Projekti i Federatës së Futbollit për ndërtimin e dy fushave moderne në Luginën e Preshevës ka marrë mbështetje nga drejtuesit vendorë, trajnerët dhe vetë futbollistët e rinj. Nisma synon përmirësimin e kushteve për stërvitje dhe krijimin e hapësirave të përshtatshme për zhvillimin e futbollit të moshave, në dy komuna të rajonit.
Sipas planifikimit, fusha e parë do të ndërtohet në Zhunicë, në Komunën e Preshevës, ndërsa fusha e dytë në Komunën e Bujanocit. Drejtues të institucioneve lokale dhe aktorë të komunitetit sportiv kanë vlerësuar se ky investim sjell një ndryshim real në infrastrukturë, por edhe në mënyrën si fëmijët dhe të rinjtë mund të ushtrohen gjatë gjithë vitit.
Kryetarja e Komunës së Preshevës, Ardita Sinani, e cilësoi projektin si një investim që i jep shpresë të ardhmes. Ajo theksoi se ka investime që ndërtojnë vetëm infrastrukturë, ndërsa ka edhe të tjera që ndikojnë drejtpërdrejt në motivimin dhe perspektivën e të rinjve. Sinani falënderoi Presidentin e FSHF-së, Armand Duka, për mbështetjen e vazhdueshme, duke nënvizuar se nisma lidhet me ndërtimin e dy fushave, njëra në Zhunicë dhe tjetra në Bujanoc.
Fushat e reja hapin rrugë për zhvillim të futbollit të moshave
Trajnerët që punojnë me skuadra dhe kategori të ndryshme moshe vlerësojnë se mungesa e terreneve adekuate ka qenë një sfidë e vazhdueshme. Trajneri Besim Nasufi theksoi se zhvillimi i infrastrukturës është vendimtar si për klubet, ashtu edhe për shkollat e futbollit në Preshevë. Ai u shpreh se gjatë takimit të parë me Presidentin e FSHF-së, Armand Duka, ka ndjerë entuziazëm të madh për realizimin e fushave.
Nasufi shtoi se, teksa u realizua takimi edhe me fëmijët, u pa nga afër se fusha mungonte dhe se premtimi për ndërtimin e një stadiumi në Luginën e Preshevës u bë një drejtim konkret. Sipas tij, rëndësia e projektit qëndron edhe në faktin se në Preshevë luajnë dy klube sportive dhe funksionojnë katër shkolla të futbollit. Me ndërtimin e stadiumit dhe fushave të reja, fëmijët do të kenë mundësi të stërviten dhe të luajnë në një mjedis të ri, të investuar nga FSHF-ja.
Edhe trajneri Driton Aliu vlerësoi ndikimin që projekti do të ketë në stërvitjen dhe zhvillimin e talenteve të reja. Ai tha se ndihet krenar dhe i lumtur për një nismë të tillë, sidomos për nxënësit dhe rininë që merren me futboll. Sipas Aliut, projekti do të lehtësojë punën e trajnerëve gjatë stërvitjeve dhe do të ndihmojë në nxjerrjen e talenteve të reja, duke i dhënë futbollit të moshave kushte më të mira për t’u zhvilluar.
Entuziazmin e shprehin edhe futbollistët e rinj, të cilët presin të kenë kushte më të mira për ushtrime dhe aktivitete sportive. Diar Zeqiri tha se për të një fushë e re është një ndjenjë e mirë, pasi deri më tani nuk kanë pasur shumë kushte. Ai falënderoi FSHF-në për mundësinë që po u krijon fushat e reja për të luajtur më shumë dhe për të zhvilluar aktivitete të ndryshme, duke përfshirë stërvitjet. Po ashtu, Bleron Aliu u shpreh se familjarët dhe sportdashësit po presin përmirësim real, pasi deri tani mungonin kushtet, ndërsa tani do të kenë mundësi të stërviten dhe të ushtrojnë sport në mënyrë më të organizuar.
Federata e Futbollit vijon gjithashtu të bëjë ftesë për bizneset dhe donatorët që dëshirojnë të kontribuojnë në realizimin e kësaj nisme. Qëllimi është mbështetja e fëmijëve dhe të rinjve shqiptarë në Luginën e Preshevës, përmes përmirësimit të infrastrukturës sportive dhe krijimit të kushteve që lidhen drejtpërdrejt me zhvillimin e futbollit të moshave.
Botuar fillimisht në Sport Ekspres
