Duka: Shqipëria në Ligën B, synojmë EURO 2028

Presidenti i Federatës Shqiptare të Futbollit, Armand Duka, ka folur për ecurinë e Kombëtares në Ligën e Kombeve, rikthimin në Ligën B dhe objektivat për eliminatoret e EURO 2028. Në një intervistë për median kosovare “Telegrafi”, Duka ka theksuar se Shqipëria ka arritur objektivin në Grupin C, duke u renditur e para.

Ai ka nisur me vlerësimin e dominimit të kuqezinjve në Grupin C. Duka tha se është i kënaqur që skuadra u rendit e para dhe përmbushi pikërisht atë që kishte vendosur si synim. Sipas tij, pavarësisht se Shqipëria ishte favorit, gjithçka duhej dëshmuar në fushë, duke merituar çdo fitore. Megjithatë, presidenti i FSHF-së u shpreh edhe se vendi i parë nuk do të thotë se gjithçka ishte perfekte, pasi, duke pasur parasysh nivelin e kundërshtarëve, do të kishte dashur që ky edicion të shërbente edhe për dhënien e më shumë hapësirës për futbollistët e rinj.

Një nga çështjet kryesore që Duka adresoi lidhet me kuptimin që ka rikthimi në Ligën B. Ai u shpreh se, për të, Shqipëria “e ka vendin në Ligën B” dhe se duhet të ketë ambicie të luftojë për Ligën A. Sipas tij, zbritja në edicionin e kaluar ishte e dhimbshme, në një grup ku deri në fund skuadra ishte në garë për të gjitha objektivat. Duka veçoi veçanërisht “ato 45 minuta të këqija” kundër Ukrainës, të cilat, sipas tij, krijuan një kosto të drejtpërdrejtë në ecurinë e atëhershme.

Ndërsa i pyetur për mundësinë e një vendi në play-off për EURO 2028, Duka bëri një dallim të qartë mes dy rrugëve. Ai tha se play-off-i është një mundësi me vlerë, por nuk dëshiron që objektivi të ndërtohet rreth saj. Në qendër, sipas tij, duhet të jetë kualifikimi përmes eliminatoreve. Presidenti i FSHF-së theksoi besimin te skuadra, me idenë që përgatitja të bëhet me ambicie, në momentin kur të dihen kundërshtarët pas shortit. “Le të presim shortin dhe të përgatitemi për ta arritur”, u shpreh ai, duke e lidhur këtë me një qasje serioze dhe të vazhdueshme.

Shqipëria e synon EURO 2028: eliminatoret janë rruga kryesore

Armand Duka foli edhe për besimin që ka te ky ekip, duke u ndalur te përbërja e tij. Ai tha se Shqipëria ka futbollistë me cilësi, përvojë ndërkombëtare dhe lojtarë të rinj që mund t’i japin skuadrës më shumë në të ardhmen. Sipas tij, Kombëtarja ka kapacitetet për të luftuar për një tjetër kualifikim, por kjo kërkon t’i shprehë ato aftësi me vazhdimësi në fushë. Në këtë kontekst, presidenti theksoi një parim të qartë: askush nuk të shtron “tapetin e kuq” për në Evropian, ndaj duhet djersë, luftë për çdo pikë dhe besim deri në fund.

Duke iu kthyer shortit, Duka theksoi se është e rëndësishme të dihen kundërshtarët dhe të bëhet përgatitja me seriozitet. Ai shtoi se nuk ka kundërshtarë që mund të merren lehtë dhe as kualifikim që vjen thjesht nga emrat që ke në skuadër. Më pas, ai u ndal edhe te skenari kur Kosova siguron një vend në vazon e dytë dhe mund të vijë përballja mes dy përfaqësueseve. Duka tha se dëshira e tij është që të dy kombëtaret të kenë sukses dhe se do të preferonte që të mos ishin në të njëjtin grup, për të mos ia vështirësuar rrugën njëra-tjetrës drejt Evropianit. Në rast se shorti i vendos në të njëjtin grup, ai nënvizoi se të dyja do të luajnë dhe secila do të bëjë më të mirën për të fituar, me respekt të plotë.

Në pyetjen për qëndrimin e tij të pandryshuar në mbështetje të Kosovës, Armand Duka tha se nuk ka ndryshuar dhe se nuk ka për të ndryshuar. Ai rikujtoi se mbështetja është dëshmuar me punë dhe angazhim konkret, sidomos në momentet kur futbolli i Kosovës kishte nevojë për mbështetje. Presidenti theksoi se ky angazhim nuk është varur nga marrëdhënia me një president apo trajner dhe as nga zgjedhja e një futbollisti. Ai tha se i vjen keq kur përpjekjet dhe lobimi për pranimin e Kosovës në futbollin ndërkombëtar reduktohen në disa deklarata publike, duke e parë këtë si çështje që duhet të trajtohet me përgjegjësi. Duka theksoi edhe besimin e tij se futbollistët shqiptarë, kudo që jetojnë, duhet t’i kenë dyert e hapura, duke e lidhur këtë me logjikën e mundësive që kanë lojtarët, përfshirë edhe rastet si ai i përmendur për Enis Rexhepin. Për Yll Gashin, ai theksoi qëndrimin e tij me mesazhin “Nëse jo te Shqipëria, shko te Kosova”, duke lënë të kuptohet se linja e mbështetjes mbetet e njëjtë.

Botuar fillimisht në Sport Ekspres

Exit mobile version