Kur temperaturat rriten, shumica prej nesh ndezin klimën dhe kërkojnë ftohje sa më të shpejtë. Në të vërtetë, për një rezultat më të mirë nuk mjafton vetëm të vendosni temperaturën që dëshironi në telekomandë. Një detaj që shpesh neglizhohet, por që ndikon drejtpërdrejt në mënyrën si ftohet hapësira, lidhet me pozicionin e krahëve të klimës—lamelave që drejtojnë qarkullimin e ajrit.
Klima nuk e ftoh dhomën duke “fryrë të ftohtë” në një pikë të vetme. Ajo nxjerr ajër të ftohtë që më pas shpërndahet në hapësirë. Pikërisht si e drejton ky ajër varet nga shpejtësia me të cilën ulet temperatura, nga barazia e ftohjes në dhomë dhe, në fund, nga komoditeti që ndjeni gjatë përdorimit të pajisjes.
Shumë persona bëjnë një gabim të zakonshëm: i vendosin krahët drejt vetes, duke menduar se kështu dhoma do të ftohet më shpejt. Në praktikë, shpesh ndodh e kundërta. Ju mund të ndjeni menjëherë rrymë të ftohtë në trup, ndërsa pjesa tjetër e dhomës mbetet më e ngrohtë për më gjatë. Kjo do të thotë se ftohja nuk është e njëtrajtshme, dhe në disa raste pajisja mund të punojë më shumë pa marrë rezultatin që prisni.
Rritja e efikasitetit: krahët lart drejt tavanit
Gjatë muajve të verës, pozicioni më i rekomanduar i krahëve të klimës është lart, drejt tavanit. Arsyeja është e thjeshtë: ajri i ftohtë zbret natyrshëm poshtë. Kur lamelat e klimës e drejtojnë ajrin kah tavani, ai shpërndahet fillimisht në pjesën e sipërme të dhomës. Pastaj, gradualisht zbret dhe e ftoh hapësirën në mënyrë më të barabartë.
Ky pozicion sjell disa përfitime konkrete. Së pari, ju merrni një temperaturë më të këndshme në të gjithë dhomën. Së dyti, zvogëlohen ndjesitë e rrymës së ftohtë që godet drejtpërdrejt trupin. Në këtë mënyrë, ftohja bëhet më e barabartë, dhe pajisja punon më efikase, sepse ajri shpërndahet aty ku duhet dhe në një model që ndihmon që dhoma të arrijë më shpejt gjendjen e dëshiruar.
Një element tjetër i rëndësishëm është funksioni “Swing”, i cili njihet si lëvizja automatike e krahëve. Në shumë klima moderne, kjo lëvizje është e programuar që krahët të lëvizin vazhdimisht lart-poshtë, ndërsa në disa modele mund të lëvizin edhe majtas-djathtas. Kur “Swing” aktivizohet, ajri i ftohtë shpërndahet në një sipërfaqe më të madhe të dhomës, duke e bërë më të lehtë barazimin e temperaturës në hapësirë.
Opsioni “Swing” rezulton veçanërisht i dobishëm kur dhoma është më e madhe dhe kur aty ka më shumë persona gjatë ditëve shumë të nxehta. Gjithashtu, është i përshtatshëm kur doni të shmangni fryrjen e vazhdueshme në një drejtim të vetëm. Shpesh, një qasje praktike është: përdoreni “Swing” për 15 deri në 30 minutat e para të ftohjes, në mënyrë që temperatura të ulet më shpejt dhe më në mënyrë të shpërndarë, dhe më pas kaloni në një pozicion fiks ku krahët të mbeten të drejtuar kah tavani.
Për përdorim gjatë natës, këshillat bëhen edhe më të drejtpërdrejta. Shumë njerëz raportojnë se zgjohen të ngurtësuar ose me zë të ngjirur pas një nate kur klima ka qenë e ndezur. Për ta shmangur këtë, shmangni që ajri të drejtohet direkt kah shtrati. Nëse pajisja e ka funksionin e natës, “Sleep Mode”, përdoreni atë dhe vendosni krahët drejt tavanit. Përveç kësaj, ulni shpejtësinë e ventilatorit, në mënyrë që ajri të shpërndahet në të gjithë dhomën pa fryrë drejtpërdrejt mbi personin që fle.
Botuar fillimisht në Telegrafi
