Një ngjarje e rëndë ka tronditur komunitetin shqiptar në qytetin e Chiari-t, në Itali. Sipas të dhënave që po hetohen nga autoritetet, 21-vjeçari Eduart Xh dyshohet se vrau nënën e tij, 39-vjeçaren Meleqe L, duke e goditur disa herë me thikë.
Pas krimit, i riu është larguar nga banesa. Në orët e para të mëngjesit ai është paraqitur vetë në komandën provinciale të Karabinierëve në Cremona, ku ka rrëfyer ngjarjen dhe ka pranuar autorësinë për atë që kishte ndodhur.
Pas dëshmisë së tij, efektivët u nisën drejt banesës ku jetonin nënë e bir, në rrugën Via Tagliata Traversa II. Aty ata kanë gjetur trupin e pajetë të 39-vjeçares, ndërsa hetimet kanë nisur menjëherë për të zbardhur rrethanat e ngjarjes dhe për të kuptuar çfarë e çoi të riun drejt një veprimi të tillë.
Eduart Xhani është arrestuar nën akuzën e vrasjes me dashje. Ndërkohë, motivi i krimit mbetet ende i paqartë dhe autoritetet po punojnë për të kuptuar nëse mes nënës dhe të birit kishte pasur konflikte, tensione familjare apo ndonjë problem të mëparshëm që mund të ketë ndikuar në dinamikën e ngjarjes.
Rrëfimi në Karabinierë, hetime për motivin e krimit
Ngjarja ka shkaktuar tronditje të thellë edhe në zonë, jo vetëm për ashpërsinë e veprës, por edhe për faktin se familja ishte e njohur dhe e integruar në jetën sociale të qytetit. Të njohurit dhe përfaqësuesit e komunitetit janë shprehur se nuk kishin pritur një skenar të tillë.
Denis Beqiri, president i Shoqatës Shqiptare në Chiari, ka thënë se është i tronditur nga ajo që ka ndodhur. Ai e ka përshkruar 21-vjeçarin si një djalë të sjellshëm dhe të përkushtuar, duke theksuar se nuk e kishte të lehtë ta pranonte një ngjarje të këtij lloji. Beqiri ka deklaruar se Eduarti ishte një shembull për komunitetin dhe se veprimi i tij vlerësohet si i pafalshëm, duke shtuar se nuk arrihet të kuptohet çfarë ka ndodhur.
Në të njëjtën linjë, Beqiri ka treguar edhe rrugëtimin arsimor e profesional të Eduart Xhanit. Ai kishte kryer një praktikë në agjencinë e imobiliare të lidhur me aktivitetin e tij, pas përfundimit të studimeve në institutin “Einaudi” në Chiari. Sipas tij, i riu rezultonte i aftë në përdorimin e programeve CAD, ishte modest dhe i përkushtuar, dhe Beqiri i kishte dhënë vlerësimin maksimal për punën e tij gjatë praktikës.
Më pas, Eduart Xhani kishte nisur të punonte me të afërmit e tij në ndërtim. Më vonë ai kishte gjetur punë në një kompani të zonës, por aktualisht nuk rezultonte më i punësuar. Ndërkohë, nëna e tij, Meleqe Lusha, punonte në një kooperativë që administronte shërbimin e mensës në Spitalin Civil të Brescias. Lidhur me jetën familjare, mediat italiane kanë raportuar se nënë e bir jetonin vetëm në banesën ku ndodhi krimi.
Sipas të njëjtave të dhëna, 39-vjeçarja e kishte rritur djalin me ndihmën e katër vëllezërve të saj. Eduarti është përshkruar si person i rezervuar dhe se frekuentonte shpesh palestrën. Për të dhënat e deritanishme që dalin nga komuniteti, kryebashkiaku i Chiari-t, Gabriele Zotti, ka deklaruar se familja ishte e njohur në komunitet dhe se më parë nuk kishte pasur asnjë shenjë që të paralajmëronte një situatë problematike. Ai ka thënë se askush nuk kishte vënë re ndonjëherë diçka që të krijonte dyshime për probleme.
Autoritetet italiane vijojnë hetimet për të zbardhur plotësisht dinamikën e ngjarjes dhe për të përcaktuar motivin që çoi në këtë krim të rëndë. Ndërsa çështja është në fazë hetimore, vëmendja mbetet te rindërtimi i ngjarjeve, verifikimi i të dhënave rreth marrëdhënieve familjare dhe sqarimi i rrethanave që paraprinë momentin kur u krye vrasja.
Botuar fillimisht në Telegrafi
