Polonia dhe Lituania kanë nisur punën për një plan të përbashkët ndërkufitar për evakuimin e popullsisë në rast të një krize të madhe ose kërcënimi ushtarak në rajonin e Baltikut. Projekti parashikon organizimin e zhvendosjes së një pjese të banorëve të Lituanisë, Letonisë dhe Estonisë drejt territorit polak.
Përgatitjet po zhvillohen përmes analizimit të procedurave që do të ndiqen në terren, si dhe të logjistikës dhe kapaciteteve të infrastrukturës në të dyja vendet. Në këtë proces përfshihet koordinimi i hapave praktikë që lidhen me mënyrën se si do të menaxhohet lëvizja e civilëve, nga faza e paralajmërimit deri te organizimi i pikave ku ata do të grumbullohen dhe regjistrohen.
Puna për propozimin ka filluar tashmë, ndërsa një plan më i detajuar pritet të hartohet pasi Polonia dhe Lituania të arrijnë marrëveshjen përkatëse mes tyre. Lajmi bëhet i ditur përmes “Euronews”, ndërsa drejtuesi i Qendrës Kombëtare të Menaxhimit të Krizave të Lituanisë, Vilmantas Vitkauskas, ka bërë të ditur se procesi i punës është në rrugë e sipër.
Përgatitjet po zhvillohen në kuadër të stërvitjeve lituaneze “Vyčio Skliautas 2026”, të cilat janë nisur më 25 shtator dhe do të zgjasin deri më 3 tetor. Stërvitjet synojnë të testojnë sistemin kombëtar të mobilizimit dhe mënyrën e bashkëpunimit institucional në situata krize, duke vënë në provë organizimin dhe reagimin e strukturave të përfshira.
Evakuimi ndërkufitar vlerësohet përmes stërvitjeve në Baltik
Një nga pjesët praktike të ushtrimeve lidhet drejtpërdrejt me testimin e procedurave të evakuimit të popullsisë. Në stërvitje marrin pjesë rreth 3,000 pjesëtarë të forcave të sigurisë dhe përfaqësues të institucioneve e autoriteteve lokale, si edhe të kompanive dhe organizatave joqeveritare. Krahas tyre, parashikohet përfshirja e rreth 1,000 vullnetarëve, të cilët ndihmojnë që simulimet të zhvillohen sa më realisht.
Gjatë ushtrimeve po testohen disa elementë kyç: sistemet e paralajmërimit të banorëve, organizimi i pikave të grumbullimit dhe regjistrimit, si dhe planifikimi i transportit. Po ashtu, testohen mënyrat e lëvizjes së personave të evakuuar përmes rajoneve të ndryshme, për të parë se si funksionon zinxhiri i koordinimit nga autoritetet deri te menaxhimi i lëvizjes në terren.
Në Lituani ndodhet edhe një delegacion prej rreth 20 përfaqësuesish nga institucionet e ndryshme polake, çka tregon pjesëmarrjen aktive të palës polake në planifikim dhe në vlerësimin e procedurave gjatë ushtrimeve. Polonia, sipas të dhënave të publikuara, po merr pjesë në mënyrë të drejtpërdrejtë në planifikimin e evakuimit ndërkufitar.
Autoritetet lituaneze kanë theksuar se stërvitjet kanë karakter trajnues dhe synojnë zhvillimin e procedurave për përballimin e krizave. Pohohet se ato nuk nënkuptojnë se po pritet një kërcënim i menjëhershëm. Në qendër të planifikimit është edhe korridori Suwałki, një brez territori që lidh Poloninë me Lituaninë dhe, përmes të cilit shtetet baltike lidhen me pjesën tjetër të aleatëve të NATO-s dhe me Bashkimin Evropian.
Kjo zonë përmban rrugët kryesore tokësore ndërmjet Polonisë dhe Lituanisë. Në rast të një krize serioze, këto lidhje mund të jenë të rëndësishme jo vetëm për lëvizjen e trupave dhe furnizimeve, por edhe për evakuimin e civilëve. “Korridori Suwałki është me rëndësi të jashtëzakonshme, si nga pikëpamja ushtarake, ashtu edhe nga ajo logjistike”, ka deklaruar Vilmantas Vitkauskas.
Botuar fillimisht në Koha.net
