Irani u vu përballë një vendimi të papritur pas ndeshjes së parë në Kupën e Botës, ku u përball me Zelandën e Re. Menjëherë pas takimit, ekipit iranian iu tha të largohej nga SHBA-ja dhe të nisej drejt Meksikës, pa pritur procesin normal të rikuperimit pas lojës. Ngjarja ka ndodhur në orët e para të së martës, sipas kohës në Kosovë, vetëm disa orë pasi skuadra u mbyll me rezultatin 2:2 kundër Zelandës së Re.
Lajmi u bë i ditur nga trajneri i Iranit, Amir Ghalenoei, i cili tha se urdhri për të largohen nga SHBA-ja u dha pak më herët se sa ishte planifikuar. Sipas planit që kishte ekipi, ata do të kalonin natën në Kaliforni për të zhvilluar rikuperimin e zakonshëm pas ndeshjes së parë. Megjithatë, pas përballjes me Zelandën e Re, iranianëve iu kërkua të hipnin menjëherë në aeroplan, me destinacion Tijuanas në Meksikë.
Ghalenoei theksoi se atyre nuk iu dha kohë për të kaluar rikuperimin siç e parashikon rutina. “Ata as nuk na dhanë kohë për rikuperim”, tha trajneri. Më tej, ai shpjegoi se pas përfundimit të ndeshjes, ekipi mori urdhrin që të largohej menjëherë. “Pas ndeshjes na thanë: ‘Duhet të largoheni menjëherë’. Është shumë e rëndësishme për ne që të kemi kohë për rikuperim, por na u kërkua të hipim në aeroplan dhe të kthehemi në bazën tonë. Ne jemi vërtetë të shqetësuar për këtë”.
Udhëtimi i menjëhershëm u ndërpre rikuperimin e planifikuar
Irani zhvilloi ndeshjet e fazës grupore në SHBA, por në kuadër të tensioneve politike, u vendos që skuadra të qëndronte në Meksikë dhe jo brenda territorit amerikan gjatë Kupës së Botës. Kjo bëri që prej kohësh të kishte paqartësi lidhur me faktin nëse Irani do të ishte fare pjesë e kompeticionit. Megjithatë, pavarësisht dilema, skuadra arriti të hapte Kupën e Botës dhe të siguronte një barazim me Zelandën e Re.
Kapiteni i Iranit, Mehdi Taremi, foli gjithashtu për mënyrën se si u zhvilluan procedurat e udhëtimit. Ai tha se ekipi iu nënshtrua udhëtimit dhe kontrolleve të sigurisë prej pesë orësh, në një kohë që normalisht do të ishte një udhëtim shumë më i shkurtër nga Tijuana për në zonën e Los Angelesit. Sipas tij, nuk u kuptua arsyeja e rikthimit të menjëhershëm, pasi procesi duket se u drejtua nga vendime që nuk varen nga ekipi.
“Nuk e dimë pse po na kthejnë. Mendoj se kjo është e çuditshme. Duket sikur të tjerët po bëjnë planin për ne. Vendimet për ne merren diku tjetër”, tha Taremi. Ai shtoi se duhej të kishin ardhur dy netë para ndeshjes dhe se, për rikuperim, ekipi duhej të qëndronte në vend edhe gjatë natës. “Ne duhej të vinim dy netë para ndeshjes dhe duhej të qëndronim sonte për t’u rikuperuar dhe të kthehemi nesër në drekë. Nuk kemi asnjë ide pse po ndodhë kjo. Mendoj se jemi ekipi më i shtypur në Botëror”, vijoi Taremi.
Taremi dhe Ghalenoei ngritën shqetësime edhe për mungesën e disa anëtarëve të rëndësishëm të stafit, të cilëve u ishin refuzuar vizat nga SHBA-ja. Në këtë grup u përfshinë presidenti i federatës, personeli mbështetës për trajnerë si dhe zyrtarët e medias. Sipas tyre, kjo ka sjellë vështirësi shtesë në organizimin e ekipit, teksa përgatitjet për ndeshjet në turne varen edhe nga prania e personelit.
Pas ndeshjes, rreth një orë më vonë, kapiteni u shpreh se largimi i menjëhershëm nga Los Angelesi nuk ishte në rregull. “Mendoj se FIFA duhet të na ndihmojë më shumë se kaq. Çdo gjë është si katastrofë për ne”, tha Taremi. Ekipi gjithashtu ngriti pretendime se nuk kishte pasur përgatitje të duhura për Kupën e Botës. Irani e hapi turneun me një barazim zhgënjyes kundër një ekipi që ishte 65 vende më poshtë në renditjen e FIFA-s, ndërkohë që jashtë stadiumit kishte protestë kundër qeverisë së Iranit.
Botuar fillimisht në Koha.net
