Për dekada me radhë, Shqipëria ka qenë identifikuar si “vendi i Mercedesëve”, kryesisht për shkak të numrit të madh të automjeteve të përdorura të importuara nga Gjermania dhe vende të tjera evropiane. Por tregu i makinave të reja po lëviz me shpejtësi, ndërsa markat kineze po zënë gjithnjë e më shumë hapësirë te blerësit.
Të dhënat e publikuara nga Deutsche Welle tregojnë se në vitin 2022 në Shqipëri ishin të regjistruara rreth 740 mijë automjete. Nga ky total, mbi 212 mijë ishin Mercedes, çka do të thotë se kjo markë përfaqësonte rreth 30 për qind të tregut. Në atë periudhë, dominimi i Mercedesëve dukej i konsoliduar, sidomos për shkak të fluksit të automjeteve nga Evropa.
Megjithatë, vetëm disa vite më vonë, dinamika e tregut ka ndryshuar dukshëm. Gjatë vitit 2026, BYD-i është shndërruar në markën më të shitur në Shqipëri, falë ofertës për modele elektrike dhe hibride, sipas të dhënave të Drejtorisë së Përgjithshme të Shërbimeve të Transportit Rrugor.
BYD po rritet me ritëm të shpejtë në tregun e makinave të reja
Në gjysmën e parë të vitit 2026, BYD-i ka siguruar rreth 50 për qind të tregut të automjeteve të reja. Në janar, pjesa e kësaj marke ishte 47.9 për qind, ndërsa në mars arriti në 62 për qind. Në prill, shifra u ngjit edhe më tej, duke kaluar 54 për qind. Në maj dhe qershor, pjesa e tregut u stabilizua rreth 45 për qind, që përkthehet në faktin se pothuajse çdo veturë e dytë e re e shitur në Shqipëri ishte BYD.
Pavarësisht se tregu shqiptar është relativisht i vogël, brenda vetëm gjashtë muajve janë shitur rreth 4 mijë automjete BYD. Ky numër tregon qartë se preferencat e blerësve po ndryshojnë shpejt dhe se kërkesa për modele kineze, të paktën për kategorinë e automjeteve të reja, po rritet me ritme të larta.
Përveç BYD-it, në rrugët shqiptare po shfaqen gjithnjë e më shumë edhe modele nga prodhues të tjerë kinezë, si Xiaomi, Leapmotor, Li Auto, Geely, Zeekr dhe Avatr. Po ashtu, janë rritur edhe importet e modeleve elektrike të Volkswagen, të prodhuara për tregun kinez dhe të sjella në Shqipëri me çmime më të ulëta krahasuar me ato që shihen në Evropë.
Një shembull konkret është Volkswagen ID.7. Sipas të dhënave të përmendura, në Shqipëri ky model mund të blihet për rreth 23 mijë euro, ndërsa në Gjermani çmimi fillestar është rreth 54.500 euro. Kjo diferencë e madhe çmimi ka bërë që automjetet tërheqin më shumë interes, sidomos për blerësit që kërkojnë kosto më të ulëta për një makinë të re.
Por, versionet e orientuara për tregun kinez shoqërohen edhe me kufizime. Disa funksione të softuerit nuk janë të disponueshme, shërbimet online dhe navigacioni i fabrikës nuk funksionojnë për shkak të konfigurimit për tregun kinez, ndërsa performanca dhe shpejtësia e karikimit mund të jenë disi më të ulëta se te modelet e destinuara për Evropën. Një faktor tjetër që lidhet me rritjen e pranisë së automjeteve kineze është edhe mënyra e importit: shumë prej tyre hyjnë në treg përmes kompanive private ose individëve, jo vetëm përmes distributorëve zyrtarë.
Në këtë klimë çmimesh konkurruese, modeli më i shitur raportohet të jetë BYD Yuan Up, i njohur në disa tregje edhe si Atto 2. Ky SUV kompakt kushton rreth 14.200 euro në Shqipëri, ndërsa në Gjermani çmimi fillestar është rreth 31.990 euro. BYD Sealion 7 renditet gjithashtu ndër modelet më të kërkuara, duke treguar se trendi nuk lidhet vetëm me një model të vetëm, por me një gamë të gjerë ofertash elektrike dhe hibride që po zënë terren në tregun shqiptar.
Botuar fillimisht në Koha.net
