Një zhvillim i rëndë tronditi shërbimet inteligjente gjermane: një ish-shef i Shërbimit Federal të Inteligjencës së Gjermanisë (BND) është arrestuar të martën nën dyshimet për spiunazh dhe tradhti. Ngjarja lidhet me një rast skandaloz që vjen në një periudhë kur Berlini po përpiqet të zgjerojë kompetencat e agjencive të inteligjencës, në kuadër të kërcënimeve në rritje.
August Hanning, i cili drejtoi BND-në nga viti 1998 deri më 2005, akuzohet për spiunazh, tradhti dhe bashkëpunim me shërbime të huaja të inteligjencës, njoftuan prokurorët federalë. Në njoftimin e autoriteteve nuk u bënë të ditura hollësi mbi shtetet për të cilat dyshohet se lidhet veprimtaria e tij, duke mbetur i paqartë edhe objektivi gjeografik i dyshimeve.
Sipas raportimit të revistës gjermane “Spiegel”, Hanning kishte qenë në kontakt me një operativ të inteligjencës së Azerbajxhanit. I përfshirë në këtë histori, edhe ish-shefi i stafit të Hanningut—i identifikuar pjesërisht si Manfred D.—është arrestuar gjithashtu. Ai vazhdoi të punonte për shërbimin sekret deri në mars të vitit 2026 dhe, sipas akuzave, gjatë punës për pasuesit e Hanningut kishte siguruar informacione të klasifikuara dhe ia kishte shitur ish-shefit të tij, i cili më pas punonte si konsulent në sektorin privat.
Ndërkohë, prokurorët pohojnë se Hanning dyshohet t’i ketë përdorur këto informacione në aktivitetin e tij privat, i cili përfshinte përgatitjen e një informimi për një spiun të huaj dhe përcjelljen e informacioneve te një agjent i një shërbimi tjetër të huaj inteligjence. Në raportimin e “Spiegel”, thuhet se informimi ishte përgatitur për spiunin azerbajxhanas. Gjithashtu, Hanning akuzohet se ishte “në kontakt të ngushtë” me një përfaqësues të një shërbimi tjetër të huaj të inteligjencës, të cilit për disa vite i kishte përcjellë informacione politike.
Skandali nxjerr në pah komprometimin e informacionit të klasifikuar
Transmituesi gjerman ARD ka raportuar se informacionet e Manfred D.—të cilat dyshohet se i kanë shërbyer Hanningut—përfshinin materiale për programin bërthamor të Iranit dhe për ushtrinë ruse. ARD, duke iu referuar burimeve të sigurisë, ka cituar se një pjesë e këtyre të dhënave kishte ardhur nga agjenci partnere të inteligjencës jashtë vendit. Ndërkohë, Konstantin von Notz, deputet i opozitës nga Partia e të Gjelbërve dhe anëtar i komitetit parlamentar për mbikëqyrjen e shërbimeve të inteligjencës, i cilësoi akuzat “të rënda dhe thellësisht shqetësuese” dhe kërkoi hetim për “dëmin e mundshëm”.
Akuzat kanë dalë në dritë gjatë përfshirjes së Hanningut në një rast që lidhet me Christina Block, trashëgimtare e një zinxhiri restorantesh, e cila po gjykohet për urdhërimin e rrëmbimit të dy fëmijëve të saj. Në atë proces, Hanning dhe një ish-polic në pension u akuzuan se kishin pranuar pagesë prej më shumë se 100 mijë eurosh nga Blocku, në këmbim të kthimit të fëmijëve nga Danimarka, ku ata jetonin me ish-bashkëshortin e saj. Lidhur me këtë, prona e Hanningut u kontrollua në shtator të vitit 2025, çka çoi në hetimin aktual.
Marc Henrichmann, kryetar i komitetit parlamentar për mbikëqyrjen e inteligjencës, deklaroi se Gjermania “nuk do ta tolerojë tradhtinë e sekreteve” dhe paralajmëroi se kushdo që bashkohet me “armiqtë” e demokracisë liberale do të zbulohet. Sipas tij, sjellja e pretenduar e Hanningut përbën shkelje të rëndë të detyrave zyrtare. Për këtë lloj akuze, tradhtia mund të dënohet me burgim të përjetshëm në Gjermani. Skandali vjen pas një vendimi të qeverisë gjermane, e cila muajin e kaluar miratoi një reformë të gjerë të agjencive të inteligjencës, duke u dhënë atyre kompetenca më të mëdha për operacione të fshehta.
Reforma vjen si përgjigje ndaj nevojës për t’u përballur me kërcënimet në rritje, veçanërisht nga Rusia. BND-ja dhe Shërbimi Federal për Mbrojtjen e Kushtetutës (BfV), që merret me inteligjencën e brendshme, kanë pasur kompetenca më të kufizuara se homologët e tyre të huaj, por autoritetet po kërkojnë t’i forcojnë ato. Sipas njoftimeve, reformat pritet të miratohen nga parlamenti në fillim të vitit të ardhshëm. Shefi aktual i BND-së, Martin Jaeger, tha se agjencia kishte “kryer shpejt hetime të gjera të brendshme” ndaj Hanningut përpara se çështjen ta merrnin në dorë prokurorët federalë. Jaeger theksoi se për BND-në dhe për të personalisht “nuk ka kompromis” kur bëhet fjalë për sigurinë e brendshme dhe se incidenti “nuk ka vënë në pikëpyetje asnjë nga qëllimet apo prioritetet” e tij.
Në detaje të tjera të çështjes, prokurorët theksojnë se Manfred D. i kishte siguruar Hanningut rreth 2 mijë dokumente, shumë prej të cilave përmbanin informacione të klasifikuara. Hanningu, i cili ka shërbyer si zyrtari më i lartë civil në Ministrinë e Brendshme nga viti 2005 deri më 2009, dyshohet se ka përdorur këto informacione të klasifikuara të inteligjencës për të hartuar një analizë për një zyrtar të një shërbimi të huaj të inteligjencës. Megjithatë, mbetet e paqartë nëse “materiali ka arritur te marrësi i synuar”.
Botuar fillimisht në Telegrafi
