Në Korishë të Prizrenit janë përkujtuar 77 viktimat që u vranë më 13 maj 1999, gjatë një prej netëve më të rënda të luftës së fundit në Kosovë. Ngjarja u shënua me një program komemorativ në fshatin ku ato ditë kërkuan strehim edhe banorë nga Korisha dhe nga disa fshatra të tjerë që po përpiqeshin t’i iknin masakrave të njëpasnjëshme të forcave serbe.
27 vite më parë, ndërsa po largoheshin për t’u shpëtuar, civilët ranë në kurthin e forcave serbe. Ndërkohë, në të njëjtën kohë, bombardoheshin edhe pika të rëndësishme të sistemit shtetëror serb të asaj periudhe. Në këtë situatë të krijuar nga sulmet dhe paniku, një ngjarje tragjike u bë fatale për shumë familje.
Sipas rrëfimeve për atë natë, një gjuajtje e NATO-s mbi një traktor me të shpërngulur mori jetët e 77 personave të pafajshëm. Viktimat ishin pjesëtarë të kolanës së qytetarëve që po iknin nga zona për të shpëtuar, por që nuk arritën të mbijetonin. Për këtë arsye, përkujtimi në Korishë nuk trajton vetëm një datë në kalendar, por kujton një tragjedi konkrete, me përmasa të mëdha, që la pasoja të thella tek familjet.
Korisha ruan kujtimin e 77 viktimave të 13 majit
Në përvjetorin e kësaj ngjarjeje, përkujtimi i 77 martirëve të Korishës dhe i mysafirëve nga disa fshatra të tjerë u shoqërua me pjesëmarrjen e familjarëve, si dhe të përfaqësuesve institucionalë dhe organizatave të dala nga lufta. Pjesëmarrësit u mblodhën për të nderuar ata që ranë për liri dhe dinjitet njerëzor, duke e lidhur kujtimin me përgjegjësinë për ta ruajtur të vërtetën në kujtesën kolektive.
Hasan Ahmetaj, familjar i martirëve, theksoi se ata u mblodhën “për të mos harruar, për të dëshmuar të vërtetën, për të nderuar ata që ranë për liri dhe dinjitet njerëzor”. Ai po ashtu tha se “Lavdia e dëshmorëve dhe martirëve tanë do të jetojë përherë në kujtesën e Korishës, në historinë e Kosovës, si dhe në zemrat e brezave që do të vijnë pas”. Përkujtimi u zhvillua pikërisht me këtë frymë, që lidh respektin për viktimat me përcjelljen e asaj që ndodhi edhe te brezat e ardhshëm.
Lulzim Kabashi, ish komandant i Batalionit të Kabashit, e cilësoi 13 majin si “një nga ngjarjet më të dhimbshme nga lufta jonë e fundit e UÇK-së”. Ai tha se kjo datë i mban njerëzit të vetëdijshëm se “liria e sotme është rezultat i një sakrifice të madhe” dhe se i kujton qytetarët se “armiku ynë shekullorë, po t’i jepet mundësia do të veprojë njëjtë”. Kabashi nënvizoi se për këtë arsye ekziston “obligim moral dhe njerëzor, të mos harrojmë këto krime dhe ti përgatisim të rinjtë tanë se një skenar i tillë, ç’do herë mund të përsëritet”.
Isa Berisha, nga OVL e UÇK-së, tha se, duke pasur parasysh se UÇK-ja vepronte në këto anë dhe se njësiti i komandohej nga komandant Lulzim Kabashi duke i shkaktuar humbje të mëdha armikut, kjo masakër “nuk ishte e rastësishme”. Ndërsa Kujtim Gashi, nënkryetar i komunës së Prizrenit, theksoi se Korisha mbetet “simbol i vuajtjes së popullit tonë”, por edhe “simbol i qëndresës dhe i kujtesës sonë kolektive”, duke shtuar se është obligim moral dhe kombëtar që brezat e rinj ta njohin të vërtetën. Sipas tij, viktimat nuk duhet të harrohen dhe padrejtësitë e luftës nuk duhet të relativizohen.
Botuar fillimisht në Bota Sot
