2027
Objektivi i qeverisë, sipas ministrit, është që deri në fund të vitit 2027 qytetarët të kenë në dispozicion një linjë hekurudhore moderne. Karakaçi tha se linja do të jetë e sigurt dhe e denjë për një vend që synon anëtarësimin në Bashkimin Europian, duke e vendosur shërbimin hekurudhor brenda standardeve dhe praktikave të rrjetit evropian të transportit.
Ai sqaroi se ky projekt nuk është një investim i veçuar, por pjesë e një programi më të gjerë për rilindjen e transportit hekurudhor. Në paralel, ministria po ecën edhe me disa projekte të tjera që lidhen me zgjerimin dhe përmirësimin e infrastrukturës. Një prej tyre është zgjatimi i hekurudhës drejt stacionit qendror të Tiranës, i cili lidhet me lehtësimin e lidhjes së qytetit me rrjetin hekurudhor.
Karakaçi përmendi gjithashtu ndërtimin e sistemit modern të mirëmbajtjes së trenave, i njohur si depo, si dhe përgatitjen e kontratës së shërbimit publik. Qëllimi është të sigurohet një shërbim cilësor dhe i qëndrueshëm për qytetarët. Ndërkohë, procedurat kanë avancuar edhe për rikonstruksionin e linjës Vorë–Shkodër–Hani i Hotit, një segment që ka rëndësi strategjike për lidhjen e Shqipërisë me Malin e Zi dhe me rrjetin europian të transportit.
Ministri bëri të ditur se për segmentin Vorë–Shkodër–Hani i Hotit është në procedurë konkurruese, sipas mekanizmave të financuesit ndërkombëtar, me pritje për finalizim të shpejtë të procesit. Përveç kësaj, janë në proces procedurat për rikonstruksionin e segmentit Durrës–Rrogozhinë. Gjithashtu, po hartohet projekti inxhinierik për vazhdimin e linjës nga Rrogozhina deri në Pogradec, duke synuar zgjerimin e mëtejshëm të shërbimit hekurudhor në zona të rëndësishme për transportin dhe zhvillimin ekonomik.
Në kuadër të planifikimit afatgjatë, Karakaçi nënvizoi se ndër projektet strategjike mbetet edhe hekurudha Durrës–Prishtinë, për të cilën po punohet për sigurimin e financimit. Në fund të prezantimit, ministri u kërkoi deputetëve të mbështesin projektligjin, duke e cilësuar atë si një investim strategjik që do ta afrojë Shqipërinë me rrjetin evropian të transportit dhe do të ndikojë në zhvillimin ekonomik të vendit.
Botuar fillimisht në Telegrafi
