Sabri Novosella ka rrëfyer detaje nga arratisja e tij nga Kosova, pas informacioneve që ai thotë se i kishte marrë se autoritetet jugosllave po planifikonin ta arrestonin. Tregimi i tij u zhvillua në kuadër të ciklit të intervistave “Dosjet” të emisionit “Debat Plus”, ku ai ka përshkruar hap pas hapi vendimet që mori nga momenti kur kuptoi se arrestimi ishte i afërt.
Novosella shpjegoi se informacionin për arrestimin e planifikuar ia kishte dhënë Ramadan Xhema. Sipas rrëfimit, Xhema i kishte bërë të ditur se autoritetet kishin caktuar një orar të saktë dhe se ai do të merrej në arrestim në mëngjes. Ai tha se i është komunikuar që, rreth orës 05:00, do të shkonin për ta arrestuar.
“Dhe më tregon Ramadan Xhema, thotë kështu më thanë, nesër mëngjes në ora 05:00 kemi me shku me burgos”, rrëfeu Novosella. Pas kësaj, ai tregoi se ishte kthyer në shtëpi, por kishte vënë re se po përcillej. Në tregimin e tij, personi që e shoqëronte dhe e kontrollonte lëvizjen e tij e mbante rolin e një përcjellësi, të cilin ai e lidhi me shërbimin sekret UDB.
Novosella tha se kishte një përcjellës që e kishte ndjekur deri te dera dhe më pas deri në oborrin e shtëpisë. Ai e përshkroi se personi e shoqëroi afër shtëpisë dhe më pas u largua. Edhe pse kishte prani të atij që ai e cilësoi si spiuni i UDB-së, Novosella tha se besonte se përcjellja nuk ishte bërë me dëshirë nga ai person, duke theksuar se, sipas tij, kishte familje dhe fëmijë dhe frikë se mund të përfundonte edhe vetë në burg.
Pas marrjes së informacionit për arrestimin, Novosella tregoi se rreth mesnatës kishte vendosur të largohej. Ai shkoi te motra e tij, Igballe Novosella, si dhe te bashkëshorti i saj, Fadil Mehmeti. Aty, sipas tij, familjarët nisën të organizoheshin për të njoftuar të tjerët në rast se policia do të vinte pikërisht në orën 05:00, siç ishte paralajmëruar.
Arratisja nisi kur ora 05:00 dukej shumë afër
Novosella shtoi se familjarët e tij e kishin vënë në lëvizje planin në kohë: “Fadil Mehmeti në ora 5:00, ata u lajmëruan, njoftuan krejt”, tregoi ai. Më pas, ai u largua nga Prishtina në drejtim të Podujevës dhe qëndroi për disa ditë në fshatin Dumnicë. Pas tre-katër ditësh, sipas rrëfimit, një mik i vëllait të tij, Fuati, erdhi me veturë për ta marrë dhe për ta dërguar ku të kishte nevojë.
Novosella tregoi se Fuati i kishte premtuar mbështetje të menjëhershme, duke thënë se ishte i gatshëm të rrezikonte për të: “Tha: ‘Baca Sabri, unë jam ardh me të marrë e me të dërgu ku të thuash ti, unë jam i gatshëm me vdek me ty’”, rrëfeu ai. Nga Podujeva, udhëtimi vijoi në drejtim të Pejës dhe më pas drejt Gjakovës, ku ai kërkoi ndihmën e bashkëveprimtarit të tij, Mark Murturit.
Sipas Novosellës, Mark Murturi i kishte vendosur përballë dy opsione: të vdiste ose të kalonte kufirin dhe të arratisej në Shqipëri. Ai tha se Murturi e kishte paralajmëruar për rreziqet në zonën kufitare, duke theksuar se aty kishte prani më të shtuar të milicisë dhe se kalimi do të ishte shumë i rrezikshëm. Megjithatë, pavarësisht frikës dhe pasigurive, Novosella dhe ata që e ndihmuan vendosën të vazhdonin rrugën.
Ai rrëfeu se kufirin e kishte kaluar gjatë muajit dhjetor, në rrethana të vështira. “Dola në Shqipëri, ata u kthyen”, tha Novosella, duke shtuar se Mark Murturi më pas njoftoi familjen e tij se ai kishte arritur të kalonte në anën tjetër të kufirit. Arratisjen, Novosella e përshkroi si një periudhë ku ishte vazhdimisht i rrezikuar, duke thënë se për të ishte më e pranueshme të rrezikonte jetën sesa të përfundonte sërish në burg.
Pas mbërritjes në Shqipëri, Novosella tha se kishte përdorur lidhjet që, sipas tij, i kishte organizata e tij për të kontaktuar dy emigrantë të tjerë që ishin larguar nga Jugosllavia dhe më vonë kishin marrë pozita në Shqipëri. Sipas rrëfimit të tij, organizata kishte krijuar më herët lidhje me Shqipërinë, dhe këto kontakte i erdhën në ndihmë pas arratisjes, duke i hapur rrugë që të mos mbetej i izoluar.
Botuar fillimisht në Telegrafi
