Presidenti i Federatës Shqiptare të Futbollit, Armand Duka, zhvilloi një takim me arbitrat dhe asistentët e Kategorisë së Parë. Takimi u zhvillua në kuadër të përgatitjeve për sezonin e ri dhe kishte në qendër përcjelljen e disa mesazheve të qarta mbi përgjegjësinë, standardet dhe profesionalizmin që duhet të shoqërojnë çdo ndeshje.
Në këtë aktivitet ishin të pranishëm edhe Drejtori i Departamentit të Arbitrimit në FSHF, Bernardino González Vázquez, si dhe kryetari i Bashkimit të Arbitrave Shqiptarë të Futbollit, Tahir Kastrati. Prania e tyre synonte të krijonte një bashkëpunim më të mirë mes strukturave drejtuese të arbitrimit dhe vetë trupës së arbitrave që do të gjykojnë në fushë.
Gjatë fjalës së tij, Armand Duka nënvizoi rolin qendror të arbitrit në zhvillimin e lojës. Ai theksoi se arbitri mban përgjegjësi për mbarëvajtjen e ndeshjes dhe për respektimin e rregullave, ndërsa të gjithë elementët e tjerë janë aty për të ndihmuar arbitrin kryesor. Sipas tij, të gjithë duhet të kuptojnë se çfarë nënkupton realisht drejtimi i një takimi dhe detyrimi që vjen bashkë me të.
“Unë nuk marr përsipër të bëj leksione teknike se si arbitrohet, por të paktën një gjë e di dhe duhet ta dinë dhe të bindemi të gjithë, ai që komandon lojën është arbitri në fushë. Përgjegjësinë për çdo gabim që ndodh e ka arbitri në fushë. Të gjithë të tjerët janë aksesorë për ta ndihmuar arbitrin kryesor”, – tha Presidenti Duka.
Më tej, kreu i FSHF iu drejtua edhe çështjes së mentalitetit dhe angazhimit të arbitrave, pavarësisht se në cilën kategori gjykojnë. Ai e lidh këtë me faktin se ndeshja ka gjithmonë të njëjtën peshë: “Nuk ka lidhje se në cilën kategori arbitroni, ndesja është ndeshje, është përballje, është garë, është edukim, si në kategorinë superiore, si në nivelin amator, ti duhet të bësh maksimumin”, – u shpreh ai.
Standard i njëjtë në çdo ndeshje: rregulla, përgjegjësi, ekip
Presidenti Duka vijoi duke folur për rëndësinë e njohjes dhe zbatimit korrekt të rregullave të reja. Duke qenë se kampionati ka hyrë në një fazë të re, ai kërkoi që arbitrave të mos u nënvlerësohen rregullat që janë futur, por të respektohen dhe të mësohen nga të gjithë. Sipas tij, një rregull i parespektuar është më i keq se një rregull i pa vënë, ndërsa paralajmëroi që kontrolli duhet të jetë i plotë që nga momenti i zbatimit të tyre në terren.
Duka theksoi edhe nevojën që e gjithë trupa e arbitrimit të funksionojë si një skuadër. Ai e krahasoi këtë me mënyrën si funksionojnë skuadrat e futbollit: nëse nuk veprohet si një njësi e koordinuar, arritja e suksesit bëhet shumë e vështirë. “Sukseset e Benardinos varen gjithmonë nga dëshira dhe mbështetja. Në radhë të parë e Komitetit të Arbitrimit, në radhë të dytë nga juve arbitrat, e gjithë trupa e arbitrimit në futbollin shqiptar. Në fund të fundit edhe kjo është një skuadër, njësoj si skuadrat e futbollit, nëse nuk funksionon si një skuadër, suksesi është shumë i vështirë për t’u arritur, pothuajse i pamundur”, – u shpreh ai.
Në vijim, Presidenti Duka tha se standardet dhe përgjegjësia duhet të jenë të njëjta në çdo kategori. Ai paralajmëroi gjithashtu se shkeljet disiplinore do të trajtohen në përputhje me rregulloret përkatëse. “Dënime publike nuk do të ketë për arsye teknike, përveç atyre disiplinore siç e parashikon rregullorja, por ama pezullime afatgjatë apo përgjithmonë padyshim do të ketë, sepse ai që e bën nuk ka pse ta vuajnë të gjithë”, – tha kreu i FSHF. Në fund, ai uroi që të ketë një edicion sa më të mbarë, me lojëra të bukura, spektakël dhe sa më pak gabime.
Botuar fillimisht në Sport Ekspres