Nënkryetari i Lidhjes Demokratike të Kosovës (LDK), Lutfi Haziri, ka njoftuar se partia ka nisur debatin e brendshëm paszgjedhor. Ai ka mohuar, njëkohësisht, çdo pretendim se LDK ka zhvilluar takime ose ka marrë ftesë nga partitë e tjera politike për formimin e institucioneve.
Sipas Hazirit, ky hap vjen pas mbledhjes së Kryesisë dhe Kolegjiumit të Degëve. Në këto takime, sipas tij, është bërë analizë e rezultateve zgjedhore dhe është vlerësuar pozicioni politik i LDK-së në situatën e krijuar pas procesit zgjedhor. Haziri theksoi se partia do të vazhdojë procesin e diskutimeve brenda organeve të saj dhe se debati nuk është ndalur pas ditës së votimit.
“Ashtu siç paralajmërova, debati i brendshëm i LDK-së në situatën paszgjedhore ka filluar sot. Natyrisht që disa degë dhe kolegë tanë kanë bërë veprime paszgjedhore duke shkaktuar edhe procese, por sot ne në kolegjin e degëve diskutuam, analizuam numrat, vlerësimet e para që dalin nga rezultati zgjedhor. Numrat janë ata që LDK-së i kanë dhënë këtë peshë politike”, ka thënë Haziri.
Ai ka theksuar se LDK-ja hyn në këtë fazë me një grup parlamentar prej 18 deputetësh. Haziri e ka përshkruar këtë si një skenë politike ku partia beson se procesi do të arrihet të përmbyllet pas certifikimit të rezultateve zgjedhore. Në këtë drejtim, ai ka sinjalizuar se të gjitha hapat e mëtejshme lidhen me verifikimin e zyrtarizimit të rezultateve, si dhe me diskutimet që do të zhvillohen brenda strukturave të LDK-së.
LDK vendos brenda organeve, pa ftesa e takime me partitë tjera
Haziri ka ritheksuar edhe qëndrimin e LDK-së lidhur me bashkëpunimin politik. Ai ka deklaruar se partia nuk ka zhvilluar bisedime me asnjë subjekt politik dhe se deri në atë moment nuk ka pasur as ftesë për takim. Sipas tij, pretendimet e tilla hidhen poshtë, duke e lidhur procesin e institucioneve me parime dhe procedura, jo me takime të panjoftuara.
“Më lejoni ta konfirmoj edhe një herë. As nuk kemi pasur ftesë, as nuk i kemi ofruar askujt. Takime nuk ka pasur deri tani që po flasim, sepse nuk ka pasur asnjë ftesë. Edhe ne kemi dalë me parim politik. Kemi thënë që procesi politik kërkon që Kosova të vendosë normalitet dhe stabilitet institucional. Pjesë të tjera janë spekulative, janë konspiracion i Prishtinës. LDK-ja është imune ndaj kësaj, është imune ndaj çdo oferte politike”, ka deklaruar Haziri.
Në vijim, ai ka sqaruar se vendimmarrja për hapat e mëtejmë do të bëhet në organet përkatëse të partisë. Haziri ka theksuar se grupi parlamentar do të ketë rol vendimtar në këtë proces, duke iu referuar mandatit dhe peshës politike që, sipas tij, e mbartin deputetët. Ai ka thënë se LDK-ja nuk e sheh procesin në mënyrë të thjeshtuar “bardh e zi”, por e trajton si pjesë të një debati të brendshëm që vazhdon hap pas hapi, me mbylljen e një organi dhe me vijimin përmes organeve të tjera.
Haziri ka përmendur gjithashtu nevojën për konsensus të gjerë politik. Ai ka nënvizuar se lidershipi i partisë është vendimmarrës, ndërsa deputetët e grupit parlamentar, siç ka thënë, mbajnë sovranitetin qytetar. Sipas tij, janë 18 deputetë që në fund do të kenë fjalën, peshën dhe rolin e tyre në drejtimin e procesit. Në të njëjtën linjë, Haziri ka vënë theksin te synimi i partisë për ta bërë LDK-në më të fortë, më unike dhe më të fuqishme, duke e lidhur këtë me vijimin e punës brenda mekanizmave të saj të brendshëm.
Botuar fillimisht në Koha.net
