Një hetim i brendshëm në Shtëpinë e Bardhë ka nisur lidhur me pretendimin se një donacion prej afro 6 milionë dollarësh nuk është depozituar siç ishte planifikuar gjatë kohës kur Richard Grenell drejtonte “Kennedy Center”. Lajmi bëhet i ditur nga mediumi amerikan Axios, i cili shkruan se pretendimi është ngritur nga ish-avokatja e Donald Trump, Alina Habba.
Sipas rrëfimit të publikuar, Habba i ka thënë presidentit Trump se një tjetër këshilltar i tij kryesor, ish-drejtuesi i “Kennedy Center” Ric Grenell, nuk e kishte depozituar një kontribut financiar me vlerë prej disa milionë dollarësh që bashkëshorti i saj miliarder, Turhan Mildon, i kishte dhuruar qendrës një vit më parë. Axios thekson se këtë e kanë konfirmuar katër zyrtarë të lartë të administratës dhe tre persona të brendshëm të informuar për çështjen.
Në reagimin e tij, Grenell i ka cilësuar deklaratat e Habbas drejtuar Trumpit si “absurde”. Ai është cituar të ketë thënë se nuk ka kërkuar kurrë që asnjë cent të dërgohej diku tjetër me pretekstin se ishte për “Kennedy Center” dhe se nuk ka marrë asnjë pagesë nga Mildon. Grenell i ka kërkuar Habbas që, nëse ka pretendime, të sjellë prova konkrete, duke shtuar se akuzat janë pa bazë.
Kontributi i pretenduar: 5,6 milionë dollarë në “Kennedy Center”
Sipas Axios, kur Habba ngriti fillimisht akuzat kundër Grenellit, ajo pretendoi se shuma totale e kontributit për “Kennedy Center” ishte 17 milionë dollarë. Megjithatë, më pas, pasi ka mësuar detajet nga bashkëshorti i saj, ajo ka ndryshuar versionin dhe ka deklaruar se shuma e kontributit ishte 5,6 milionë dollarë. Kjo çështje lidhet me faktin se, sipas mënyrës si e kanë përshkruar burimet, pas kryerjes së pagesës së pretenduar, Mildon nuk e kishte verifikuar nëse shuma ishte depozituar realisht në destinacion.
Axios gjithashtu shkruan se Mildon kishte supozuar se pagesa ishte regjistruar, pasi trajtohej si “donator VIP” në “Kennedy Center”. Në këtë kuadër, burimet thonë se ai njihej me Habbën në fund të vitit 2025, para se lidhja e tyre të shndërrohej shpejt në romancë dhe më pas në martesë. Ndërkohë, një zyrtar i lartë i administratës ka sqaruar se bëhet fjalë vetëm për pretendime dhe se ende nuk dihet nëse ato janë të vërteta apo thjesht rezultat i një keqkuptimi. Sipas tij, presidenti nuk ka dëshirë të merret me këtë çështje, por pranohet se shqetësimi është i madh nëse realisht ka pasur para të humbura.
Por shkrimi shpjegon edhe se si nisi përshkallëzimi i mosmarrëveshjes mes palëve. Sipas Axios, kulmi i konfliktit lidhet me raportin mes Grenell dhe Mildonit dhe me interesat që ata kishin në Venezuelë. Burimet që njohin situatën thonë se ata kishin “interesa të përbashkëta” në atë vend në fillim të vitit 2025, menjëherë pas rikthimit të Trumpit në Shtëpinë e Bardhë.
Grenell, në cilësinë e të dërguarit të posaçëm të Trumpit, po avokonte për normalizimin e marrëdhënieve të SHBA-së me liderin e atëhershëm të Venezuelës, Nicolas Maduro. Ndërkohë, Mildon – shtetas turk – kishte interesa të gjera biznesi në Venezuelë, të cilat, sipas burimeve, rrezikoheshin nga një fushatë e ashpër e presionit e udhëhequr nga Sekretari i Shtetit, Marco Rubio, kundër Maduros. Axios përshkruan se Mildon dhe Habba e zbuluan çështjen pasi marrëdhënia e tyre e biznesit me Grenellin u përkeqësua.
Sipas shkrimit, Grenell kishte humbur një betejë të brendshme për pushtet brenda administratës kundër Marco Rubios. Ky tension kulmoi me arrestimin e Nicolas Maduros nga SHBA-ja më 3 janar, si dhe dërgimin e tij në Nju-Jork për t’u përballur me akuza për trafik narkotikësh. Më pas, në qershor, pasuesja e Maduros, Delcy Rodriguez, nxori një urdhër për anulimin e një kontrate të një kompanie të Mildonit, që lidhej me operimin e impianteve shtetërore të çimentos në Venezuelë. Në këtë kontekst, Axios përmend raportimin e gazetës “New York Times”, e cila ka trajtuar urdhrin dhe rrethanat e tij. Një burim i njohur me situatën i tha Axios-it gjatë verës se veprimi i Rodriguez erdhi pjesërisht si pasojë e presionit nga qeveria amerikane. Ndërkohë, pavarësisht se disa muaj më parë Grenell shihej si mik me Mildonin dhe Habbën, ai mungoi dukshëm në dasmën e tyre luksoze prej 10 milionë dollarësh. Në atë ceremoni, muajin e kaluar morën pjesë zyrtarë të rrethit të Trumpit, figura me ndikim dhe personalitete të njohura.
Botuar fillimisht në Telegrafi
