Dhoma e Tregtisë dhe Industrisë Kosovë mbajti Kuvendin e vet të Punës, një takim i përvitshëm ku u diskutuan zhvillimet gjatë vitit të kaluar, puna e Dhomës si organizatë përfaqësuese dhe sfidat që po prekin bizneset dhe ekonominë në përgjithësi. Në këtë aktivitet u trajtuan si çështjet institucionale, ashtu edhe ato praktike që kanë ndikim të drejtpërdrejtë në afarizmin e kompanive.
Kryetari i Kuvendit, Hamdi Malushaj, theksoi se DHTIK ka qenë aktive në trajtimin e çështjeve ligjore dhe administrative që ndikojnë drejtpërdrejt në mënyrën se si bizneset operojnë. Sipas tij, angazhimi i Dhomës nuk është kufizuar vetëm në komunikime të përgjithshme, por është fokusuar te ndryshime dhe procese që mund të përmirësojnë, ose të vështirësojnë, ambientin biznesor.
Malushaj nënvizoi se ndër temat ku DHTIK ka ngritur zë kanë qenë Ligji për Pronën Publike, liberalizimi i tregut të energjisë, rritja e çmimit të energjisë, Ligji i Punës, procedurat kufitare dhe pengesat administrative. Ai tha se të gjitha këto tema dëshmojnë se DHTIK nuk ka heshtur përballë situatave që, sipas qëndrimeve të Dhomës, dëmtojnë bizneset dhe ekonominë.
Bizneset të bashkuara, kërkohet ambient më i qëndrueshëm ekonomik
Në fjalën e tij, kryetari i Bordit, Skender Krasniqi, falënderoi bizneset për pjesëmarrjen në takim dhe solli një mesazh të qartë lidhur me kohën në të cilën po kalon vendi. Krasniqi tha se Kosova po përballet me një moment që nuk lejon “luksin e rehatisë” dhe se, në logjikën e tij, kur bizneset janë të ndara, humbasin të gjithë, ndërsa kur janë të bashkuara përfitojnë si bizneset ashtu edhe shteti.
Ai rikujtoi se dhoma ka nisur rrugëtimin e saj rreth dhjetë vite më parë me një vizion për të qenë zëri i biznesit vendor. Krasniqi tha se pas një dekade pune, sfidash dhe angazhimi të vazhdueshëm, mbetet po aq e rëndësishme që kompanitë të bashkohen dhe të kërkojnë një ambient më të qëndrueshëm ekonomik. Në këtë kuadër, Krasniqi argumentoi se asnjë biznes nuk mund të zhvillohet në një sistem që nuk funksionon mirë, si dhe asnjë shtet nuk mund të ecë përpara pa biznese të forta.
Ndërkohë, drejtori ekzekutiv i DHTIK, Kushtrim Ahmeti, tha se pavarësisht ambientit të vështirë për të bërë biznes, Dhoma ka vazhduar mbështetjen konstante për bizneset anëtare. Ai përmendi realizimin e vizitave të rregullta tek kompanitë dhe organizimin e aktiviteteve, mes të cilave veçoi formatin “Kafja e Mëngjesit” me kryetarë komunash, si një mënyrë për të adresuar çështje të ndryshme që prekin ekonominë lokale dhe bashkëpunimin institucional.
Në planin ndërkombëtar, Ahmeti theksoi se DHTIK ka forcuar vazhdimisht partneritetet me organizata partnere nga rajoni dhe më gjerë, duke ruajtur komunikim të mirë edhe me ambasada të ndryshme në vend. Po ashtu, në këtë takim u diskutua për zhvillimet aktuale dhe u prezantua raporti vjetor i punës për vitin 2025. Një element tjetër i rëndësishëm ishte votimi i raportit të shpenzimeve të buxhetit për vitin e kaluar dhe miratimi i planit të shpenzimeve për këtë vit.
Pjesëmarrësit nga bizneset anëtare shprehën nevojën për rritje të bashkëpunimit mes kompanive, ofruan propozime për angazhim të përbashkët dhe falënderuan Dhomën për përfaqësimin sa më të mirë të interesave të tyre. Në përmbyllje, u theksua edhe roli i DHTIK si zë i fuqishëm i biznesit vendor dhe partner i sigurt i zhvillimit ekonomik.
Botuar fillimisht në Bota Sot
