“Nonna style” po sfidon modën moderne dhe po fiton me shpejtësi vëmendjen e publikut. Ndryshe nga veshjet e ekzagjeruara apo tendencat që ndryshojnë çdo sezon, gratë po zgjedhin copa klasike, materiale natyrale dhe atë elegancë të qetë që lidhet me gjyshet italiane.
Fillimisht, rruga u hap nga trendi “coastal grandmother”, i cili theksonte një estetikë të frymëzuar nga stili i lirë i verës dhe veshjet në tone natyrale. Më pas erdhi “granny style”, që e çoi edhe më tej idenë e rikthimit të stilit të trashëguar. Tani, në qendër të vëmendjes po hyn një figurë më specifike: gjyshja italiane, “nonna”, e cila po kthehet në burim frymëzimi për kombinime më të rehatshme dhe më autentike.
Duke pasur parasysh rritjen e madhe të kërkimeve në TikTok për estetikën e frymëzuar nga gjyshet, nuk është çudi që edhe stili i grave të moshuara italiane është shndërruar në modë që tërheq. Pamja “nonna” nuk mbështetet te teprimet, por te elementet që krijojnë një identitet të qartë: këmisha prej liri, përparëse të thjeshta, shami në kokë, bizhuteri ari dhe motive retro. Kombinimi i këtyre detajeve jep një elegancë që duket krejt e natyrshme, si diçka e thjeshtë që thotë “kështu vishem gjithmonë”.
Një pjesë e madhe e tërheqjes lidhet edhe me mënyrën se si është parë dollapi me vite. Dikur, rrobat e trashëguara nga gjyshet përfundonin në fund të tij dhe rrallë gjenin vend në veshjen e përditshme. Sot, pikërisht këto veshje po kërkohen gjithnjë e më shumë dhe po qarkullojnë në platformat e ndryshme të përmbajtjes, sepse konsiderohen si materiale me vlerë dhe me karakter. Për këtë arsye, jo vetëm që po rikthehen copat, por po rikthehet edhe historia që ato mbajnë.
“Nonna trend”: nga dollapi i vjetër te veshja e përditshme
Ky rikthim po ushqehet veçanërisht nga brezi Gen Z, i njohur për kthimin e stileve të harruara. Për ta, gjyshja italiane është bërë një “muse” e re: një referencë për mënyrën si mund të kombinohen rrobat me shije pa pasur nevojë të ndjekësh vazhdimisht risitë e tregut. Por “Nonna trend” nuk lidhet vetëm me mënyrën e veshjes. Ai po kthehet në një filozofi të tërë: bli më pak, zgjidh më mirë dhe vishi pa hezitim të njëjtat kombinime që të pëlqejnë.
Në vend të ndjekjes së vazhdueshme të produkteve të reja, ky stil promovon veshje që zgjasin në kohë. Materialet natyrale dhe pjesët me karakter marrin përparësi, sepse mbajnë formë, ndjehen mirë në trup dhe duken më të qëndrueshme edhe pas shumë përdorimesh. Për më tepër, estetika “nonna” mbështet idenë se eleganca nuk ka nevojë të jetë e komplikuar: disa elemente të qëndrueshme, të kombinuara me kujdes, krijojnë një rezultat të plotë.
Ndërsa “quiet luxury” solli idenë e luksit të heshtur dhe të sofistikuar, estetika “nonna” shkon edhe më pranë jetës së përditshme. Luksin këtu nuk e përcaktojnë domosdoshmërisht markat apo çmimet. Mund të jetë një mbulesë tavoline e hekurosur mirë, aroma e rrobave të sapolara ose një varëse ari e trashëguar brez pas brezi. Thelbi i tërheqjes mbetet po ai: rehati, nostalgji, cilësi dhe elegancë që nuk kërkon shumë përpjekje.
Në fund, stili i gjyshes italiane nuk kërkon perfeksion. Ai përkundrazi mbështetet te veshjet që duken “të jetuara”, personale dhe të zgjedhura me shije, sikur të kishin qenë pjesë e gardërobës prej vitesh. Pikërisht ky sens realiteti e bën “nonna style” një trend që ndihet i afërt dhe i lehtë për t’u ndjekur, duke e kthyer modën në një zgjedhje më të qetë dhe më të qëndrueshme.
Botuar fillimisht në Telegrafi
