Federata Shqiptare e Futbollit ka arritur të përmirësojë imazhin e saj në opinionin publik gjatë viteve të fundit, duke e çuar perceptimin pozitiv të qytetarëve në nivele më të larta. Ky konkluzion del nga raporti “UEFA Grow Market Research”, i realizuar nga UEFA në bashkëpunim me agjencinë Nielsen, i cili analizon sesi publiku shqiptar e percepton futbollin dhe institucionet që e drejtojnë atë.
Studimi tregon se perceptimi neto pozitiv për FSHF-në është rritur nga 47% në vitin 2016 në 52% në vitin 2026. Një tjetër gjetje e rëndësishme lidhet me mënyrën si e shohin qytetarët rolin e Federatës: 47% e të anketuarve deklarojnë se kanë një imazh të fortë pozitiv për FSHF-në. Sipas raportit, ky tregues rezulton më i lartë se mesatarja europiane, si dhe më i lartë se imazhi që kanë për institucionet e tjera sportive në Shqipëri.
Raporti evidenton edhe se sa mirë e kupton publiku aktivitetin e Federatës. Niveli i njohjes së rolit të FSHF-së në administrimin, zhvillimin dhe promovimin e futbollit vlerësohet të jetë dukshëm më i lartë se mesatarja europiane. Në shifra konkrete, besimi i qytetarëve se e kuptojnë rolin dhe aktivitetin e Federatës del 43% më i lartë se benchmark-u europian.
Njohja rritet, prandaj rritet edhe perceptimi pozitiv
Një nga rezultatet më të qarta të studimit është lidhja direkte mes njohjes së punës së Federatës dhe qëndrimit pozitiv ndaj saj. Sa më shumë që qytetarët deklarojnë se e njohin aktivitetin e FSHF-së, aq më pozitiv bëhet perceptimi. Për shembull, mes atyre që thonë se e njohin mirë punën e Federatës, 83% shprehen pozitivisht për institucionin.
Në anën e vlerave, shqiptarët e përshkruajnë FSHF-në si një organizatë respektuese, progresive, e përgjegjshme dhe kompetente. Këto perceptime forcohen edhe më shumë te grupet e publikut që janë më të informuara për aktivitetet dhe projektet e Federatës, çka nënkupton se komunikimi dhe prezantimi i iniciativave kanë ndikim në mënyrën si shihet institucioni.
Raporti shpjegon gjithashtu arsyet pse publiku mban një opinion pozitiv. Shumica e të anketuarve e lidhin këtë perceptim me progresin dhe përmirësimin e vazhdueshëm të futbollit shqiptar. Në këtë kuadër përmenden zhvillimi i futbollit për fëmijë dhe të rinj, investimet në infrastrukturë, si edhe sukseset e Kombëtares shqiptare në arenën ndërkombëtare.
Në pjesën e iniciativave, studimi evidenton nivel të lartë njohjeje. Plot 63% e shqiptarëve deklarojnë se njohin të paktën një projekt ose iniciativë të FSHF-së. Ndër iniciativat, “Projekti 100 Fushat” del si iniciativa më e njohur, ndërsa programi “Topi Yt” gjeneron një ndikim të fortë emocional dhe perceptim pozitiv te publiku.
Një tjetër tregues domethënës është lidhja e fortë mes Federatës dhe ekipit kombëtar: 68% e shqiptarëve e lidhin FSHF-në me Kombëtaren shqiptare. Raporti thekson se ky nivel është rritur krahasuar me vitin 2016, duke reflektuar se rezultatet dhe prania e ekipeve kombëtare kanë ndikim në identitetin dhe imazhin e futbollit shqiptar. Në të njëjtën kohë, rritet edhe pritshmëria për investime dhe mbështetje: 85% e të anketuarve mendojnë se futbolli duhet të mbështetet më shumë financiarisht, ndërsa 81% vlerësojnë se nevojiten politika dhe iniciativa shtesë për zhvillimin e tij.
Gjetjet e raportit konfirmojnë se investimet, projektet e zhvillimit dhe rezultatet e arritura gjatë viteve të fundit kanë ndikuar në forcimin e imazhit të Federatës Shqiptare të Futbollit dhe në rritjen e besimit të publikut ndaj rolit të saj në zhvillimin e futbollit në vend.
Botuar fillimisht në Sport Ekspres
