Gjatë 24 orëve të fundit në Shqipëri janë raportuar 21 vatra zjarri, ndërkohë që 11 prej tyre vijojnë të jenë aktive. Shifrat dhe përditësimi më i fundit i situatës janë bërë publik nga Ministria e Mbrojtjes, e cila tregon se në terren janë angazhuar struktura të shumta për shuarjen e flakëve dhe parandalimin e përhapjes së tyre.
Sipas përmbledhjes zyrtare, nga 21 vatrat e raportuara 5 janë nën mbikëqyrje dhe 5 janë fikur. Në operacione janë përfshirë 587 forca operacionale vendore, 52 automjete zjarrfikëse, si dhe 550 efektivë të Forcave të Armatosura, të shoqëruar nga 7 automjete zjarrfikëse të FA. Për të rritur kapacitetin e ndërhyrjes, operacionet mbështeten edhe nga mjetet ajrore, me 4 helikopterë dhe 1 avion Air Tractor.
Situata paraqitet veçanërisht problematike në disa zona, ku flakët vijojnë të jenë ende aktive. Në Fier, konkretisht në aksin Drizë/Radostinë, Vadhizë, Peshtan dhe Levan, zjarret raportohen se vazhdojnë të jenë aktive. Për këto vatra janë angazhuar 13 automjete zjarrfikëse, 4 autobote, 55 efektivë, 90 FP dhe 104 forca ushtarake, ndërsa ndërhyrja mbështetet edhe nga 1 helikopter dhe 1 Air Tractor.
Zjarret vijojnë me intensitet, 11 vatra mbeten aktive
Në Shkodër, zjarri në zonën e Bardhaj vazhdon të jetë aktiv. Në këtë rast operacionet përfshijnë 5 automjete zjarrfikëse dhe struktura vendore, ndërsa mbështetja nga Forcat e Armatosura realizohet me 1 automjet zjarrfikës dhe 1 helikopter. Angazhimi i strukturave të ndryshme shkon paralelisht me përpjekjet për kontrollin e vatrës dhe kufizimin e rrezikut në afërsi të zonave të banuara.
Edhe në qarkun e Matit situata kërkon ndërhyrje të vazhdueshme. Në Lundre dhe Madhesh, operacioni mbështetet me 30 efektivë të Forcave të Armatosura. Ndërkohë, në Himarë, teksa bëhej fjalë për një vatër që mbrëmjen e së premtes rriti frikën edhe tek banorët dhe turistët në zonë, në përditësimin e Ministrisë së Mbrojtjes thuhet se zjarri në lagjen “1 Maji” është fikur.
Për shuarjen e zjarrit në Himarë u realizua një angazhim i gjerë: janë përdorur 26 automjete zjarrfikëse, forca vendore, policore e vullnetare, si dhe 183 efektivë. Ndërkohë, në terren janë raportuar 2 zjarrfikëse dhe 2 ambulanca, si dhe 2 helikopterë të Forcave të Armatosura. Në të dhënat e raportuara për pasojat, thuhet se janë djegur 6 banesa, prej tyre 3 të banuara, dhe janë evakuuar 36 persona.
Për Dajtin, vatrat vijojnë të jenë aktive. Sipas përditësimit, në këtë zonë janë angazhuar 30 forca vendore dhe 50 efektivë të Forcave të Armatosura. Gjithashtu, Qinami mbahet nën mbikëqyrje dhe nuk paraqet rrezik për zonat e banuara. Vatra aktive raportohet edhe në Vajkal, Mallunxë–Lis, Gallatë, Kalivaç–Zimaj–Kashnjet, Krastë të Elbasanit, Iballë dhe Krepse, ndërsa vijon mbikëqyrja në disa zona të tjera. Në Mavrovë të Selenicës dhe në malin “Partizan” në Berat, zjarret janë fikur.
Agjencia Kombëtare e Mbrojtjes Civile (AKMC) vijon të ndjekë situatën në të gjithë territorin e vendit në mënyrë të pandërprerë, në koordinim të ngushtë me prefekturat, bashkitë dhe të gjitha strukturat e sistemit të Mbrojtjes Civile. Kapacitetet operacionale janë në terren dhe në gatishmëri për ndërhyrje aty ku situata e kërkon, me prioritet mbrojtjen e jetës, banesave dhe pasurisë së qytetarëve.
Botuar fillimisht në Bota Sot
