Pavarësisht nëse do të sigurojë apo jo një vend në edicionin e ardhshëm të Champions League, te Milani priten ndryshime të thella strukturore sapo të mbyllet sezoni. Hapat e para të “kapitullit të ri” pritet të nisin menjëherë pas përballjes së radhës, teksa kuqezinjtë do të luajnë ndaj Cagliarit dhe rezultat i asaj ndeshjeje do të ndikojë edhe në fatin e tyre në garën europiane.
Raportimet nga Italia bëjnë me dije se dita e hënë do të jetë moment kyç për organizimin e brendshëm të klubit, me startin e lëvizjeve që lidhen drejtpërdrejt me të ardhmen në “Casa Milan”. Pikërisht pas ndeshjes ndaj Cagliarit, drejtuesit pritet të finalizojnë vendimet që lidhen me strukturën e menaxhimit dhe planin për sezonin e ardhshëm, me vëmendje të veçantë te përbërja e rolit ekzekutiv dhe drejtimi sportiv.
Në qendër të këtyre ndryshimeve është largimi i administratorit aktual, Giorgio Furlani. Sipas të njëjtave raportime, drejtuesi italian nuk parashikohet të jetë pjesë e projektit të ri, ndërsa klubi ka nisur kërkimet për një drejtor të ri ekzekutiv që do të marrë përgjegjësitë në fazën tjetër të organizimit. Ky riformatim pritet të prekë jo vetëm funksionet e administrimit, por edhe mënyrën sesi do të ndërtohen vendimet për merkato dhe objektivat sportive.
Procesi i përzgjedhjes raportohet se po drejtohet nga Massimo Calvelli, anëtar i bordit drejtues të Milanit dhe një nga bashkëpunëtorët më të afërt të pronarit Gerry Cardinale. Në këtë fazë, emra të ndryshëm po shqyrtohen për postin, duke përfshirë edhe profilin e Giovanni Carnevali, aktualisht pjesë e Sassuolos Calcio. Nuk përjashtohet as mundësia që Milani të zgjedhë një kandidat ndërkombëtar, nëse do të konsiderohet i përshtatshëm për nevojat e projektit të ri.
Tensionet te “Casa Milan”: riorganizim pas ndeshjes me Cagliarin
Paralelisht me lëvizjet në administrim, edhe pozicionet e Igli Tare dhe Zlatan Ibrahimović shihen si të pasigurta. Ish-drejtori sportiv shqiptar raportohet se mund të largohet pas vetëm një sezoni, pavarësisht se rol i tij lidhet drejtpërdrejt me aspektet sportive të klubit dhe planifikimin e skuadrës. Kjo situatë lidhet me rishikimin e brendshëm që pritet të ndodhë në prag të sezonit të ardhshëm, ku disa figura mund të zëvendësohen për të krijuar një strukturë më të përshtatshme.
Edhe për Zlatan Ibrahimović, aktualisht këshilltar i pronësisë, përmendet mundësia e një reduktimi të ndjeshëm në strukturën e re organizative. Me ndryshimet që po shqyrtohen në “Casa Milan”, roli i tij mund të mos mbetet i njëjtë si në të kaluarën, teksa klubi kërkon të përshtasë përgjegjësitë sipas drejtimit të ri që pritet të merret. Kjo është pjesë e një skenari më të gjerë, ku rishikohen të gjitha linjat e punës për të ardhmen e afërt të klubit.
Në të njëjtën kohë, as trajneri Massimiliano Allegri nuk shfaqet me një garanci të plotë për vazhdimësi. Një kualifikim në Champions League do të aktivizonte automatikisht rinovimin e kontratës për një tjetër sezon, por kjo nuk garanton që ai të qëndrojë patjetër në stol edhe më tej. Mediat italiane raportojnë se ideja e drejtimit të kombëtares italiane e tërheq teknikun toskan, ndërkohë që ai pritet të kërkojë garanci të forta sportive dhe financiare për të vazhduar projektin në “San Siro”.
Ndërsa pritet të nisë dita e hënë si moment i parë i lëvizjeve, gjithçka lidhet me pasojat që do të sjellë përfundimi i sezonit dhe rezultati i ndeshjes ndaj Cagliarit. Për Milani, kjo periudhë duket si një pikë kthese: nga rolet brenda klubit te drejtimi i skuadrës dhe e ardhmja e trajnerit, ndryshimet janë në plan dhe pritet të qartësohen menjëherë pas vendimeve që do të merren në “Casa Milan”.
Botuar fillimisht në Bota Sot
