Gwyneth Paltrow ka rrëfyer se si ka lindur shprehja “ndarje e ndërgjegjshme” (conscious uncoupling) dhe çfarë qëndron pas vendimit të saj e të Chris Martin për t’i dhënë fund martesës, pa prishur lidhjen si familje. Aktorja, e cila sot është e martuar me Brad Falchuk, ka shpjeguar se ky emërtim nuk ishte thjesht një frazë e gjetur rastësisht, por rezultat i një pune të ndërgjegjshme për të menaxhuar tranzicionin nga martesa te bashkëprindërimi.
Sipas tregimit të saj, “conscious uncoupling” u lidh drejtpërdrejt me dëshirën për të mbetur të orientuar drejt familjes edhe pas divorcit. Paltrow dhe frontmeni i Coldplay, Chris Martin, morën shumë vëmendje në vitin 2014 kur njoftuan se martesa e tyre po merrte fund, duke përdorur pikërisht këtë koncept. Çifti kanë dy fëmijë së bashku: Apple, 22 vjeç, dhe Moses, 20 vjeç.
Aktroja 53-vjeçare ka treguar se gjatë periudhës kur po shqyrtonin mundësinë e ndryshimit të jetës në çift, ata u përpoqën të kuptonin “a ka ndonjë mënyrë” që ta bënin procesin më të lehtë, jo vetëm për veten e tyre, por kryesisht për fëmijët. Ajo tha se u ulën për të biseduar vërtet dhe se i drejtohej rrethit të saj të miqve që kishin përjetuar divorc.
“Conscious uncoupling”: si e kthyen divorcin në bashkëprindërim
Në rrëfimin e saj, Paltrow shpjegoi se kishte folur me miq që vinin nga familje të divorcuara dhe u kishte bërë pyetje të drejtpërdrejta. Ajo tregoi se u kërkonte atyre të ndanin përvojën: “Më tregoni, cila ishte gjëja më e keqe? Për çfarë mendoni se keni ende pasoja edhe sot?”. Kjo mënyrë për të marrë informacion nga njerëz që kishin kaluar të njëjtën situatë, i dha asaj një këndvështrim më të qartë mbi atë që mund të shkaktonte vështirësi afatgjata.
Ajo u befasua kur kuptoi se dhimbja më e madhe nuk lidhej domosdoshmërisht me vetë divorcin si ngjarje, por me tensionet e vazhdueshme mes prindërve. Sipas saj, problemet mund të vazhdonin për vite, edhe kur ngjarja kryesore tashmë kishte ndodhur. Pikërisht për këtë arsye, ideja e tyre u përqendrua në uljen e përplasjeve dhe në mbajtjen e një atmosfere ku fëmijët të mos ndiheshin të ndarë në mënyrë të vazhdueshme.
Gwyneth Paltrow ka theksuar gjithashtu synimin për të krijuar një situatë ku, edhe pas momenteve të rëndësishme të jetës, të dy prindërit të vazhdonin të bashkëpunonin si “familje” në kuptimin praktik. Ajo shpjegoi se donte që fëmijët të rriteshin në një mjedis ku të hanin darkë në të njëjtën tryezë, pavarësisht se çifti nuk ishin më çift. Për të arritur këtë, Paltrow dhe Chris Martin vendosën të konsultoheshin me një terapist.
Aktorja rrëfeu se ata kishin një terapist “vërtet të jashtëzakonshëm”, i cili i prezantoi me konceptin dhe mënyrën sesi të vepronin. Sipas saj, ata morën përsipër angazhimin për t’i vendosur fëmijët në plan të parë. “Chris dhe unë kishim një terapist që ishte vërtet i jashtëzakonshëm. Ai na prezantoi me këtë koncept dhe ne morëm përsipër angazhimin që t’i vendosnim fëmijët në plan të parë. Dhe kjo nënkuptonte të mbeteshim familje, edhe pse nuk ishim më çift”, tha ajo.
Megjithatë, Paltrow pranoi se rruga drejt një bashkëpunimi të qetë nuk ishte gjithmonë pa vështirësi. Kur familja u largua nga Londra për në Los Angeles, ata u angazhuan të hanin mëngjesin e vonë së bashku çdo të diel. Ajo kujtoi edhe një moment kur u afruan të humbnin kontrollin e situatës dhe kur tensioni mund të kishte sjellë një reagim që do të prishte frymën e marrëveshjes. “Gjërat po tensionoheshin dhe ne shikuam njëri-tjetrin, dolëm në verandën përpara dhe thamë: ‘Le të mos e bëjmë. Thjesht, le të mos e bëjmë.’ Pastaj u përqafuam dhe thamë: ‘Në rregull’, i dhamë njëri-tjetrit një përplasje grushtesh dhe shkuam për mëngjes”, tha ajo. Kjo, sipas rrëfimit të Paltrow, ishte një mënyrë për t’u rikthyer shpejt te vendimi i përbashkët.
Botuar fillimisht në Koha.net