Dhjetëra mijëra qytetarë janë mbledhur të enjten në sheshet kryesore të Prishtinës në një protestë kundër dënimit të ish-krerëve të Ushtrisë Çlirimtare të Kosovës (UÇK) nga Dhomat e Specializuara në Hagë. Tubimi është organizuar nga platforma “Liria ka Emër” dhe ka sjellë në qendër kërkesën që të ndërmerren veprime institucionale për mbrojtjen dhe lirimin e atyre që janë dënuar në kuadër të proceseve në Gjykatë.
Gjatë protestës, organizatorët dhe pjesëmarrësit kanë valëvitur flamuj të UÇK-së dhe kanë mbajtur pankarta në mbështetje të Hashim Thaçit, Kadri Veselit, Jakup Krasniqit dhe Rexhep Selimit. Mesazhi kryesor i përcjellë nga organizatorët ka qenë “Jo në emrin tonë”, ndërsa thirrjet i janë drejtuar Qeverisë dhe Kuvendit që të procedojnë ndryshimet e Ligjit për Dhomat e Specializuara. Protestuesit kanë kërkuar që çështja të mos mbetet në nivel deklaratash, por të kthehet në veprim konkret parlamentar.
Në skenë, organizatorët dhe folësit kanë folur për përpjekjet që, sipas tyre, duhet të bëhen për drejtësi dhe standarde të drejta. Një nga organizatorët, Çlirim Haziri, iu është drejtuar të rinjve me mesazhin e sakrificës së brezit të luftës, duke theksuar se drejtësia duhet të bazohet në prova dhe në standarde të drejta. Në të njëjtën vijë, edhe figura të tjera të pranishme në protestë kanë përcjellë mesazhe për angazhim institucional dhe për nevojën e trajtimit të kësaj çështjeje si prioritet shtetëror.
Ndërtesa e Qeverisë së Kosovës është bërë pjesë e simbolikës së protestës: në kuadër të tubimit është vënë flamuri i UÇK-së. Edhe ish-nënkryetari i OVL-UÇK-së, Nasim Haradinaj, ka kërkuar bashkim dhe përgjegjësi nga deputetët e Kuvendit. Në fjalimin e tij, ai u ka bërë thirrje edhe ndërkombëtarëve që, sipas tij, ta rikthejnë besimin e krijuar gjatë luftës së UÇK-së.
Protesta ka përfshirë gjithashtu edhe fjalime nga Muhamet Mavraj, Lavdije Leci dhe Gazmend Syla, të cilët kanë folur për sakrificat për lirinë e Kosovës dhe kanë kërkuar drejtësi për ish-krerët e UÇK-së. Ndërsa për platformën “Liria ka Emër”, përfaqësuesi Ismail Tasholli ka theksuar se protesta nuk është e lidhur me partitë politike. “Liria ka Emër nuk e ka ndërmend me u ndalë, po do i shohim edhe aktivitetet e tjera, prej atyre më kreative, deri te ato radikale”, ka shtuar Tasholli, duke lënë të kuptohet se organizimi do të vazhdojë edhe në forma të tjera.
Përplasje PDK-LVV mbi ndryshimet e ligjit për Specialen
Protesta ka përfunduar me tensione dhe një pjesë e protestuesve kanë tentuar të hyjnë në oborrin e Qeverisë. Pas tubimit, në skenën politike ka vazhduar përplasja rreth mënyrës se si duhet të trajtohet kjo çështje në institucione. Nënkryetarja e PDK-së, Vlora Çitaku, ka reaguar pas vendosjes së flamurit të madh të UÇK-së në objektin e Qeverisë së Kosovës, duke kërkuar që veprimet të shkojnë drejt procedimit ligjor në Kuvend. Ajo, përmes një postimi në Facebook, ka thënë se duhet vepra jo fjalë nga Albin Kurti dhe i ka bërë thirrje që “silleni ligjin në Kuvend dhe votojeni. Pa humbur kohë”. Sipas Çitakut, UÇK-ja ka nevojë për mbrojtje shtetërore dhe jo për instalacione e fjalë boshe.
Ndërkohë, edhe Lëvizja Vetëvendosje e ka lidhur fatin e këtij procesi me një çështje tjetër institucionale. Shefja e grupit parlamentar të Lëvizjes Vetëvendosje, Arbërie Nagavci, në RTK ka thënë se zgjedhja e presidentit është “prioritet mbi prioritete”. Ajo ka argumentuar se, sipas saj, asnjë çështje nuk mund të shtyhet para, përfshirë edhe lobimin shtetëror për kundërshtim të aktgjykimit dënues ndaj katërshes së UÇK-së. Nagavci ka kundërshtuar idenë se duhet votuar projektligji për Gjykatën Speciale duke e evituar me mos pjesëmarrje procesin e votimit të presidentit, duke thënë se pret përgjegjësi nga çdo akter politik për t’i kryer detyrat e tyre në Kuvend.
Në deklaratën e saj, Nagavci ka theksuar se me pjesëmarrjen në zgjedhjen e presidentit shmangen edhe zgjedhjet e reja, kursehet buxheti i shtetit dhe vendoset në funksion adresimi i temave të rëndësishme. Ajo ka përmendur përgatitjen dhe pjesëmarrjen e të gjitha institucioneve në strategjinë shtetërore për ta adresuar këtë vendim të pa drejtë në Gjykatën e Apelit. Përtej protestës, përplasja PDK-LVV ka mbetur në fokus të debatit: njëra palë kërkon procedim të shpejtë të ndryshimeve të Ligjit për Dhomat e Specializuara, ndërsa pala tjetër e lidh me renditjen e prioriteteve institucionale, duke përmendur procesin e zgjedhjes së presidentit.
Botuar fillimisht në Telegrafi
