Ish-ministri i Punëve të Brendshme, Bejtush Gashi, ka thënë se Kosova aktualisht nuk ka nevojë për krijimin e një strukture të re të xhandarmërisë. Sipas tij, prioriteti duhet të jetë mbështetja e strukturave ekzistuese të Policisë së Kosovës, të cilat, siç thotë Gashi, janë të afta dhe të përgatitura për përballimin e situatave të vështira sigurie.
Gashi thekson se njësitë policore aktuale kanë nevojë për mbështetje si në aspektin material, ashtu edhe në atë logjistik. Ai nënvizon se në vend të ngritjes së një strukture të re, duhet të synohet forcimi i kapaciteteve të policisë përmes burimeve dhe pajisjeve, në mënyrë që të ketë reagim më efektiv në raste të ngjashme.
Në këtë kontekst, ish-ministri iu referua rastit të Banjskës, duke argumentuar se policia i ka mundësitë që të përballet me situata të tilla. “Kosova në momentin aktual nuk ka nevojë për një strukturë të tillë, por ka nevojë të mbështesë strukturat aktuale të Policisë të cilat janë të afta dhe të përgatitura edhe për përballimin e situatave të tilla, si rasti i Banjskës. Duhet të mbështeten njësitë aktuale në aspektin material dhe logjistik”, ka deklaruar ai në Interaktiv.
Gashi ka sqaruar edhe se sipas tij, e vetmja mënyrë ligjore për funksionalizimin e xhandarmërisë do të ishte në kuadër të Ministrisë së Punëve të Brendshme. Ai tha se ende nuk ka një projekt të qartë për këtë çështje dhe, për rrjedhojë, është e vështirë të parashikohet se si është menduar konkretisht strukturimi i saj.
Ai ka përmendur se ekzistojnë disa modele të strukturimit të xhandarmërisë në vende të tjera, por sipas tij Kosova nuk mund të zgjedhë nga këto opsione. Gashi argumentoi se disa shtete e kanë këtë strukturë në kuadër të ministrisë së mbrojtjes, ndërsa Kosova nuk e ka këtë mundësi, duke qenë se ushtria është e limituar të operojë në komunat e veriut. Prandaj, sipas tij, opsioni i vetëm i mundshëm ligjor do të ishte pranë MPB-së, si agjenci e veçantë.
Një agjenci brenda MPB-së, sipas Gashit
Ndërkohë, zhvillimet lidhur me formimin e xhandarmërisë kanë nisur me njoftimin e kryeministrit në detyrë, Albin Kurti. Ai të hënën, në KTV, ka njoftuar formimin e xhandarmërisë së Kosovës. Pas këtij njoftimi, një ditë më pas, reagoi ministri në detyrë i Punëve të Brendshme, Xhelal Sveçla, i cili tha se ka nënshkruar vendimin për themelimin e grupit punues që do të analizojë dhe propozojë modalitete se si duhet të funksionojë xhandarmëria.
Sveçla, përmes një postimi në Facebook, ka deklaruar se xhandarmëria do të funksionojë si agjenci brenda MPB-së. Ai ka bërë të ditura edhe kompetencat që, sipas tij, do t’i ketë kjo strukturë. Të martën, Sveçla ka shkruar se xhandarmëria “përfaqëson një hap të rëndësishëm në konsolidimin e arkitekturës sonë të sigurisë”, duke theksuar misionin e saj për garantimin e prezencës së fuqishme shtetërore në funksion të ruajtjes së kufijve, integritetit dhe sovranitetit territorial.
Në të njëjtën komunikatë, ai ka përmendur edhe objektivat që lidhen me mbrojtjen nga terrorizmi, menaxhimin e trazirave me rrezikshmëri të lartë dhe mbrojtjen e infrastrukturës kritike. Ndërsa Gashi ka kundërshtuar nevojën për një strukturë të re, ai ka artikuluar edhe kushtin e vetme që e sheh ligjor për funksionalizimin e saj: si agjenci e veçantë pranë Ministrisë së Punëve të Brendshme, duke u nisur nga kufizimet e përmendura lidhur me operimin e ushtrisë në komunat e veriut dhe nga modelet ekzistuese të vendeve të tjera.
Botuar fillimisht në Koha.net