Përplasja SHBA-Iran po kalon në një fazë më të rrezikshme, pasi forcat amerikane kanë goditur disa cisterna nafte iraniane. Ngjarjet vijnë pasi Irani kishte tentuar të sulmonte me raketa një anije të Marinës amerikane në rajon, duke rritur ndjeshëm tensionet në zonë.
Sulmet amerikane u kryen të martën dhe, sipas zyrtarëve amerikanë, shënjestruan disa cisterna iraniane që kanë lidhje me Gardën Revolucionare Islamike të Iranit (IRGC). Një zyrtar amerikan ka theksuar se goditjet erdhën si përgjigje ndaj përpjekjeve të Iranit për të sulmuar një anije luftarake të Marinës amerikane.
Ndërkohë, sulmet iraniane nuk arritën të godisnin anijen amerikane. Po sipas zyrtarit, asnjë personel amerikan nuk u plagos. Raportimet e mediave iraniane bëjnë të ditur se disa cisterna u goditën pranë portit Jask dhe në zonën e ishullit Kharg, i njohur si një prej qendrave kryesore të industrisë së naftës iraniane. Disa ekuipazhe, sipas këtyre raportimeve, u evakuuan me varka shpëtimi.
Tensioni në Gjirin Persik rritet teksa SHBA godet cisterna iraniane
Pas sulmeve amerikane, tensioni është përshkallëzuar edhe më tej. Marina e Gardës Revolucionare iraniane ka paralajmëruar ekuipazhet e cisternave të naftës pranë porteve të Kuvajtit dhe Bahreinit që të largohen menjëherë nga anijet. IRGC pretendon se këto vende po presin forca amerikane dhe se po bashkëpunojnë me operacionet e Uashingtonit. Në këtë kuadër, Garda paralajmëron se anijet pranë porteve të tyre mund të shënjestrohen.
Ky zhvillim i ri shton frikën për një përshkallëzim tjetër në Gjirin Persik, ku anijet tregtare mund të përfshihen gjithnjë e më shumë në konfliktin mes Uashingtonit dhe Teheranit. Në qendër të kësaj përplasjeje qëndron Ngushtica e Hormuzit, një nga korridoret më të rëndësishme energjetike në botë. Përpara luftës, rreth një e pesta e naftës globale kalonte përmes kësaj ngushtice. Tani, ajo është kthyer në një prej frontet kryesore të konfliktit, ndërsa SHBA përpiqet të sigurojë kalimin e një numri të kufizuar anijesh dhe të mbajë bllokadë ndaj porteve iraniane.
Teherani, nga ana tjetër, kërkon që anijet të përdorin një rrugë të përcaktuar prej tij dhe ka paralajmëruar masa të reja për të kufizuar lundrimin në këtë korridor strategjik. Ndërkohë, përplasja po ndihet edhe jashtë nivelit ushtarak, duke prekur tregjet globale. Çmimi i naftës Brent u afrua të martën drejt 100 dollarëve për fuçi, duke reflektuar frikën se luftimet mund të ndërpresin më tej furnizimet energjetike.
Paralelisht me veprimet në det, SHBA ka vijuar presionin edhe në planin ekonomik. Në të njëjtën ditë, administrata e presidentit Donald Trump njoftoi sanksione të reja ndaj sektorit të aviacionit iranian. Masat prekën më shumë se dy duzina kompani ajrore dhe ofrues shërbimesh të transportit ajror. Ky është pjesë e përpjekjes së Uashingtonit për të izoluar më tej ekonominë iraniane dhe për t’i ndërprerë Teheranit kanalet e mbetura tregtare.
Kështu, presioni amerikan ndaj Iranit po zhvillohet në dy fronte njëkohësisht: ushtarakisht në Gjirin Persik dhe ekonomikisht përmes sanksioneve. Ndërsa SHBA synon të mbajë kontrollin mbi rrugët kryesore të transportit detar, Irani po e shoqëron kundërpërgjigjen me kërcënime për masa të reja në Hormuz, duke e mbajtur të ndezur rrezikun e një shtrirjeje më të gjerë të konfliktit në rajon.
Botuar fillimisht në Telegrafi
