Pep Guardiola ka zhvilluar bisedime për t’u bërë përzgjedhës i Italisë në futboll, duke hapur një kapitull të ri në garën për pankinën e kombëtares italiane. Lajmi është konfirmuar nga presidenti i Federatës së Futbollit të Italisë, Giovanni Malago, i cili ka folur drejtpërdrejt për kontaktin me spanjollin.
Guardiola u largua nga Manchester City këtë verë, pas dhjetë vjetësh qëndrimi në futbollin anglez. Gjatë kësaj periudhe ai arriti një bilanc të pashembullt trofesh: fitoi gjashtë tituj të Premier Leagues, tre trofe të Kupës FA, pesë Kupa të Ligës dhe një Ligë të Kampionëve. Ky rekord e ka bërë emrin e tij edhe më të pranishëm në diskutimet për drejtimin e ekipeve kombëtare.
Italia mbetet pa përzgjedhës që nga koha kur Gennaro Gattuso dha dorëheqjen në prill. Dorëheqja e Gattusos erdhi pas dështimit të Italisë për t’u kualifikuar në Kupën e Botës, një rezultat që e ka prekur kombëtaren për herë të tretë rresht. Në këtë kontekst, Federata po kërkon një figurë që të rikthejë stabilitetin dhe performancën në nivelet e larta të futbollit ndërkombëtar.
Malago flet për “përjashtime financiare” për Guardiolën
“Sky Italia” raportoi për herë të parë të hënën për kontaktin e federatës italiane me trajnerin 55-vjeçar. Në një intervistë për “Cronache di spogliatoio”, Giovanni Malago e konfirmoi se bisedimet janë zhvilluar me spanjollin dhe se mund të ketë “përjashtime” të lidhura me pagën e tij. Malago nuk i ka detajuar kushtet, por ka theksuar se ideja e këtyre lehtësive financiare lidhet me emrin e tij dhe vlerën që konsiderohet se sjell në momentin aktual.
“Përjashtime financiare janë bërë, përjashtime që për shembull mund të kenë të bëjnë me emrin që është kaq superior në këto orë – Pep Guardiola”, ka thënë Malago. Ai ka shtuar se bëhet fjalë për “përjashtime për arsye të dukshme” dhe se nuk ka qenë në interes të tij t’i shpjegojë publikisht detajet, ndërsa ka lënë edhe një hapësirë pasigurie: “Por nuk është e sigurt nëse kjo gjë do të kalojë”.
Në listën e kandidatëve për rolin e selektorit të Italisë përmenden edhe emra të tjerë me peshë në futboll. Roberto Mancini, ish-trajner i Manchester Cityt, i cili e udhëhoqi Italinë drejt lavdisë në Euro 2020, është gjithashtu në diskutim. Në të njëjtën kategori kandidatësh futet edhe ish-mesfushori Andrea Pirlo.
Kur u pyet nëse Guardiola, Mancini dhe Pirlo janë kandidatët e vetëm, Malago u përgjigj: “Absolutisht jo. Ne mendojmë për një profil të caktuar dhe sigurisht që këta emra janë në atë kategori”. Përtej emrave të përmendur, presidenti ka lënë të kuptohet se federata po kërkon përshtatje në aspektin e stilit dhe profilit që i duhet ekipit në këtë fazë.
Historia e pankinës së Italisë tregon se kombëtarja ka pasur trajnerë nga Italia gjatë gjithë rrugëtimit të saj, me dy përjashtime të spikatura. Në vitin 1950, hungarezi Lajos Dzeizler ishte pjesë e komitetit teknik përgjegjës. Ndërsa një dekadë më pas, argjentinasi legjendar Helenio Herrera ishte bashkë-trajner me italianin Ferruccio Valcareggi.
Guardiola, nga ana e tij, nuk ka drejtuar përfaqësuese deri më tani. Megjithatë, ai ka shkruar histori me Barcelonën, më pas me Manchester Cityn dhe ka qenë po ashtu i suksesshëm edhe te Bayerni. Ai flet rrjedhshëm italisht dhe ka kaluar dy edicione në Serie A. Nga viti 2001 deri në vitin 2003 ka qenë në dy periudha te Brescia dhe një te Roma, një përvojë që e lidh edhe më shumë me futbollin italian.
Italianët duket se po synojnë rikthimin në rrugën e sukseseve, ndërsa angazhimi i një “top-trajneri” vlerësohet i domosdoshëm në këtë fazë, pas një periudhe që ka lënë kombëtaren pa objektivin kryesor për Kupën e Botës. Diskutimet për të ardhmen e pankinës vazhdojnë, ndërsa federata po peshon kushtet dhe opsionet në tavolinë.
Botuar fillimisht në Koha.net
