Elvis Plori, trajneri i Besëlidhjes, foli në emisionin “Kubi Sportiv” në Euronews për fazën “Final Four” të Superiores dhe shanset e Vllaznisë për titull kampion. Ndërsa kampionati hyn në vendimtare, Plori u ndal te momenti që po përjeton skuadra shkodrane, duke theksuar se hyrja në këtë fazë vjen me një bazë të fortë brenda ekipit dhe me lojtarë që i njohin mirë kërkesat e një gare të tillë.
Sipas Plorit, Vllaznia ka një avantazh të rëndësishëm sepse ruan një bosht të konsoliduar prej vitesh. Ai përmendi emra konkretë si Gurishta, Krymi dhe Balaj, duke thënë se këta futbollistë kanë krijuar eksperiencë dhe profesionalizëm, pasi luajnë bashkë prej kohësh. Për trajnerin e Besëlidhjes, ky kohezion i brendshëm është arma më e fortë e skuadrës, sidomos në momente kur ndeshjet kërkojnë karakter dhe qëndresë deri në fund.
“Jo vetëm Shkodra, por të katër ekipet finaliste po e presin me padurim këtë fazë”, u shpreh Plori, duke nënvizuar se vëmendja e javëve të fundit ka qenë e përqendruar pikërisht te Final Four. Ai kujtoi se Shkodra ka plot 25 vite që pret rikthimin e titullit, dhe sipas tij ky është një shans i veçantë jo vetëm për qytetin dhe tifozët, por edhe për të gjithë ata faktorë që vitet e fundit kanë qenë pranë suksesit. Në këtë kuptim, trajneri tha se këtë sezon besimi duket më i madh se në të shkuarën.
Por Plori nuk e pa këtë vetëm si festë. Ai paralajmëroi se euforia mund të kthehet në problem, duke qenë se, sipas tij, në sezonet e fundit kjo ka qenë një nga dobësitë kryesore të Vllaznisë. Trajneri vuri theksin te rreziku që tensionet dhe deklaratat mund të prishin ekuilibrin e skuadrës. “Euforia ka qenë një problem për Vllazninë ndër vite”, tha ai, duke shtuar se edhe këtë herë duhet pasur kujdes, veçanërisht për shkak të situatës dhe tensioneve që lidhen me Dinamon.
Kujdes euforia dhe tensionet me Dinamon
Në analizën e tij, Plori vlerësoi edhe rivalitetin mes Vllaznisë dhe Dinamos, duke e lidhur këtë me ndikimin që mund të ketë te gara për titull. Ai tha se deklaratat dhe tensionet me Dinamon mund të ndikojnë negativisht, ndaj në këto momente qetësia dhe ekuilibri janë shumë të rëndësishme. Për trajnerin, Vllaznia duhet të ruajë fokusin në fushë, në mënyrë që ritmi i përgatitjes dhe performanca të mos dëmtohen nga faktorë jashtë kontrollit të lojës.
Plori foli gjithashtu për përballjet e kësaj faze dhe forcën e ekipeve të tjera. Ai e cilësoi Elbasanin si rival të fortë, duke theksuar se është skuadër që luan mirë në tranzicion dhe ka lojtarë të shpejtë. Në të njëjtën linjë, për Dinamon ai tha se pas fitimit të Kupës hyn pa shumë presion, çka, sipas tij, mund ta bëjë më të rrezikshëm ekipin për vazhdimin e garës për titull.
Ndërkohë, për Egnatian, Plori përmendi se largimi i trajnerit në fund të sezonit mund ta ketë destabilizuar disi skuadrën, edhe pse mbetet ekip me eksperiencë dhe cilësi. Në këtë kontekst, ai shprehu shpresën për një Final Four të bukur dhe me sportivitet. Për sa i përket Vllaznisë dhe ndikimit te lojtarët, trajneri foli edhe për Bekim Balajn, duke sqaruar se ai nuk është thjesht një sulmues klasik që matet vetëm me golat. Plori e përshkroi Balajn si një lojtar që punon shumë për skuadrën, ushtron presion te kundërshtarët, hap hapësira dhe ndihmon ekipin në aspekte të shumta të lojës. Ai shtoi se nuk beson se një periudhë pa gola do të ndikojë psikologjikisht te Balaj.
Në mbyllje të diskutimit, Plori u ndal edhe te projekti i Besëlidhjes. Ai konfirmoi se klubi e ka si objektiv ngjitjen në Superligë gjatë sezonit të ardhshëm. “Kemi mbyllur sezon fantastik dhe objektivi ynë është Superliga. Projekti do të vazhdojë seriozisht dhe do të ndërtojmë një skuadër konkurruese që synon ngjitjen në elitën e futbollit shqiptar”, tha trajneri. Në të njëjtën frymë, ai u shpreh se nëse Vllaznia fiton titullin, në Shkodër do të ketë festë të jashtëzakonshme, pasi Vllaznia është pjesë e jetës së qytetit dhe qyteti e pret prej shumë vitesh këtë moment.
Botuar fillimisht në Sport Ekspres
