Platforma WorldAtlas ka publikuar një listë me 10 vendet më të varfëra në Evropë, duke u mbështetur në të dhënat e Fondit Monetar Ndërkombëtar. Në matjet për vitin 2025, Kosova renditet si vendi i dytë më i varfër në kontinent, menjëherë pas Moldavisë.
Matja është bërë sipas barazisë së fuqisë blerëse (PPP), duke përdorur shifra të shprehura në dollarë. Për të ruajtur krahësimin mes vendeve, WorldAtlas i referohet bazës së të dhënave të FMN-së, në kuadër të World Economic Outlook. Publikimi mban datën e tetorit 2025 dhe përfshin vlerësime për vitin 2025.
Sipas publikimit, lista e këtij viti shënon dy ndryshime të mëdha krahasuar me renditjet e mëparshme. Rënia ekonomike e Ukrainës pas pushtimit të plotë nga Rusia në vitin 2022 e ka shtyrë atë ndër tre vendet më të varfra në Evropë. Në të njëjtën logjikë, Kosova figuron gjithashtu mes vendeve me nivelin më të lartë të varfërisë në kontinent, por edhe në këtë matje Ukraina del pas Kosovës.
Kosova renditet e dyta më e varfër në Evropë për vitin 2025
Në renditjen për 10 vendet më të varfëra në Evropë, shifrat për GDP-në për person (sipas PPP, në dollarë) janë: Moldavia rreth 19,700 dollarë, Kosova rreth 20,400 dollarë, Ukraina rreth 21,000 dollarë dhe Bosnja e Hercegovina rreth 22,800 dollarë. Më pas vijnë Maqedonia e Veriut rreth 24,300 dollarë dhe Bjellorusia rreth 25,500 dollarë.
Lista vazhdon me Shqipërinë në vendin e shtatë për nga varfëria, me rreth 25,600 dollarë, ndërsa Serbia renditet e teta me rreth 28,500 dollarë. Mali i Zi është në vendin e nëntë me rreth 31,000 dollarë, kurse Bullgaria mbyll listën e dhjetë vendeve më të varfra, me rreth 36,000 dollarë.
Për Kosovën, në përshkrimin që shoqëron publikimin thuhet se ka një ekonomi të vogël dhe të orientuar kryesisht nga sektori i shërbimeve. Sipas këtij vlerësimi, ndërtimtaria, tregtia dhe remitencat përbëjnë pjesën më të madhe të aktivitetit ekonomik. Po ashtu theksohet se remitencat nga diaspora kosovare janë të përqendruara kryesisht në Gjermani, Zvicër dhe Austri, duke arritur rreth 15% të GDP-së, një nga nivelet më të larta në botë.
Në të dhënat e raportuara Për Kosovën thuhet edhe se rritja reale ekonomike ka qenë mesatarisht rreth 4% gjatë pesë viteve të fundit. Megjithatë, papunësia e të rinjve mbetet afër 30%, ndërsa rreth një e treta e të rinjve nuk janë as në punë, as në arsim apo trajnim. Për më tepër, përmendet se njohja e kufizuar ndërkombëtare e Kosovës ndikon në qasjen në institucione ndërkombëtare dhe ngadalëson investimet e huaja: rreth 100 shtete anëtare të OKB-së e njohin Kosovën, ndërsa Rusia, Kina, India, Spanja dhe Greqia nuk e njohin atë. Sa i përket raportit me Bashkimin Evropian, Kosova përshkruhet si kandidat potencial, pasi ka aplikuar në dhjetor 2022.
Ndërkohë, për Serbinë, publikimi e thekson se megjithëse vendi përshkruhet si ekonomia më e madhe nga ish-republikat jugosllave në këtë listë, sërish në rangimin e varfërisë në Evropë renditet e teta. Kjo e vendos atë pas Shqipërisë dhe përpara Malit të Zi, sipas shifrave të GDP-së për person të shprehura në dollarë me bazë PPP.
Botuar fillimisht në Koha.net
