Një dëmtim i kabllos me fibër optike ka shkaktuar vonesa të konsiderueshme në disa nga aeroportet më të mëdha në verilindje të Shteteve të Bashkuara të Amerikës. Ngjarja lidhet me një incident teknik gjatë punimeve në terren, ku një kabllo e telekomunikacionit është prekur nga aktivitetet e ndërtimtarisë në afërsi të një linje hekurudhore të Amtrak.
Sipas informacioneve të bëra publike, vonesat janë regjistruar në pesë aeroporte kyçe: Newark Liberty International, Teterboro, Philadelphia International, LaGuardia dhe John F. Kennedy International. Këto ndërprerje të trafikut ajror vijnë në një moment të ndjeshëm, ndërkohë që qindra diplomatë dhe liderë botërorë po mblidhen në selinë e Kombeve të Bashkuara në New York për Asamblenë e Përgjithshme, e cila fillon të martën.
Problemi nisi kur punonjësit e ndërtimtarisë, gjatë punimeve në një zonë të caktuar, gërmuan dhe dëmtuan një kabllo me fibër optike. Verizon ka njoftuar se kablloja e saj kalon pranë një linje hekurudhore të Amtrak në New Jersey dhe se kontraktorët e ndërtimtarisë ishin ata që shkaktuan dëmin. Kompania e telekomunikacionit theksoi se nuk ka përgjegjësi për incidentin, ndërsa u shpreh se po punon aktivisht, së bashku me partnerët e saj, për ta riparuar kabllon dhe për të rikthyer lidhjen sa më shpejt të jetë e mundur.
Incidenti me kabllon me fibër optike rrit vonesat në aeroportet e SHBA
Ndërkohë, situata në ajër u përkeqësua edhe për shkak të masave operacionale të autoritetit federal. Agjencia Federale e Aviacionit (FAA) ka vendosur të ndalohen fluturimet dhe ka shkaktuar vonesa në aeroporte, “për shkak të problemeve me Philadelphia TRACON”. Ky strukturë është pjesë e sistemeve të menaxhimit të trafikut ajror dhe integron kontrollin e afrimit me radar, si dhe operacionet e kontrollit të trafikut ajror në zonë.
FAA njoftoi se mbërritjet në Aeroportin e Philadelphias rifilluan në kapacitet të kufizuar. Po sipas të dhënave nga zyrtarët, fluturimet po rifillojnë edhe në LaGuardia. Pavarësisht rifillimit të pjesshëm të operacioneve, autoriteti nuk publikoi një afat kohor se kur pritet të rikthehen kushtet normale. Kjo e bën të vështirë planifikimin për pasagjerët dhe linjat ajrore, sidomos në një periudhë kur qyteti pret një prani të madhe ndërkombëtare për Asamblenë e Përgjithshme të OKB-së.
Rastet e problemeve lidhur me Philadelphia TRACON nuk janë të para. Në majin e kaluar, Philadelphia TRACON Area C përjetoi një ndërprerje të komunikimit radiofonik që zgjati rreth dy sekondash. Incidenti ndodhi disa ditë pasi një tjetër ndërprerje kishte çuar në ndalimin e fluturimeve në tokë për fluturimet që shkonin drejt Newark-ut. Këto episode tregojnë se sistemi ka pasur vështirësi edhe më herët, duke krijuar ndikim të drejtpërdrejtë në menaxhimin e lëvizjes ajrore.
Ndërsa riparimi i kabllos së dëmtuar vijon, autoritetet e aviacionit dhe operatorët e aeroportit po punojnë për të ulur efektet e ndërprerjes në oraret e fluturimeve. Në horizont mbetet edhe çështja e modernizimit të infrastrukturës, e lidhur me nevojën për fonde shtesë për të parandaluar ndërprerjet e tilla në të ardhmen. Sekretari i Transportit, Sean Duffy, ka shkruar në X se incidenti nënvizon rëndësinë e investimeve për modernizimin e infrastrukturës së vjetëruar dhe për reduktimin e rrezikut të ndërprerjeve.
Botuar fillimisht në Koha.net
