Real Madridi raportohet se po e shqyrton mundësinë për largimin e Vinicius Juniorit gjatë kësaj vere. Sipas informacioneve, gjithçka lidhet me mënyrën se si do të konkretizohet interesi i Arsenalit, i cili pritet të hyjë në tratativa vetëm nëse arrin të ofrojë një ofertë të madhe financiare.
Negociatat për rinovimin e kontratës së brazilianit thuhet se kanë ngecur prej rreth 12 muajsh dhe nuk kanë shënuar asnjë përparim. Vinicius, i cili ka hyrë në sezonin e fundit të kontratës me klubin madrilen, është duke kërkuar një pagë në nivele të ngjashme me atë të Kylian Mbappes, futbollistit më të paguar aktualisht në skuadër. Përveç pagës, braziliani kërkon edhe një bonus të majmë besnikërie, një element që pritet të jetë kyç në fatin e tij.
Tre arsyet pse Real Madridi po mendon ta shesë Viniciusin
Në planin e parë qëndron fakti se Real Madridi nuk dëshiron ta rrezikojë largimin e lojtarit si futbollist i lirë në verën e vitit 2027. Klubi e sheh si opsion më të kujdesshëm që, nëse nuk arrihet një marrëveshje për rinovim në kohë, të shmangë humbjen pa dëmshpërblim. Në këtë logjikë, shitja gjatë kësaj vere bëhet një skenar realist vetëm në rast se Arsenali i tejkalon pritshmëritë me një ofertë të kënaqshme.
Një arsye tjetër lidhet me aspektin taktik, që sipas raportimeve ka qenë shqetësim edhe për trajnerë të mëparshëm. Mendohet se pozicionet ku preferojnë të veprojnë Viniciusi dhe Mbappe në sulm nuk përputhen në mënyrën më të mirë, duke krijuar vështirësi për balancimin e rolave. Raporti thekson se, ndërkohë që të dy luajnë në zona të ngjashme të sulmit, kontributi i tyre në fazën mbrojtëse është i kufizuar, gjë që mund të krijojë probleme për planin e lojës në ndeshje të caktuara.
Ndërkohë, përmenden edhe çështje që lidhen me marrëdhëniet brenda skuadrës. Marrëdhënia mes Viniciusit dhe Mbappes nuk ka qenë ideale. Në raportim thuhet se francezi e shihte Viniciusin si një nga arsyet që çuan në largimin e Xabi Alonsos. Gjithçka ka nisur pas reagimit të ashpër të Viniciusit ndaj një zëvendësimi, një situatë që solli tensione dhe dobësoi pozitën e trajnerit spanjoll. Më pas, Alonso u shkarkua, pavarësisht se Mbappe kishte tentuar ta mbështeste duke luajtur në Superkupën e Spanjës, edhe pse nuk ishte plotësisht i gatshëm fizikisht.
Raporti rikujton edhe një përplasje mes Jose Mourinhos dhe Viniciusit pas ndeshjes së play-offit të Ligës së Kampionëve kundër Benficas. Mourinho është përshkruar si personi që mori vendimin përfundimtar për brazilianin, pas akuzës së Viniciusit se Gianluca Prestianni i kishte ofenduar me pretendime raciste. Ndërkaq, Mourinho deklaroi pas ndeshjes se nuk mund të konfirmonte versionin e asnjërit prej palëve. Përveç kësaj, trajneri u shfaq kritik edhe për mënyrën se si Viniciusi festoi golin e tij, duke bërë që marrëdhëniet mes tyre të mbeteshin të ftohta.
Me negociatat që vazhdojnë të jenë të bllokuara, Real Madridi ka dy alternativa. Së pari, klubi mund t’i plotësojë kërkesat e Viniciusit me një kontratë prej 30 milionë eurosh në sezon, plus një bonus besnikërie prej 15 milionë eurosh. Së dyti, nëse Arsenali paraqet një ofertë të kënaqshme, Real Madridi pritet ta shesë lojtarin gjatë kësaj vere, duke shmangur rrezikun që të humbasë shërbimet e tij pa dëmshpërblim në verën e vitit 2027. Gjithashtu, thuhet se Mourinho nuk pritet ta bllokojë një transferim të mundshëm, pavarësisht se e vlerëson shumë cilësinë e Viniciusit.
Botuar fillimisht në Telegrafi
