Kompania Regjionale e Mbeturinave “Pastrimi” ka reaguar ndaj akuzave të kryetarit të Podujevës, Shpejtim Bulliqi, i cili ka shpallur gjendje emergjente për shkak të situatës së rënduar me mbeturinat. Bulliqi e ka akuzuar “Pastrimin” për keqmenaxhim dhe ka ngritur shqetësime lidhur me mënyrën se si po trajtohet kjo situatë në komunë.
Në përgjigjen e saj, “Pastrimi” thekson se Njësia Operative e Podujevës nuk ka rënë në vështirësi financiare brenda natës. Sipas njoftimit, ajo punon prej kohësh me bilanc negativ, duke e lidhur këtë gjendje drejtpërdrejt me faktin se në Komunën e Podujevës nuk janë ndryshuar tarifat për grumbullimin e mbeturinave për një kohë shumë të gjatë.
“Pastrimi” thotë se shkaku kryesor qëndron te mosndryshimi i tarifave prej vitit 2008. Përkundër, siç shprehet ndërmarrja, rritjes së madhe të kostove të operimit, furnizimit me karburante, nevojës për pjesë rezervë, si dhe shpenzimeve për deponi, mirëmbajtjes, pagave dhe shpenzimeve të tjera të lidhura me punën e përditshme, tarifa për shërbimin në Podujevë ka mbetur e pandryshuar.
Tarifat prej 2008-ës e kanë çuar Njësinë Operative në humbje
Në reagim, “Pastrimi” thekson se tarifa vazhdon të jetë vetëm 4.70 euro me TVSH, që ndërmarrja e përkthen në rreth 3.8 euro neto. Ndërmarrja vë në pah se në kushte kur shpenzimet rriten, ndërsa të hyrat nuk përshtaten, funksionimi i rregullt i shërbimeve bëhet gjithnjë e më i vështirë. “Pastrimi” shton se asnjë ndërmarrje publike apo private nuk mund të punojë normalisht kur për gati dy dekada rriten kostot, ndërsa të ardhurat mbeten të njëjta.
Ndër të tjera, “Pastrimi” thotë se Njësia e Podujevës nuk ka arritur që asnjëherë t’i mbulojë pagat e punëtorëve dhe shpenzimet operative vetëm nga të hyrat që gjenerohen përmes shërbimeve. Sipas ndërmarrjes, humbjet janë mbuluar nga Prishtina, duke e paraqitur këtë si mekanizëm të brendshëm që ka lejuar që njësia të vazhdojë punën edhe kur kostot tejkalojnë të hyrat.
Reagimi përmend edhe çështje të tjera financiare të cilat, sipas “Pastrimit”, kanë ndikuar në thellimin e situatës. Kompania akuzon Komunën e Podujevës se nuk i ka përmbushur obligimet financiare ndaj ndërmarrjes për investimet e realizuara, përfshirë objektin e ri. “Pastrimi” thotë se kjo gjendje ka rënduar më tej situatën dhe ka krijuar presion shtesë mbi aktivitetet e njësisë.
Po ashtu, “Pastrimi” pretendon se i janë marrë edhe konsumatorët, duke e lidhur këtë me ndikimin në inkasim dhe në mundësinë për të gjeneruar të hyra. Në reagim ngrihet shqetësim edhe për mënyrën se si po trajtohet kriza, ku ndërmarrja shprehet se po krijohet një krizë dhe më pas, nën “petkun e emergjencës”, po hapet rruga për kontrata emergjente, angazhimin e operatorëve privatë dhe financimin e tyre me mjete publike. “Pastrimi” thotë se ky nuk është rast i ri dhe se skenarë të ngjashëm janë parë edhe në komuna të tjera aksionare në KRM “Pastrimi”.
Në përfundim, kompania thekson se nuk do të lejojë që paaftësia për të adresuar problemet shumëvjeçare financiare të fshihet pas akuzave ndaj një ndërmarrjeje publike. “Pastrimi” thotë se nuk do të lejojë që punëtorët e saj të paguajnë çmimin e vendimeve politike. Ndërmarrja deklaron se do të shfrytëzohen të gjitha mjetet ligjore për të mbrojtur ndërmarrjen, punëtorët dhe interesin publik, ndërsa çdo vendim që cenon të drejtat e KRM “Pastrimi” dhe rrezikon ekzistencën e Njësisë Operative në Podujevë, sipas saj, do të kundërshtohet.
Botuar fillimisht në Koha.net
