Deputetja e Partisë Demokratike të Kosovës (PDK), Vlora Çitaku, ka reaguar pas përplasjeve dhe ndarjeve që, sipas saj, po ushqehen mbi baza fetare. Përmes një postimi publik, ajo i ka bërë thirrje qytetarëve që të ndalen përpara se të shkruajnë, të sulmojnë apo t’i trajtojnë të tjerët si armik vetëm për shkak të besimit.
Çitaku ka kërkuar që të mos lejohet që shqiptarët ta shohin njëri-tjetrin si kundërshtarë për çështje feje. Ajo ka theksuar se duhet menduar para se të përfshihen në sharje, akuza apo komente që nxisin urrejtje. Në reagimin e saj, deputetja shkruan: “Aman, ndalnu pak. Ndalnu veç një minutë. Para se me shkru. Para se me sha. Para se me e pa tjetrin si armik. Mendoni. Kush na don të ndamë? Kush na don të përçamë? Kush fiton kur shqiptari e sheh shqiptarin si armik për shkak të fesë?”
Në vijim, Çitaku ka rikujtuar se shqiptarët kanë kaluar periudha të vështira së bashku dhe se nuk duhet të bien në grackën e përçarjes. Sipas saj, shoqëria kosovare nuk duhet ta lejojë që tensionet dhe urrejtjet e jashtme të barten brenda saj, duke e shndërruar dallimin fetar në shkak për përballje mes njerëzve që ndajnë të njëjtin atdhe.
Feja nuk duhet të bëhet shkak për përçarje mes shqiptarëve
Deputetja e PDK-së ka sjellë edhe thënien e njohur të Rilindjes Kombëtare, “Feja e shqiptarit është shqiptaria”. Në këtë mënyrë, ajo ka përforcuar idenë se identiteti kombëtar nuk duhet të cënohet nga konfliktet që lindin mes grupeve fetare. Çitaku ka argumentuar se konflikti i dikujt tjetër nuk duhet të kthehet në betejë që zhvillohet brenda shtëpisë kosovare, ndërsa urrejtjet nuk duhet të përdoren si armë për të dobësuar unitetin.
Ajo ka përmendur edhe porosinë “Kosova si Kandahar” dhe rastin Sheholli, ku theksohet se ndarja dhe manipulimi nuk kanë vend në hapësirat tona. Në reagimin e saj, Çitaku referon deklaratën publike të Myftiut Naim Tërnava “Mos u bëni mashë në beteja që nuk janë tonat. Mos i sillni luftërat e të tjerëve në shtëpitë tona. Mos lejoni që urrejtja e dikujt tjetër të bëhet urrejtja jonë”, duke e përdorur këtë si shembull të drejtpërdrejtë të thirrjes për të mos u përfshirë në konflikte që nuk i përkasin realitetit tonë.
Sipas Çitakut, katolikët, myslimanët, besimtarët dhe ateistët kanë jetuar bashkë dhe kanë përballuar së bashku momentet më të vështira. Ajo ka shkruar se në ditët më sfiduese nuk është pyetur njëri-tjetri vetëm për mënyrën e lutjes ndaj Zotit, apo nëse beson apo jo. Përkundrazi, sipas saj, është pyetur vetëm diçka më thelbësore: “A je me mua? A je për liri? A je për Kosovën?” dhe në këtë drejtim, Çitaku thotë se kanë qenë bashkë.
Në fund të reagimit, deputetja ka bërë thirrje për ruajtjen e bashkëjetesës dhe unitetit. Ajo ka nënvizuar se dallimet fetare nuk duhet të kthehen në burim përçarjeje, ndërsa njerëzit duhet të kujtojnë të shkuarën e përbashkët. Çitaku përmbyll me mesazhin se “kemi varre të përbashkëta, kemi dhimbje të përbashkëta, kemi fitore të përbashkëta dhe kemi një atdhe të përbashkët”, duke kërkuar: “Aman, ruajeni”.
Botuar fillimisht në Telegrafi
