Kryetari i Partisë Demokratike të Kosovës, Bedri Hamza, ka reaguar ndaj kryeministrit në detyrë, Albin Kurti, duke e akuzuar atë se po e mban peng shtetin dhe se nuk po respekton Kushtetutën. Hamza tha se Vetëvendosje ka kaluar një kufi kushtetues, pasi nuk e ka konstituuar Kuvendin brenda afatit të parashikuar me Kushtetutë. Sipas tij, pa u kthyer procesi në binarët kushtetues, nuk mund të hapen tema të tjera të mëdha shtetërore.
Hamza e bëri këtë deklaratë në sallën e Kuvendit, në prani të deputetëve të PDK-së dhe Aleancës. Ai theksoi se çështja tashmë nuk është vetëm krizë politike, por edhe krizë kushtetuese dhe institucionale. Sipas tij, vendi po përballet me pasiguri të brendshme për shkak të mosngritjes së institucioneve në mënyrën dhe brenda afateve që përcakton Kushtetuta.
Ai argumentoi se afati për konstituimin e Kuvendit nuk është vendosur nga opozita, por nga vetë Kushtetuta. Hamza tha se kjo ka qenë shkelje e qartë, që sipas tij është bërë qëllimisht nga Vetëvendosje dhe nga figurat brenda qeverisjes. Ai përmendi edhe emra, duke u shprehur se Kurti, si dhe persona si Haxhiu dhe Dehari, e kanë kaluar atë kufi që, sipas tij, nuk duhej të kalohej.
Hamza tha se mungesa e një Kuvendi të konstituar dhe e një Qeverie me mandat të ri ka sjellë pasiguri institucionale. Në këtë kuadër, ai argumentoi se institucionet po funksionojnë në terren, por në kushte të pasigurta, me shkelje të Kushtetutës. Sipas tij, përgjegjësia politike po shtyhet vazhdimisht nga dita në ditë, gjë që ai e konsideroi të papranueshme.
Pa u kthyer në binarët kushtetues, s’ka tema të tjera madhore
Një pjesë e deklaratës së Hamzës u përqendrua te roli i Kushtetutës dhe kufizimet që, sipas tij, nuk mund të tejkalohen nga asnjë lider politik. Ai tha se asnjë lider nuk ka të drejtë të interpretojë Kushtetutën sipas interesit të partisë së tij. “Shteti nuk është Albin Kurti, por Kushtetuta”, theksoi Hamza, duke e vënë theksin te institucionet dhe tek fakti se kufijtë kushtetues nuk i tejkalon askush.
Hamza paralajmëroi edhe një rrezik tjetër, që sipas tij është më i madhi: krijimi i një precedenti për shkelje të Kushtetutës. Ai tha se, në vend që të trajtohet si shkelje, praktika e tillë po kthehet në normë dhe po u shitet qytetarëve si diçka “normale”. PDK-ja, sipas qëndrimit të Hamzës, e refuzon këtë mënyrë veprimi dhe e lidh këtë refuzim me idenë se mbi Kushtetutën nuk ka mandat politik, ndërsa theksoi se partitë vijnë e shkojnë, por Republika duhet të mbetet.
Pas qëndrimit në sallën e Kuvendit, Hamza doli në konferencë ku u ndal edhe te një zhvillim politik më i gjerë. Ai tha se “pas qëndrimit të fundi të LDK-së, rruga është e hapur” për formimin e institucioneve. Në të njëjtën konferencë, ai deklaroi se “i kanë numrat, i kanë votat”, duke e lidhur këtë me mundësinë e krijimit të institucioneve. Megjithatë, Hamza e mbajti të qartë se kushti i parë, sipas tij, është kthimi i procesit në rendin kushtetues.
Në përfundim të deklaratës së tij në Kuvend, Hamza i bëri thirrje Kurtit të reflektojë dhe ta kthejë procesin në “binarët kushtetues”. Ai tha se këtë e konsideron të nevojshme edhe që të mund të hapen çështje të tjera shtetërore. “Pa u kthyer rendi kushtetues, me ne nuk mund të flitet”, theksoi ai, duke shtuar se përderisa Kurti nuk e reflekton dhe nuk e kthen procesin në binarët kushtetues, sipas Hamzës, ai nuk ka kredibilitet të hapë tema të tjera madhore shtetërore.
Botuar fillimisht në Koha.net
