Balluket janë një nga mënyrat më të shpejta për ta rifreskuar pamjen, pa hequr dorë nga gjatësia e flokëve që ju pëlqen. Këtë vjeshtë, stilistët po theksojnë një ide të thjeshtë: shpesh mjaftojnë disa lëvizje me gërshërë që flokët të duken krejt ndryshe. Balluket e formësuara mirë mund të theksojnë sytë, të zbusin tiparet e fytyrës dhe t’i japin modelit më shumë gjallëri, sidomos kur flokët fillojnë të humbasin densitetin me kalimin e viteve.
Me kalimin e moshës, flokët mund të bëhen më të hollë dhe thinjat mund të ndryshojnë strukturën, duke i bërë fijet më të ashpra ose më të thata. Pikërisht për këtë arsye, përzgjedhja e ballukeve duhet të synojë dy gjëra: të mos kërkojnë shumë kujdes dhe, njëkohësisht, të sjellin butësi e volum te pamja e përgjithshme. Modelet më poshtë janë zgjedhje që ndërthurin elegancën, natyrshmërinë dhe atë prekje moderne që shfaqet te shumë stile “franceze”.
1) Balluket midi – të lehta dhe moderne
Nëse doni një ndryshim të butë, balluket midi janë një opsion i përshtatshëm. Ato përfundojnë pak mbi vetulla dhe dallohen për strukturën e lehtë e të ajrosur. Ndryshe nga balluket shumë të dendura dhe të prera drejt, balluket midi bien butësisht mbi ballë pa e mbuluar tepër fytyrën.
Një shembull i njohur është Halle Berry, që i kombinon këto balluke me një prerje të shkurtër “bob”. Ky kombinim nxjerr në pah mollëzat dhe i jep fytyrës një pamje moderne, me një prekje lozonjare që nuk duket e tepruar. Për shumë persona, ky model është edhe më i lehtë për t’u mbajtur, pasi nuk e “ngarkon” pjesën e sipërme të fytyrës.
Balluket e vjeshtës që ruajnë gjatësinë dhe i japin flokëve volum
2) Balluket e krehura anash – femërore dhe praktike
Nëse nuk jeni të sigurt për balluke shumë të qarta e fikse, provoni balluket e krehura anash. Ato janë më të gjata dhe lidhen natyrshëm me pjesën tjetër të flokëve, prandaj edhe kur rriten, vazhdojnë të duken bukur. Ky model duket veçanërisht mirë te flokët paksa të valëzuar, sepse valët krijojnë kalim më të butë.
Një shembull ikonë është Pamela Anderson, e cila dëshmon se ky stil mund të duket femëror dhe i çlirët. Përparësia kryesore është se balluket, edhe kur rriten, nuk kërkojnë vizita të shpeshta te parukierja. Gjithashtu, ndarja anash e flokëve është rikthyer fuqishëm në modë, duke i dhënë këtij modeli një orientim të qartë drejt trendit.
3) Balluket Birkin – elegancë franceze me një prekje lozonjare
Të frymëzuara nga legjendarja Jane Birkin, këto balluke janë konsideruar prej dekadash si simbol i elegancës së natyrshme franceze. Për këtë vjeshtë, ato shfaqen në një variant më të çlirët: me maja paksa të çrregullta dhe me strukturë më të theksuar. Fillesat nuk kanë nevojë të duken të lëmuara në mënyrë perfekte, sepse pikërisht natyraliteti u jep hijeshi të veçantë.
Penélope Cruz është një nga gratë e njohura që i mban këto balluke, duke treguar sa harmonikë mund të duken kur janë të lehta në dukje. Pak lëvizje natyrale u jep një “elegancë të paqëllimtë”, që e bën pamjen më të gjallë pa e bërë të duket e stiluar tepër.
4) Balluket e dendura, por të lehta – për një pamje elegante
Nëse preferoni balluke më të theksuara, përsëri mund të krijoni një rezultat elegant pa e mbyllur fytyrën. Qelësi është të shmangni prerjet tepër të rënda dhe të drejta, të cilat mund ta bëjnë pamjen më të “rëndë” ose t’i japin fytyrës një ndjesi më të mbyllur. Ky model thekson balluket e plota, por me një përpunim që ruan lehtësinë.
Monica Bellucci e shfaq këtë stil me sukses: balluket e saj janë më të plota, por majat e formësuara butësisht dhe disa fije më të holla krijojnë një pamje harmonike. Ky kombinim përshtatet si me flokë të gjatë, ashtu edhe me gjatësi mesatare, duke e bërë modelin fleksibël për stile të ndryshme.
5) Balluket perde – të buta dhe rinore
Curtain bangs, të njohura si “balluket perde”, vazhdojnë të jenë ndër më të pëlqyerat. Ato ndahen në mes dhe bien në të dyja anët e fytyrës, duke kornizuar butësisht ballin. Për këtë vjeshtë, vëmendja përqendrohet te variantet më të shkurtra dhe më të buta, që japin një efekt rinor dhe të freskët.
Laura Dern i mban të ndara lehtë në mes, me fije që kornizojnë ballin dhe tëmthat. Ky model krijon përshtypjen e një fytyre më të hapur dhe i jep flokëve lëvizje natyrale. Përveç pamjes, balluket perde janë edhe shumë praktike: kombinohen lehtësisht si me flokë të lëshuar, ashtu edhe me flokë të lidhur bisht ose topuz.
Cili model është më i përshtatshëm?
Zgjedhja e ballukeve nuk duhet të bazohet vetëm te mosha apo te trendet e momentit. Forma e fytyrës, dendësia e flokëve, struktura e tyre dhe koha që dëshironi t’i kushtoni stilimit janë po aq të rëndësishme. Në fund, modeli më i bukur është ai që nxjerr në pah tiparet tuaja natyrale dhe ju bën të ndiheni mirë me pamjen tuaj.
Botuar fillimisht në Telegrafi
