Fitorja e historike e Alternativa për Gjermaninë (AfD) në zgjedhjet rajonale të Sachsen-Anhaltit ka rritur shqetësimet për mënyrën se si partia mund të trajtojë çështjet e emigracionit në të ardhmen. Në këtë kontekst, deputeti i AfD-së në Bundestag, Tobias Teich, është pyetur nëse shqiptarët që jetojnë në Gjermani duhet të ndihen të rrezikuar nga politikat e partisë.
AfD doli forca e parë në zgjedhjet e 6 shtatorit në landin Sachsen-Anhalt, duke fituar 43,8 për qind të votave dhe duke siguruar 39 mandate nga 83 në parlamentin rajonal. Megjithatë, pavarësisht këtij rezultati, partia nuk arriti të marrë shumicën absolute dhe ende nuk është e qartë nëse do të mund të formojë qeverinë e vendit. Po ashtu, ky rezultat nuk nënkupton një fitore të AfD-së në zgjedhje federale dhe nuk i jep partisë pushtetin për të ndryshuar në mënyrë të drejtpërdrejtë politikat e emigracionit në gjithë Gjermaninë.
Pas zgjedhjes rajonale, Teich u përball me pyetje të drejtpërdrejta rreth qëndrimit të tij ndaj emigracionit dhe nëse shqiptarët e pranishëm në Gjermani e kanë arsye për shqetësim. Ai e bëri dallimin mes grupeve të ndryshme që preken nga politikat e azilit dhe migracionit, duke thënë se kritikat e tij lidhen kryesisht me personat që kërkojnë azil dhe, sipas tij, nuk janë integruar në shoqërinë gjermane.
Teich: Fokus kritik tek azilkërkuesit, jo tek emigrantët ligjërisht të integruar
Në një intervistë për emisionin “Review” të Euronews Albania, Tobias Teich theksoi se qasja e tij kritike lidhet me azilkërkuesit dhe jo me emigrantët që jetojnë dhe punojnë ligjërisht në Gjermani. Ai tha se Gjermania ka shpenzuar 12 miliardë euro në vitin 2024 për çështjet e azilkërkuesve. Sipas tij, “nuk po flasim për njerëzit që vijnë nga vende të tjera dhe janë të integruar në vendin tonë”. Teich shtoi se këta njerëz janë të mirëpritur, mund të bëhen pjesë e sistemit dhe se pranojnë kulturën dhe sistemin gjerman, pa u shoqëruar kjo me probleme.
Shifra prej 12 miliardë eurosh u përmend nga vetë deputeti, pa sqaruar se cilat kategori të shpenzimeve publike për azilin përfshihen në këtë shifër. Ndërsa, kur pyetja u drejtua drejtpërdrejt tek shqiptarët, Teich solli në vëmendje një përvojë personale që lidhet me refugjatët nga Kosova gjatë viteve ’90. Deputeti tha se e ka lindur në vitin 1984 dhe për këtë arsye i përket brezit që ka parë një numër të madh njerëzish që mbërrinin në Gjermani për t’u shpëtuar konflikteve dhe për të gjetur një vend të sigurt. Ai tha se ka qenë në kontakt me shumë njerëz nga Kosova.
Teich tha se përmes këtyre kontakteve mësoi për historinë e Kosovës dhe më vonë u njoh edhe me Shqipërinë. Ai tha se ka mundur të mësojë “disa gjëra për vendin tuaj” dhe se, sipas tij, mund të flasë pozitivisht për komunitetin shqiptar. Në këtë kuadër, ai përmendi edhe të dhëna statistikore që lidhen me kriminalitetin. Sipas Teich, shqiptarët nuk janë pjesë e grupet kryesore problematike në çështjen e emigracionit dhe se “nuk kemi probleme me njerëzit që kanë ardhur nga Shqipëria”. Ai theksoi se numri më i madh i emigrantëve, sipas tij, vjen nga Siria dhe nga vende të Afrikës, por jo nga Shqipëria.
Megjithatë, deputeti i AfD-së e ndau qartë se këto ishin pikëpamjet e tij personale dhe jo domosdoshmërisht të gjithë partisë. Ai tha se mund të shprehte “gjëra pozitive” dhe se në këtë rast po fliste për veten e tij, duke mos pretenduar të fliste në emër të AfD-së si tërësi. Në përmbyllje, ai tha se për Shqipërinë kishte një mendim pozitiv.
Deklarata e Teichit nuk nënkupton, sipas logjikës ligjore që zbatohet në Gjermani, se shqiptarët mund të dëbohen kolektivisht nga vendi. Rregullat juridike gjermane e lidhin largimin me statusin individual të secilit person: si refuzimi përfundimtar i azilit ose mungesa e lejes së qëndrimit. Në këtë kuadër, qytetarët me shtetësi gjermane, personat me leje të përhershme dhe ata që qëndrojnë ligjërisht në Gjermani nuk mund të dëbohen thjesht për shkak të origjinës së tyre shqiptare.
Botuar fillimisht në Bota Sot