Si ta mbroni sa më mirë brendësinë e veturës nga rrezet e forta të diellit është një dilemë që përsëritet çdo verë. Kur makina qëndron e palëvizur në parking të hapur, temperatura brenda kabinës rritet shpejt dhe mund të bëhet shumë e lartë edhe nëse jeni larg saj vetëm pak orë. Për të kuptuar se cilat masa funksionojnë më mirë, Klubi gjerman i automobilizmit ADAC zhvilloi një test me vetura identike.
ADAC mori shtatë automjete të njëjta Dacia Duster dhe i krahasoi për efektin që kanë mbrojtjet e ndryshme ndaj nxehtësisë. Në test u përfshi edhe një shembull standard, pa asnjë pajisje shtesë për mbrojtje nga dielli. Më pas, disa automjete u pajisën me zgjidhje të ndryshme që synonin të ulnin temperaturën brenda kabinës pas qëndrimit nën diell.
Në provë u fut një automjet me xhama të errësuar, një tjetër me ngjyrë të bardhë të karrocerisë dhe një me ngjyrë të zezë. Këto konfigurime u testuan pas më shumë se katër orësh qëndrimi nën diell të fortë, kohë gjatë së cilës u mat temperatura brenda kabinës. Matjet treguan qartë se kur nuk përdoret asnjë mbrojtje, makina nxehet shumë më shpejt.
Për automjetin pa asnjë mbrojtje shtesë, temperatura në vendin e shoferit arriti në 53 gradë Celsius. Në anën tjetër, rezultati më i ulët u regjistrua tek automjeti i mbuluar me mbulesë të jashtme (ceradë), ku temperatura ra në rreth 43 gradë Celsius. Diferenca ishte rreth 10 gradë më pak krahasuar me rastin pa pajisje shtesë, duke e bërë mbulesën e jashtme një nga masat më efektive.
Edhe automjeti i pajisur me folie mbrojtëse të jashtme kundër diellit u tregua dukshëm më i freskët, me temperaturë rreth 45 gradë Celsius. Ndërkohë, mbrojtësi reflektues i diellit i vendosur nga brenda, në xhamin e përparmë, uli temperaturën vetëm në rreth 49 gradë Celsius. Një mbulesë e bardhë mbi panelin e instrumenteve solli temperaturë rreth 50 gradë, duke treguar se këto zgjidhje ishin më pak të suksesshme se mbulimi i jashtëm.
Rezultate të ngjashme u panë edhe kur u testua errësimi i xhamave të pasmë. Ky opsion solli vetëm një ulje prej rreth dy gradësh në temperaturën e përgjithshme të kabinës. Ndërsa temperatura në ulëset e pasme u mat 48 gradë Celsius, krahasuar me 57 gradë në automjetin pa pajisje mbrojtëse. Pra, errësimi i xhamave të pasmë nuk mjaftoi për të ndalur rritjen e nxehtësisë në mënyrë domethënëse, sidomos kur makina nuk kishte mbrojtje të tjera.
Mbulimi i jashtëm dhe ngjyrat e çelëta ulin më shumë temperaturat
Në përgjithësi, ADAC rekomandon përdorimin e mbrojtësve nga dielli, pasi ato ndihmojnë në uljen e temperaturës së sipërfaqeve brenda veturës. Gjatë testimit, timonët dhe panelet e kontrollit arritën temperatura deri në 70 gradë Celsius, duke e bërë të qartë se nxehtësia prek jo vetëm kabinën, por edhe elementë kyç që preken shpesh nga shoferi.
Testi tregoi gjithashtu se ngjyra e karrocerisë ka ndikim të madh. Në sipërfaqen e jashtme u vunë re dallime të qarta: automjeti i zi arriti rreth 65 gradë Celsius, ndërsa ai i bardhë rreth 44 gradë. Edhe brenda kabinës, ndryshimi vazhdoi të ishte i dukshëm. Dacia Duster me karroceri të zezë u nxeh të paktën 5 gradë më shumë se automjeti me ngjyrë të bardhë. Përfundimi i testit ishte i qartë: mbulimi i jashtëm dhe ngjyrat e çelëta rezultuan ndër mënyrat më efektive për të reduktuar nxehjen e veturës gjatë ditëve të nxehta të verës.
Botuar fillimisht në Telegrafi