Flasterët transparentë për puçrra kanë dalë prej kohësh nga raftet e aksesorëve “trend” dhe janë kthyer në një mënyrë të shpejtë, që premton ta qetësojë lëkurën brenda natës. Ato vijnë në forma të ndryshme, shpesh në ngjyrën e lëkurës, por edhe me dizajne si yje, flutura apo zemra. Në rrjetet sociale qarkullojnë video ku flasteri hiqet pas disa orësh dhe puçrra duket më e “qetë”. Por pyetja kryesore mbetet: a funksionojnë realisht, dhe për cilat puçrra?
Së pari, është e rëndësishme të mos i ngatërrojmë. Dermatologët theksojnë se një puçërr e vetme nuk është e njëjtë me aknet. Puçrra formohet kur folikuli bllokohet nga yndyra, qelizat e vdekura të lëkurës dhe bakteret, duke çuar në inflamacion, skuqje dhe shpesh një majë të bardhë ose me qelb. Aknet, nga ana tjetër, janë një gjendje kronike që përsëritet dhe mund të përfshijë pika të zeza, komedone të mbyllura dhe lezione inflamatore.
Flasterët hidrokoloid: të dobishëm për puçrrat sipërfaqësore
Flasterët për puçra, edhe pse duken si trend i ri, mbështeten në teknologji që lidhet me veshjet hidrokoloide. Këto materiale janë zhvilluar prej dekadash për kujdesin ndaj plagëve dhe më pas janë përshtatur edhe për aknet. Në thelb, flasteri përbëhet nga material hidrokoloid që, kur bie në kontakt me lagështinë në sipërfaqe, krijon një lloj xheli. Kjo do të thotë se ai mund të thithë përmbajtjen nga puçrra, kur majë e saj është e dukshme, zakonisht e bardhë ose e verdhë.
Për pasojë, pas disa orësh përdorimi, flasteri shpesh bëhet i bardhë ose i turbullt, sepse thith qelb, sebum dhe lëngje nga sipërfaqja. Një rol tjetër i tij është mbrojtja: shtresa e jashtme vepron si pengesë që e mbron zonën nga prekja, shtrydhja dhe papastërtitë. Kjo ndihmon të ulet rreziku i irritimit të mëtejshëm, veçanërisht kur puçrra është duke u “zbrazur”. Disa produkte mund të përfshijnë edhe përbërës aktivë si acid salicilik, niacinamid, vaj të pemës së çajit ose benzoil peroksid.
Sa i përket efektit, studimet që janë marrë drejtpërdrejt me flasterët kundër puçrrave konsiderohen ende relativisht të kufizuara dhe shpesh kanë numër të vogël pjesëmarrësish. Megjithatë, disa rezultate të hershme sugjerojnë se mund të jenë të dobishëm. Një studim me 41 persona ka treguar përmirësim të pamjes së një puçrre që ishte tashmë e formuar dhe e zbrazur brenda 24 orësh. Një tjetër studim me 37 pjesëmarrës, gjatë 10 ditëve, ka raportuar se pas dy ditësh puçrrat e mbuluara me flaster ishin rreth 35 për qind më të vogla dhe 44 për qind më pak të inflamuara krahasuar me ato pa trajtim.
Në fund të periudhës së studimit, lezionet e trajtuara kishin edhe më pak gjasa të linin njolla të errëta pas inflamacionit. Këto rezultate lidhen edhe me llojin e puçrrës: flasterët priren të funksionojnë më mirë te puçrrat që kanë tashmë një majë të bardhë ose të verdhë, pasi përmbajtja është më afër sipërfaqes së lëkurës. Zakonisht, flasterët vendosen mbi lëkurë të pastër dhe të thatë dhe mbahen rreth gjashtë deri në tetë orë, ose gjatë natës.
Ndërkohë, flasterët nuk janë zgjidhje universale. Ato zakonisht nuk punojnë mirë te aknet e thella cistike, apo te puçrrat e dhimbshme që ndodhen nën lëkurë, sepse materiali hidrokoloid nuk arrin të depërtojë deri te inflamacioni i thellë. Te disa persona, ngjitësi ose përbërësit aktivë mund të shkaktojnë skuqje, kruarje ose irritim. Personat që priren të kenë hiperpigmentim pas inflamacionit duhet të jenë veçanërisht të kujdesshëm, pasi irritimi shtesë mund t’i bëjë njollat më të dukshme dhe më të qëndrueshme. Nëse puçrrat janë të thella, të dhimbshme, lënë shenja ose nuk përmirësohen pas disa javësh, rekomandohet të kërkohet këshilla e mjekut apo dermatologut.
Botuar fillimisht në Telegrafi
