Më shumë se gjysma e kamerave të monitorimit në rrugët e Tiranës nuk kanë funksionuar edhe përpara dëmtimeve të shkaktuara gjatë protestave të dhunshme të javëve të fundit. Problemet, sipas një raporti të fundit auditimi të Kontrollit të Lartë të Shtetit, lidhen me transmetimin e pamjeve dhe me mënyrën se si sistemi menaxhon vëzhgimin e trafikut.
Raporti i KLSH-së për qarkullimin rrugor në Bashkinë e Tiranës, i publikuar të hënën e 26 tetorit, tregon se sistemi i menaxhimit të trafikut kishte mangësi edhe para nisjes së protestës. Auditimi thekson se nga 71 kamera të instaluara për monitorimin e trafikut në kryeqytet, 40 prej tyre, ose 56.3%, nuk transmetonin pamje gjatë verifikimit të KLSH-së më 1 korrik 2026.
Në raport sqarohen edhe shtrirjet kohore të ndërprerjes së transmetimit. Për 11 kamera, ndërprerja e transmetimit kishte zgjatur nga dy deri në shtatë vjet, ndërsa 14 kamerat e tjera kishin qenë jashtë funksionit për periudha nga një deri në shtatë muaj. KLSH vëren gjithashtu se sistemi i kamerave ishte plotësuar nëpërmjet një kontrate të vitit 2021, me vlerë rreth 59.9 milionë lekë.
Një tjetër problem i evidentuar lidhet me platformën qendrore për shfaqjen e pamjeve. Sipas auditimit, platforma qendrore për shfaqjen e njëkohshme të pamjeve nuk funksiononte. Në vend të këtij mekanizmi qendror, operatorët e monitorimit i vëzhgonin kamerat në mënyrë individuale në kompjuter, çka, sipas logjikës së auditimit, e bën të vështirë kontrollin e plotë dhe të menjëhershëm të situatës në terren.
Raporti shënon edhe se jo të gjithë semaforët ishin të integruar. Konstatohet se 10 semaforë nuk ishin të integruar në sistemin qendror, duke shtuar kështu fragmentimin e menaxhimit të trafikut. Në tërësi, auditimi përshkruan një sistem me lidhje të pjesshme mes elementëve të monitorimit, që nuk garantonte funksionim të vazhdueshëm të pamjeve dhe shërbimeve mbështetëse.
Problemet nisën më herët: kamerat dhe semaforët nuk ishin të integruar
Përveç pjesës së kamerave dhe semaforëve, KLSH ka evidentuar mangësi edhe në transportin publik dhe në ecurinë e projekteve infrastrukturore, si dhe probleme në monitorimin e shërbimeve urbane. Auditimi shqyrton periudhën 2023–2025 dhe vë theksin te mënyra si janë planifikuar dhe shpenzuar fondet për transportin publik në Bashkinë e Tiranës.
Sipas të dhënave të raportuara, shpenzimet e programit të transportit publik u rritën nga 325 milionë lekë në vitin 2023 në 1.53 miliardë lekë në vitin 2025. Megjithatë, pjesa dërrmuese e fondeve është përdorur për subvencione dhe rimbursime, përfshirë abonetë e studentëve dhe pensionistëve. Investimet, sipas auditimit, kanë zënë 13% të shpenzimeve të programit në vitin 2023 dhe 30% në vitin 2024, por realizimi i tyre ishte zero.
Për vitin 2025, investimet u raportuan në 4% të shpenzimeve të programit dhe u realizuan në masën rreth 2%. KLSH konstaton se gjatë tre viteve nuk është arritur të realizohet as niveli i investimeve të planifikuara për një vit të vetëm, konkretisht për vitin 2023. Në përfundimet e saj, KLSH paralajmëron se struktura e shpenzimeve, e orientuar kryesisht drejt subvencioneve, e kombinuar me realizimin e ulët të investimeve, krijon rrezik për mungesë ndikimi në përmirësimin e qarkullimit rrugor dhe të cilësisë së shërbimit.
Botuar fillimisht në Bota Sot
