Bilbao i Spanjës u përfshi mbrëmjen e së hënës nga incidente të rënda dhe përplasje me policinë, pas anulimit të një aktiviteti të planifikuar nga aktivisti i ekstremit të djathtë Vito Quiles. Sipas raportimeve të mediave spanjolle, situata degjeneroi në disa zona të qytetit, ku grupe personash të maskuar krijuan barrikada dhe nisën akte vandalizmi.
Trazirat u shtrinë në disa pjesë të Bilbaos, me makina të djegura dhe kazanë mbeturinash që u vunë flakën. Përplasjet me forcat e rendit sollën ndërhyrje të vazhdueshme nga policia, ndërsa zjarrfikësit u angazhuan për të shuar disa vatra zjarri. Në paralel, policia baske, Ertzaintza, vijoi operacionet për identifikimin dhe arrestimin e personave të përfshirë në ngjarje.
Rreth orës 18:30 tensionet u përshkallëzuan sidomos në zonën e Deustos, pranë universitetit me të njëjtin emër, ku gjatë ditës ishin zhvilluar protesta kundër vizitës së Quiles. Brenda pak minutash situata u përkeqësua: grupet me fytyra të mbuluara u panë duke zhvendosur kazanët e mbeturinave për të bllokuar rrugët, ndërsa u vunë flakën automjeteve të parkuara. Një motoçikletë e Policisë Bashkiake të Bilbaos u përfshi gjithashtu nga flakët, pasi u përdor si pengesë rrugore.
Zjarre dhe akte vandalizmi u raportuan edhe në pjesë të tjera të qytetit, përfshirë hapësirat përreth kullës Iberdrola, në anën tjetër të lumit. Në disa raste, sipas raportimeve, dyqane u sulmuan dhe u plaçkitën. Forcat policore ndërhynë sërish në zonat e prekura, duke arrestuar persona dhe duke u përpjekur të shpërndanin turmat. Numri i arrestimeve u rrit gradualisht gjatë mbrëmjes: nga nëntë në orën 20:15, në 14 deri në orën 21:00, për të arritur më pas në rreth 20.
Dhuna në Bilbao pas anulimit të aktivitetit
Menaxhimi i operacionit policor solli edhe reagime. U raportua se një pjesë e forcave të dislokuara paraprakisht në qytet ishte tërhequr nga disa zona pak para se të shpërthenin incidentet më të rënda. Sindikata e policisë Erne e cilësoi situatën shqetësuese, duke theksuar se anulimi i një aktiviteti nuk nënkupton automatikisht zhdukjen e rrezikut, veçanërisht kur ka tensione dhe grumbullime të mëdha njerëzish. Sindikata kërkoi shpjegime nga drejtuesit politikë dhe kritikoi mungesën e informacionit në kohë për efektivët që u angazhuan në terren.
Ndërkohë, Ministria e Sigurisë e Vendit Bask deklaroi se grupet e përfshira në trazira ishin drejtuar drejt stacionit të policisë në Deusto, duke hedhur gurë dhe duke i vënë flakën një motoçikleteje të policisë bashkiake. Autoritetet argumentuan se zhvillimet tregonin se incidentet ishin të paramenduara dhe se synimi ishte shkaktimi i trazirave. Presidenti i qeverisë autonome të Vendit Bask, Imanol Pradales, dënoi ashpër dhunën, duke theksuar se qindra qytetarë kishin protestuar në mënyrë paqësore kundër vizitës së Quiles, ndërsa një grup personash të radikalizuar shkaktoi shkatërrime në qytet. Ai e cilësoi situatën të papranueshme dhe theksoi se dhuna nuk mund të justifikohet në asnjë rrethanë.
Kryetari i bashkisë së Bilbaos, Juan María Aburto, reagoi gjithashtu, duke i cilësuar pjesëmarrësit në aktet e dhunës “fashistë”. Ai u bëri thirrje atyre që kishin mbështetur mobilizimet antifashiste të dënonin publikisht ngjarjet. Ministri i Sigurisë i Vendit Bask, Bingen Thupiria, tha se pamjet e dhunës i kujtuan periudha të errëta të së kaluarës së rajonit dhe nënvizoi se asnjë qëllim nuk e justifikon përdorimin e dhunës. Në total, sipas raportimeve, rreth 20 persona u arrestuan, shumë prej tyre të mitur.
Përpara se të shpërthenin trazirat, Bilbao ishte përfshirë nga demonstrata të mëdha kundër vizitës së planifikuar të Vito Quiles. Protestat nisën në orët e paradites me pjesëmarrjen e studentëve dhe grupeve antifashiste, të cilët e akuzojnë aktivistin se promovon qëndrime raciste, seksiste dhe klasiste. Një tjetër tubim u zhvillua gjatë pasdites, ndërsa organizatorët bënë thirrje për mobilizim kundër forcave të ekstremit të djathtë. Universiteti i Deustos njoftoi pezullimin e aktiviteteve akademike nga ora 14:00 dhe mbylljen parandaluese të ambienteve të tij në orën 15:00, pas rekomandimeve të policisë. Institucioni sqaroi se nuk kishte asnjë lidhje me organizimin e aktivitetit të Quiles dhe dënoi çdo veprim që nxit dhunën.
Vendimi për mbylljen e ambienteve solli edhe polemika politike: disa përfaqësues e konsideruan masë të tepruar, ndërsa të tjerë e mbështetën atë për arsye sigurie. Vetë Vito Quiles e anuloi aktivitetin pasi, sipas tij, ishte paralajmëruar nga policia për një rrezik shumë të lartë incidentesh. Autoritetet thanë se Quiles kishte kontaktuar policinë rreth orës 14:00 për të shqyrtuar mundësinë e zhvendosjes së aktivitetit në një vend tjetër, por u informua se kjo nuk ishte e mundur. Më pas, në orën 16:06, ai njoftoi zyrtarisht se nuk do ta zhvillonte tubimin.
Botuar fillimisht në Bota Sot
