Kombëtarja e Francës ka shënuar fitoren e dytë në Grupin I të Kupës së Botës, duke mposhtur Irakun me rezultat 3-0. Ndeshja, e cila premtoi emocione që në fillim, u kthye në një test të vërtetë jo vetëm për lojën, por edhe për kushtet e motit që e shoqëruan gjatë gjithë zhvillimit të saj. “Gjelat” e nisën me ritëm të lartë dhe e mbajtën kontrollin prej minutave të para, duke vendosur tonin në fushë.
Francën e pa të qartë që në fazat e hershme, ndërsa portieri irakian u detyrua të përballet me tentativa të njëpasnjëshme. Rastin e parë që solli golin e parë e regjistroi Kylian Mbappe. Në minutën e 14-të, ai mori topin rreth 18 metra larg portës dhe me një goditje të fuqishme mposhti Jalal Hassan për 1-0. Epërsia e hershme i dha skuadrës franceze edhe më shumë hapësira, ndërkohë që Iraku kërkonte të organizohej në mënyrë që të mos lejonte përshkallëzimin e presionit.
Pas përfundimit të pjesës së parë, ndeshja u ndërpre për shkak të kushteve të vështira atmosferike. Stuhi e fortë në Filadelfia ndikoi drejtpërdrejt në vazhdimin e lojës dhe protokolli i sigurisë në Shtetet e Bashkuara u aktivizua menjëherë. Sipas këtij protokolli, çdo goditje rrufeje brenda një rrezeje prej 13 kilometrash nga stadiumi sjell ndërprerjen e menjëhershme të aktivitetit. Lojtarët u drejtuan drejt dhomave të zhveshjes, ndërsa tifozët u udhëzuan të strehoheshin në zona të sigurta.
Ndërprerja nuk u mbyll shpejt, pasi çdo goditje e re rrufeje rifillonte numërimin 30-minutësh. Kjo bëri që pauza të zgjaste më shumë se dy orë, duke e kthyer përballjen në një ndeshje me ritëm të çrregullt për shkak të kushteve jashtë kontrollit të të dyja skuadrave. Vetëm pasi u përmirësuan kushtet atmosferike, skuadrat u rikthyen në fushë për nxehjen dhe ndeshja rifilloi. Në total, takimi zgjati katër orë, nga fillimi në ora 23:00 me orën lokale dhe deri në përfundim në ora 03:00 pas mesnate.
Mbappe mban “standartin”, Franca vulos 3-0 ndaj Irakut
Pauza e gjatë nuk i prishi planet e francezëve. Sapo rifilloi ndeshja, skuadra e menaxhoi qetë ritmin dhe gjeti golin e dytë në minutën e 54-të. Në këtë aksion, një gabim i rëndë në mbrojtjen irakiane i hapi rrugë Ousmane Dembélé, i cili përfitoi nga situata dhe ia shërbeu Kylian Mbappes. Ky i fundit realizoi golin e dytë personal, duke e çuar rezultatin në 2-0 dhe duke e bërë shumë më të vështirë rikthimin e Irakut.
Franca ishte pranë golit të tretë edhe pak minuta më pas. Michael Olise goditi traversën, duke treguar se skuadra po kërkonte vazhdimisht hapësirat për ta mbyllur përfundimisht takimin. Ndërkohë, Adrien Rabiot kishte rast për të shënuar me kokë nga afërsia, por nuk arriti të dërgonte topin në rrjetë. Pavarësisht këtyre mundësive, rezultati nuk ndryshoi deri në minutën e 66-të, kur erdhi edhe goli që e vulosi ndeshjen.
Triumfi i “gjelave” u konfirmua në minutën e 66-të: Olise asistoi për Ousmane Dembélé, i cili shënoi pa vështirësi, duke e çuar rezultatin në 3-0. Pas kësaj, Franca e ruajti avantazhin deri në fund, duke e mbyllur takimin me një fitore të qartë dhe të merituar. Me këtë rezultat, Franca vazhdon me hap të sigurt rrugëtimin në Kupën e Botës, ndërsa Iraku mbetet me shpresa të pakta për kualifikim në fazën e eliminimit direkt.
Botuar fillimisht në Telegrafi
