Debati rreth rolit të Cristiano Ronaldos në rrugëtimin e Portugalisë drejt Kupës së Botës 2026 vijon të jetë po aq i fortë sa ka qenë në Euro 2024 dhe në Botërorin e Katarit 2022. Për disa, sulmuesi portugez mbetet arma kryesore e skuadrës kombëtare, një faktor që mund të bëjë diferencën në momentet vendimtare. Për të tjerë, prania e tij në fushë pengon një ekip plot talent për të shfaqur potencialin maksimal.
Megjithatë, Ronaldo vazhdon të sfidojë kohën. Ai është gati të marrë pjesë në Kupën e tij të gjashtë të Botës, një rekord absolut në futbollin modern. Ky arritje e pazakontë e vendos përkrah Lionel Mesit dhe portierit Ochoa te Meksikës, emra që kanë shkruar historinë në turnetë më të mëdha ndërkombëtare.
Në moshën 41-vjeçare, Cristiano Ronaldo mbetet një superyll global, edhe pse prej kohësh ka lënë futbollin elitë europian për t’iu bashkuar klubit saudit Al Nasr. Ai vazhdon të jetë golashënuesi më i mirë në historinë e futbollit të kombëtareve, me plot 144 gola. Nga këta, 25 janë shënuar në vetëm 30 ndeshje nën drejtimin e trajnerit Roberto Martinez, i cili ka këmbëngulur se Ronaldo luan “për meritë” dhe jo për shkak të emrit apo statusit të tij.
Ronaldo, Martinez dhe gara drejt Botërorit 2026
Fakti që Martinez vendosi të vazhdonte me Ronaldon nuk ka qenë pa kosto. Pas eliminimit të Portugalisë në çerekfinalet e Euro 2024, trajneri spanjoll u përball me kritika. Shumë analistë mendonin se skuadra portugeze kishte potencialin për të fituar turneun, ndërsa debati u përqendrua te mënyra si ishte planifikuar skuadra dhe si po përdorej kapiteni.
Martinez e aktivizoi Ronaldon titullar në të pesë ndeshjet e Portugalisë në Gjermani, por sulmuesi nuk arriti të shënonte asnjë gol në atë eveniment. Kur trajneri mori drejtimin e kombëtares në vitin 2023, ai u përball me dy alternativa: ose të mbyllte epokën e Ronaldos, ose ta mbante atë si kapiten dhe lider të ekipit. Ai zgjodhi opsionin e dytë dhe për t’iu përgjigjur kritikave, Martinez ka theksuar suksesin në Ligën e Kombeve 2025, ku Portugalia triumfoi dhe Ronaldo luajti një rol të rëndësishëm.
Në finalen e turneut, Ronaldo shënoi kundër Spanjës, duke i dhënë Portugalisë një tjetër trofe. Për yllin portugez, ky ishte trofeu i tretë me kombëtaren pas Euro 2016 dhe Nations League 2019. Pas finales, Ronaldo tha: “Kam fituar shumë tituj me klubet, por asgjë nuk është më e bukur sesa të fitoj për Portugalinë. ‘Këto janë lot gëzimi’. Është një mision i përmbushur dhe lumturi e pastër”.
Përtej Botërorit, Ronaldo po ndjek edhe një objektiv tjetër historik: arritjen e 1000 golave në karrierë mes klubeve dhe kombëtares. Ai vazhdon të jetë kapiteni dhe lideri i Portugalisë, një figurë që frymëzon shokët e skuadrës dhe respektohet nga kundërshtarët. Përvoja e tij ndërkombëtare shtrihet në më shumë se dy dekada, që nga debutimi me Portugalinë në vitin 2003. Martinez ka vlerësuar shpesh “mentalitetin frymëzues” të veteranit, i cili tashmë luan si sulmues qendror dhe jo si anësori shpërthyes që ishte në vitet e rinisë.
Edhe në radhët e skuadrës ka mbështetje. Mesfushori i PSG-së, Vitinha, ka deklaruar për FIFA-n: “Është fantastike të luash me të. Ai është një nga futbollistët më të mëdhenj në histori. Jam krenar që ndaj dhomën e zhveshjes me të, mësoj prej tij dhe shoh profesionalizmin e tij çdo ditë. Shpresojmë të fitojmë Kupën e Botës me të dhe për të”. Por pavarësisht kësaj, jo të gjithë e shohin Portugalinë domosdoshmërisht më të fortë me Ronaldon në fushë.
Në Portugali, ku ai konsiderohet ikonë kombëtare, është e vështirë të dëgjosh kritika të hapura. Megjithatë, disa analistë argumentojnë se skuadra luan më lirshëm dhe me më shumë rrjedhshmëri pa praninë e tij. Debati u prek edhe nga ish-mesfushori portugez Manuel Fernandes, i cili e pranoi këtë diskutim në fund të vitit 2025: “E di çfarë thonë njerëzit, se luajmë më mirë pa Ronaldon, se lojtarët janë më të lirë dhe më të rrjedhshëm. Nëse kjo ndodh, është pjesërisht edhe faji ynë. Nuk duhet të shqetësohemi nëse Kristiano është në fushë, sepse ai mund të na japë gjëra që askush tjetër nuk mund t’i japë”.
Disa ekspertë theksojnë se presioni i Portugalisë ndaj kundërshtarit nuk është aq efektiv kur Ronaldo është në fushë dhe se skuadra duket më kompakte pa të. Sipas tyre, shpesh krijohet përshtypja se ekipi punon kryesisht për ta furnizuar me topa sulmuesin. Megjithatë, pavarësisht diskutimeve, Ronaldos nuk i mungon besimi për të vazhduar të luajë rolin e tij.
Portugalia do ta nisë aventurën në Grupin K më 17 qershor, përballë Republikës Demokratike të Kongos. Më pas do të përballet me Uzbekistanin më 23 qershor dhe me Kolumbinë më 28 qershor. Martinez nuk është i shqetësuar se ritmi intensiv i turneut mund të ndikojë te lojtari 41-vjeçar. Ai ka thënë: “Në përvojën time, në një Kupë Bote një futbollist nuk ndjek domosdoshmërisht formën e klubit, moshën apo faktorë të tjerë. Botërori është një histori krejt tjetër”. Portugalia hyn në këtë turne me një nga skuadrat më të forta në historinë e saj, dhe teksa debati për Ronaldon vazhdon, një gjë mbetet e padiskutueshme: cilësia e kësaj skuadre është e mjaftueshme për të ëndërruar trofeun më të madh të futbollit.
Botuar fillimisht në Bota Sot
