Një ish-punonjës i studios së Eminem në SHBA ka pranuar fajësinë në gjykatë pasi akuzohet se ka kopjuar dhe shitur muzikë të papublikuar të reperit pa leje. Joseph Strange, i cili ka punuar për 14 vjet në ambientet e punës së Marshall Mathers, i njohur gjerësisht si Eminem, deklaroi në gjykatën federale në Michigan se e kishte bërë këtë veprim në mënyrë të qëllimshme dhe kundër të drejtës së autorit.
Strange, 48 vjeç, nga Holly, u deklarua fajtor të enjten për shkelje të të drejtave të autorit. Prokuroria amerikane bëri me dije se ai kishte qasje në skedarë muzikorë të mbrojtur me fjalëkalim, të cilët ruanin këngë që ishin ende në proces pune dhe që nuk ishin të destinuara për publikun.
Sipas dokumenteve të gjykatës, Joseph Strange punoi për Eminem nga afërsisht viti 2007 deri në vitin 2021. Gjatë kësaj periudhe, ai ishte pjesë e ekipit që lidhej me mirëmbajtjen teknike të sistemit kompjuterik ku ruhej muzika e reperit. Në atë studio në Ferndale, Strange ndihmoi në ngritjen dhe ruajtjen e infrastrukturës kompjuterike, duke pasur mundësi të aksesonte disqet e forta të mbrojtura.
Këngë të papublikuara u shitën online pa autorizim
Departamenti Amerikan i Drejtësisë pretendon se Strange kopjoi 10 ose më shumë skedarë audio pa autorizim. Midis korrikut dhe gushtit 2024, ai i shiti këto skedarë online për një total prej 50,000 dollarësh (rreth 43,000 euro). Sipas akuzës, shitja u bë pa dijeninë ose miratimin e Eminem, ndërsa më pas materialet e marra përfunduan në internet dhe edhe në platformat e transmetimit.
Të dhënat e ofruara nga shërbimet e transmetimit tregojnë se këto këngë u dëgjuan më shumë se tetë milionë herë deri në nëntor 2025. Prokuroria vlerëson se dëmet nga shkelja e të drejtave të autorit arrijnë të paktën 750,000 dollarë (rreth 645,000 euro). Ndërkohë, Departamenti i Drejtësisë thekson se publikimi komercial i kësaj muzike nuk ishte i autorizuar, edhe pse disa nga këngët dyshohet se ishin përgatitur paraprakisht për publikim, në disa raste edhe me masterizim në studio.
Në deklaratën e tij, ndihmësprokurori i përgjithshëm A. Tysen Duva, nga Divizioni Penal i Departamentit të Drejtësisë, tha se Joseph Strange abuzoi me pozicionin e tij të besimit për të kopjuar dhe shitur në mënyrë të paligjshme muzikë të papublikuar që i përkiste Eminem. Sipas prokurorisë, ai u përfitua financiarisht nga vepra që ende nuk ishin miratuar për publikim.
Agjentja speciale Jennifer Runyan, e cila drejton zyrën e FBI-së në Detroit, theksoi se Detroiti ka qenë gjithmonë një qytet ku lulëzon kreativiteti dhe se askush nuk ka të drejtë të përvetësojë punën e dikujt tjetër ose të përfitojë financiarisht prej saj pa leje. Strange u akuzua fillimisht për shkelje të të drejtave të autorit dhe për transport ndërshtetëror të mallrave të vjedhura në mars të vitit 2025. Akuzat u ngritën pasi më shumë se 25 këngë të papublikuara të Eminem u shfaqën në internet në janar të atij viti.
Dënimi është planifikuar për 27 janar 2027. Joseph Strange përballet me deri në pesë vjet burg, ndërsa masa përfundimtare e dënimit do të përcaktohet nga një gjyqtar federal.
Botuar fillimisht në Telegrafi
