Gjenerata Z po e ndryshon mënyrën tradicionale të kërkimit të punës. Përballë një tregu pune gjithnjë e më të vështirë, gjithnjë e më shumë të rinj po i drejtohen rrjeteve sociale dhe madje edhe aplikacioneve të takimeve si pjesë e strategjive për të gjetur punë. Në vend që të mjaftohen vetëm me aplikime standarde dhe CV të shkruara, kandidatët po përpiqen të tërheqin vëmendjen e punëdhënësve me video virale, postime të zgjuara dhe një qasje më krijuese në internet.
Një nga ndryshimet kryesore është se kandidatët po e trajtojnë aplikimin si një projekt komunikimi. Shumë prej tyre po e prezantojnë veten përmes videove në TikTok dhe Instagram, duke i kthyer këto platforma në hapësira ku tregojnë jo vetëm kualifikimet, por edhe mënyrën si flasin, si prezantojnë dhe çfarë personaliteti kanë. Kjo qasje nuk është thjesht një trend sipërfaqësor, por një përgjigje ndaj konkurrencës në rritje dhe mënyrës se si po filtrohen aplikimet.
Arsyeja kryesore lidhet me kushtet e punësimit, të cilat shumë e përshkruajnë si më sfidueset që nga pandemia. Numri i aplikimeve po rritet me shpejtësi, ndërsa numri i vendeve të lira po zvogëlohet. Në të njëjtën kohë, shkalla globale e punësimit, sipas të dhënave të LinkedIn, ka rënë në nivelin më të ulët në pesë vjet, ndërsa konkurrenca për çdo pozicion është rritur ndjeshëm.
Si pasojë, gjithnjë e më shumë kompani po përdorin inteligjencën artificiale për të filtruar kandidatët. Për këta të rinj, kjo do të thotë se është më e vështirë të dallohen nga turma vetëm me një CV të zakonshme. Pikërisht në këtë kontekst, disa prej tyre drejtohen drejt TikTok dhe Instagram për të treguar aftësitë, komunikimin dhe kreativitetin, në mënyrë që të mos mbeten pa u vënë re që në fazat e para.
CV-të video po shndërrohen në armën e Gjeneratës Z për të tërhequr punëdhënësit
Ekspertë të karrierës e përshkruajnë këtë mënyrë si një zgjerim i CV-së. Ideja është që një video të shërbejë si kartë prezantimi: të shfaqë aftësitë përmes tregimit personal, të krijojë lidhje me punëdhënësin dhe të japë prova të komunikimit. Disa kandidatë postojnë CV me video me humor, duke e bërë prezantimin më të lehtë për t’u ndjekur, ndërsa të tjerë përgatisin prezantime dhe fushata të personalizuara që ia dërgojnë direkt menaxherëve dhe drejtorëve.
Megjithatë, ekspertët paralajmërojnë se viraliteti nuk është garanci pune. Një video mund të tërheqë vëmendje dhe të rrisë dukshmërinë, por ajo nuk zëvendëson kualifikimet. Një shembull i tillë është rasti i një kandidie që u vu re për një CV video, por gjithsesi i është dashur të kalonte në një proces të gjatë aplikimi për të siguruar punën. Po ashtu, specialistë si Priya Rathod nga Indeed theksojnë se CV-të me video mund të jenë një “qershi mbi tortë” vetëm nëse pjesa bazë e profilit përputhet me kërkesat e punës.
Përtej anës profesionale, kërkimi i zgjatur i punës po ndikon edhe te shëndeti mendor i të rinjve. Analizat tregojnë se shumë kandidatë ndihen të frustruar, të lodhur dhe të dekurajuar nga aplikimet që nuk marrin përgjigje. Këshilltarja e karrierës Danielle Nicholson vëren se një pjesë e të rinjve përjetojnë ndjesinë sikur aplikojnë në “boshllëk”, pa marrë asnjë feedback. Ky realitet e bën kërkimin e punës edhe më të vështirë emocionalisht, sidomos kur koha kalon dhe përgjigjet nuk vijnë.
Në këtë situatë, shumë prej tyre mendojnë se nuk mjafton më vetëm një CV e mirë. Një prani profesionale online po bëhet gjithnjë e më e rëndësishme, pothuajse po aq sa arsimi dhe përvoja formale, ndërsa kufiri midis markës personale dhe kërkimit të punës po bëhet gjithnjë e më i paqartë. Pavarësisht kësaj, ekspertët nënvizojnë se kandidatët nuk duhet të ndihen nën presion për t’u kthyer në influencues. Përmbajtja krijuese mund të ndihmojë në tërheqjen e vëmendjes, por në planin afatgjatë, njohuritë, përvoja dhe aftësia për t’u përshtatur me tregun e punës mbeten vendimtare.
Botuar fillimisht në Bota Sot
