Zvicra po përballet me një korrje dukshëm më të dobët të patateve, si rezultat i temperaturave të larta dhe thatësirës gjatë verës që kanë dëmtuar prodhimin bujqësor. Kushtet e motit kanë ndikuar në rritjen e bimëve, duke e bërë më të vështirë për fermerët të mbajnë ritmet normale të kultivimit dhe rendimentin e pritshëm.
Si pasojë e kësaj situate, vendit i duhet të importojë rreth 130 mijë tonë patate për të mbuluar kërkesën e brendshme. Përveç nevojës për furnizim nga jashtë, pritet edhe rritje e çmimeve në treg, pasi prodhimi vendas nuk do të jetë i mjaftueshëm për të plotësuar kërkesën me të njëjtat standarde si në vitet kur rendimenti ka qenë më i lartë.
Medias zvicerane “Watson” raporton se rendimenti i patateve këtë vit është rreth 25% më i ulët se niveli i zakonshëm. Ndërsa fermerët kanë korrur mesatarisht 30 tonë për hektar, mesatarja gjatë pesë viteve të fundit ka qenë rreth 38 tonë për hektar. Rënia e këtillë tregon se dëmtimet nga thatësira nuk janë të izoluara, por kanë prekur në mënyrë të konsiderueshme prodhimin në terren.
Christian Bucher, nga organizata e sektorit Swisspatat, ka shpjeguar se mungesa e reshjeve ka ngadalësuar rritjen e patateve. Sipas tij, kur toka nuk furnizon bimët me lagështi të mjaftueshme, zhvillimi i tyre dobësohet dhe rendimenti bie. Nga ana tjetër, Lara Stamler, nga Shoqata Zvicerane e Prodhuesve të Patateve, thekson se kur temperaturat kalojnë 28 gradë Celsius, bimët ndërpresin përkohësisht zhvillimin e tyre.
Thatësira ul rendimentin dhe rrezikon rritjen e çmimeve të patateve
Për shkak të prodhimit të dobët, edhe shkalla e vetëfurnizimit të Zvicrës me patate pritet të bjerë. Aktualisht, ky tregues zakonisht arrin rreth 85%, ndërsa për këtë vit parashikohet të zbresë në 70–75%. Kjo do të thotë se një pjesë më e madhe e patateve në treg do të vijë nga importet, duke ndryshuar raportin mes produkteve vendore dhe atyre të sjella nga jashtë.
Diferenca, pra hendeku mes nevojës dhe prodhimit të brendshëm, do të mbulohet përmes importeve. Situata mund të ndikojë drejtpërdrejt te konsumatorët, pasi patatet vendore mund të zëvendësohen më shpesh me produkte të importuara. Përfaqësuesit e sektorit theksojnë se çmimet mund të rriten, megjithëse nuk pritet mungesë e përgjithshme e patateve në treg.
Ndërkohë, dallime të mëdha janë vërejtur edhe mes fushave të ujitura dhe atyre pa ujitje. Sipas të dhënave të raportuara, rendimentet në parcelat e ujitura kanë qenë mesatarisht 55% më të larta sesa në ato që nuk janë ujitur. Ky kontrast tregon se menaxhimi i ujitjes ka luajtur rol kyç gjatë periudhave me mungesë reshjesh dhe se prodhuesit me akses te ujitja kanë patur më shumë mundësi të ruajnë një pjesë të rendimentit.
Për të përballuar ndikimin e ndryshimeve klimatike, sektori bujqësor zviceran po kërkon të zhvillojë varietete patatesh më rezistente ndaj vapës, thatësirës dhe sëmundjeve. Megjithatë, ky proces kërkon kohë dhe nuk pritet ta zgjidhë menjëherë problemin e prodhimit të ulët këtë sezon. Deri atëherë, vendi pritet të vijojë të mbështetet tek importet për të plotësuar nevojat, ndërsa konsumatorët mund të ndjejnë pasojat kryesisht në çmime.
Botuar fillimisht në Telegrafi
