Shoqata e Prodhuesve vendorë ka reaguar me një kërkesë drejtuar institucioneve të shtetit, duke kërkuar mbrojtje të zinxhirit vendor të prodhimit. Thirrja vjen pas tensioneve që janë shfaqur në sektorin e qumështit, ku çështjet e konkurrencës dhe pretendimet për produkte të importuara kanë sjellë shqetësim te prodhuesit vendorë.
Pak ditë më parë, Qumështorja “Vita” u mbyll pas një inspektimi nga institucionet. Pas këtij vendimi, bordi i kompanisë u ankua se në treg po lejohen produkte të importuara, me pretendimin se ato shiten me çmim më të lirë se në tregjet e vendeve përkatëse. Për pasojë, çështja mori vëmendje edhe pas protestave të fermerëve, të cilat çuan në një marrëveshje të përbashkët me Ministrinë e Bujqësisë.
Sipas dakordimit të arritur, deri më 12 korrik duhet të publikohen rezultatet e inspektimit në “Vita”. Në këtë kontekst, Shoqata e Prodhuesve, në një komunikatë për media, ka kërkuar veprim të menjëhershëm nga institucionet, me synim mbrojtjen e prodhuesve vendorë dhe sqarimin e asaj që është verifikuar përmes kontrolleve.
Prodhuesit kërkojnë veprim të shpejtë për analizat dhe mbështetjen e tregut vendor
Në komunikatën e përbashkët me Odën Ekonomike, prodhuesit kanë formuluar pesë kërkesa kryesore për institucionet. Kërkesa e parë lidhet me publikimin e menjëhershëm të rezultateve të analizave zyrtare. Shoqata i drejtohet Agjencisë së Ushqimit dhe Veterinarisë (AUV) dhe Ministrisë së Bujqësisë, Pylltarisë dhe Zhvillimit Rural që të bëjnë publike rezultatet e mostrave të marra, bazuar në analiza laboratorike zyrtare dhe transparente. Sipas kërkesës, publikimi i këtyre rezultateve ka për qëllim eliminimin e çdo paqartësie në treg.
Kërkesa e dytë është për mbështetje konkrete institucionale për prodhuesit vendorë. Prodhuestit kërkojnë që Qeveria e Republikës së Kosovës të ndërmarrë masa urgjente për mbrojtjen dhe nxitjen e zinxhirit prodhues vendor përmes politikave fiskale nxitëse, lehtësimeve administrative, diplomacisë ekonomike dhe mekanizmave të tjerë mbështetës. Përmes këtyre masave, synohet të përmirësohet pozicioni i prodhuesve në treg dhe të krijohen kushte më të favorshme për vazhdimin e aktivitetit.
Një tjetër pikë e listës, e treta, ka të bëjë me ndalimin e deklarimeve dhe veprimeve që mund ta dëmtojnë sektorin pa bazë faktike. Shoqata kërkon që çdo pretendim për cilësinë apo sigurinë e produkteve ushqimore të trajtohet përmes institucioneve kompetente dhe procedurave profesionale. Në komunikatë theksohet nevoja për të shmangur veprimet që krijojnë pasiguri te konsumatorët dhe që, njëkohësisht, dëmtojnë në mënyrë të padrejtë prodhuesit vendorë.
Kërkesat vazhdojnë me përshpejtimin e hapave për eksport në tregjet evropiane. Në pikën katër, prodhuesit kërkojnë masa konkrete që do t’u mundësojnë eksportin e produkteve me bazë shtazore në tregun evropian. Kjo përfshin avancimin e proceseve për njohjen e certifikatave përkatëse, të lëshuara nga institucionet vendore, në mënyrë që prodhuesit të mund të kalojnë më shpejt barrierat e tregut dhe të rrisin qarkullimin e produkteve.
Pika e pestë lidhet me standardet profesionale në raportim dhe mbikëqyrje. Shoqata kërkon që institucionet dhe të gjitha palët e përfshira të veprojnë mbi bazën e ligjeve në fuqi dhe standardeve profesionale. Në këtë mënyrë, synohet të garantohet një treg i rregullt dhe i kontrolluar, ku proceset e inspektimit dhe mbikëqyrjes të jenë të mbështetura në rregullat ekzistuese dhe në verifikime të qarta.
Botuar fillimisht në Koha.net
